2026 ലോകകപ്പിൽ ദൂരത്തുനിന്നുള്ള ഗോളുകളുടെ പെരുമഴ; പ്രതിരോധ തന്ത്രങ്ങളാണ് മാറ്റത്തിന് കാരണം, വെളിപ്പെടുത്തി ഫിഫ

2026 ഫിഫ ലോകകപ്പ് ഫുട്ബോളിൽ പുതിയൊരു പ്രവണതയ്ക്ക് സാക്ഷ്യം വഹിക്കുകയാണ്. പെനാൽറ്റി ബോക്‌സിന് പുറത്തുനിന്നുള്ള ഗോളുകളുടെ എണ്ണത്തിൽ വൻ വർധനയാണ് ഈ ടൂർണമെന്റിന്റെ പ്രധാന സവിശേഷതകളിലൊന്ന്. ഖത്തർ ലോകകപ്പ് 2022നെ അപേക്ഷിച്ച് ഇത്തവണ ദൂരത്തുനിന്ന് നേടിയ ഗോളുകളുടെ അനുപാതം ഇരട്ടിയായതായി ഫിഫയുടെ ടെക്‌നിക്കൽ സ്റ്റഡി ഗ്രൂപ്പ് (TSG) പുറത്തുവിട്ട കണക്കുകൾ വ്യക്തമാക്കുന്നു.ഫിഫയുടെ റിപ്പോർട്ട് പ്രകാരം, 2026 ലോകകപ്പിൽ ഇതുവരെ പിറന്ന ഗോളുകളിൽ 16 ശതമാനവും പെനാൽറ്റി ബോക്‌സിന് പുറത്തുനിന്നാണ്. 2022 ഖത്തർ ലോകകപ്പിൽ ഇത് എട്ട് ശതമാനം മാത്രമായിരുന്നു. ആക്രമണ ശൈലിയിലെ ഈ മാറ്റം ലോക ഫുട്ബോളിലെ തന്ത്രപരമായ പരിണാമത്തിന്റെ വ്യക്തമായ സൂചനയാണെന്ന് ഫുട്ബോൾ വിദഗ്ധർ വിലയിരുത്തുന്നു.ഫിഫ ടെക്‌നിക്കൽ സ്റ്റഡി ഗ്രൂപ്പംഗവും മുൻ ജർമൻ ഇതിഹാസവുമായ യുർഗൻ ക്ലിൻസ്മാൻ പറയുന്നതനുസരിച്ച്, കൂടുതൽ ടീമുകളും ഇപ്പോൾ ആഴത്തിൽ പ്രതിരോധം തീർക്കുന്ന രീതിയാണ് സ്വീകരിക്കുന്നത്. എതിരാളികൾക്ക് ബോക്‌സിനുള്ളിൽ ഇടം ലഭിക്കാത്തതിനാൽ ദൂരത്തുനിന്നുള്ള ഷോട്ടുകളാണ് പ്രധാന ആയുധമായി മാറുന്നത്.“ബോക്‌സിലും അതിന് ചുറ്റുമുമായി എട്ട് മുതൽ ഒൻപത് വരെ താരങ്ങൾ പ്രതിരോധത്തിൽ നിൽക്കുമ്പോൾ മുന്നേറ്റനിരയ്ക്ക് ഇടം ലഭിക്കുന്നില്ല. അതിനാൽ ദൂരത്തുനിന്ന് ഷോട്ടെടുക്കുക എന്നത് സ്വാഭാവികമായൊരു പരിഹാരമാകുന്നു. പരിശീലകരെന്ന നിലയിൽ കാണാൻ ഏറെ ആവേശകരമായ മാറ്റമാണിത്. ഈ ലോകകപ്പിൽ അത്തരത്തിൽ നിരവധി മനോഹര ഗോളുകൾ കണ്ടു,” ക്ലിൻസ്മാൻ പറഞ്ഞു.ഫിഫയുടെ ഗ്ലോബൽ ഫുട്ബോൾ ഡെവലപ്‌മെന്റ് മേധാവിയായ ആഴ്‌സെൻ വെംഗറും ഈ ലോകകപ്പിലെ ദൂരക്കിക്കുകളുടെ നിലവാരം പ്രത്യേകമായി പ്രശംസിച്ചു.“ഈ ടൂർണമെന്റിൽ താരങ്ങൾ ബോക്‌സിന് പുറത്തുനിന്ന് യഥാർഥ റോക്കറ്റ് ഷോട്ടുകളാണ് ഉതിർത്തത്. ഷോട്ടുകളുടെ വേഗവും കൃത്യതയും അസാധാരണമായിരുന്നു,” വെംഗർ അഭിപ്രായപ്പെട്ടു.ഈ ലോകകപ്പിൽ ദൂരക്കിക്കുകൾ ഏറ്റവും ഫലപ്രദമായി ഉപയോഗിച്ച ടീമുകളിലൊന്നാണ് നിലവിലെ ചാമ്പ്യൻമാരായ അർജന്റീന. എതിരാളികൾ ആഴത്തിൽ പ്രതിരോധം തീർക്കുമ്പോൾ ബോക്‌സിന് പുറത്തുനിന്നുള്ള ഷോട്ടുകളിലൂടെയാണ് ലിയോണൽ സ്‌കലോണിയുടെ സംഘം പലപ്പോഴും മത്സരത്തിന്റെ ഗതി മാറ്റിയത്.അർജന്റീന ഇതുവരെ അഞ്ച് ഗോളുകൾ പെനാൽറ്റി ബോക്‌സിന് പുറത്തുനിന്ന് നേടിയിട്ടുണ്ട്. സെമിഫൈനലിൽ ഇംഗ്ലണ്ടിനെതിരെ 85-ാം മിനിറ്റിൽ എൻസോ ഫെർണാണ്ടസ് നേടിയ അതിഗംഭീര ലോംഗ് റേഞ്ച് ഗോൾ അർജന്റീനയുടെ തിരിച്ചുവരവിന് വഴിയൊരുക്കിയിരുന്നു. ക്വാർട്ടർ ഫൈനലിൽ 10 പേരായി ചുരുങ്ങിയ സ്വിറ്റ്സർലൻഡിനെതിരെ അധികസമയത്ത് ജൂലിയൻ അൽവാരസ് 22 യാർഡിൽ നിന്നടിച്ച അതിമനോഹര കർളിംഗ് ഷോട്ടും ടൂർണമെന്റിലെ മികച്ച ഗോളുകളിൽ ഒന്നായി വിലയിരുത്തപ്പെടുന്നു.ഫുട്ബോൾ കൂടുതൽ തന്ത്രപരമാകുന്ന കാലത്ത് പ്രതിരോധം മറികടക്കാൻ ദൂരക്കിക്കുകൾ വീണ്ടും പ്രധാന ആയുധമായി മാറുന്നുവെന്നാണ് ഈ ലോകകപ്പ് നൽകുന്ന ഏറ്റവും വലിയ സന്ദേശം. ലോകകപ്പിലെ ഈ പുതിയ പ്രവണത ഭാവിയിലെ ക്ലബ് ഫുട്ബോളിലും ദേശീയ ടീമുകളുടെയും തന്ത്രങ്ങളിലും വലിയ സ്വാധീനം ചെലുത്തുമെന്നാണ് ഫുട്ബോൾ വിദഗ്ധരുടെ വിലയിരുത്തൽ.