തിരുവനന്തപുരം: തീരദേശ ഭൂമിയും മത്സ്യത്തൊഴിലാളികളുടെ ഉപജീവനവും സംബന്ധിച്ച് ഭരണ–പ്രതിപക്ഷ വാക്പോരിനിടെ കേരള മാരിടൈം ബോർഡ് ഭേദഗതി ബിൽ നിയമസഭ പാസാക്കി. ബില്ലിനെ എതിർത്ത പ്രതിപക്ഷം സഭ ബഹിഷ്കരിച്ചു. തുറമുഖ വികസനത്തിന് സ്വകാര്യ നിക്ഷേപം അനിവാര്യമാണെന്ന് സർക്കാർ വാദിച്ചപ്പോൾ, മത്സ്യത്തൊഴിലാളികളുടെ അവകാശങ്ങൾക്കും തീരദേശത്തിന്റെ നിലനിൽപ്പിനും ഭീഷണിയാകുന്നതാണ് ബില്ലെന്നായിരുന്നു പ്രതിപക്ഷത്തിന്റെ ആരോപണം.
തുറമുഖ പരിധിയിൽ വരുന്ന ഭൂമിയാണ് ലാൻഡ് ബാങ്കിൽ ഉൾപ്പെടുത്തുന്നതെന്നും തുറമുഖത്തിന് പുറത്തുള്ള ഭൂമി ഏറ്റെടുക്കാൻ ഉദ്ദേശിക്കുന്നില്ലെന്നും മുഖ്യമന്ത്രി വി.ഡി. സതീശൻ നിയമസഭയിൽ വിശദീകരിച്ചു. വികസന പ്രവർത്തനങ്ങൾക്കാവശ്യമായ ഭൂമിയാണ് ഇതിലൂടെ ലക്ഷ്യമിടുന്നതെന്നും അദ്ദേഹം വ്യക്തമാക്കി. മാരിടൈം ബോർഡ് നിയമപരമായി രൂപീകരിച്ച സ്ഥാപനമാണെന്നും ഭൂമി ഏറ്റെടുക്കുന്നത് സംസ്ഥാനത്തിന്റെ ആവശ്യങ്ങൾക്കായാണെന്നും മുഖ്യമന്ത്രി പറഞ്ഞു.
സംസ്ഥാനത്തെ 18 തുറമുഖങ്ങളും സർക്കാർ മാത്രം വിചാരിച്ചാൽ വികസിപ്പിക്കാനാകില്ലെന്നും സ്വകാര്യ നിക്ഷേപം ലഭിച്ചാൽ മാത്രമേ വികസന പ്രവർത്തനങ്ങൾ മുന്നോട്ടുകൊണ്ടുപോകാനാകൂവെന്നും മുഖ്യമന്ത്രി ചൂണ്ടിക്കാട്ടി. അദാനി ഉൾപ്പെടെയുള്ള നിക്ഷേപകരെ പരാമർശിച്ച അദ്ദേഹം, തുറമുഖ വികസനത്തിന് കോർപ്പറേറ്റ് നിക്ഷേപം ആവശ്യമായി വരുമെന്നും വ്യക്തമാക്കി. രാജ്യത്തിനകത്തുനിന്നും വിദേശത്തുനിന്നുമുള്ള നിക്ഷേപകർക്ക് നിക്ഷേപം നടത്താൻ അനുയോജ്യമായ തുറമുഖങ്ങളും ഭൂമിയും സർക്കാർ മുന്നോട്ടുവയ്ക്കുമെന്നും അദ്ദേഹം പറഞ്ഞു.
നിക്ഷേപങ്ങൾ എത്തുമ്പോൾ നടപടിക്രമങ്ങൾ ലളിതമാക്കുക എന്ന ലക്ഷ്യത്തോടെയാണ് ലാൻഡ് ബാങ്ക് സംവിധാനമെന്നും മുഖ്യമന്ത്രി വിശദീകരിച്ചു. എന്നാൽ തുറമുഖത്തിന്റെ പരിധി എത്രത്തോളമാണെന്ന് വ്യക്തമായി പറയാനാകില്ലെന്ന പ്രതിപക്ഷത്തിന്റെ ആശങ്കയും ചർച്ചയിൽ ഉയർന്നു.
ബിൽ മത്സ്യത്തൊഴിലാളികളുടെ ജീവിതാവകാശത്തെ ബാധിക്കുമെന്ന് പ്രതിപക്ഷ നേതാവ് പിണറായി വിജയൻ ആരോപിച്ചു. സംസ്ഥാനത്തെ 222 മത്സ്യബന്ധന ഗ്രാമങ്ങളിലെ പത്തുലക്ഷത്തിലധികം മത്സ്യത്തൊഴിലാളികളെ അരക്ഷിതാവസ്ഥയിലാക്കുന്നതാണ് നിയമനിർമാണമെന്നാണ് അദ്ദേഹത്തിന്റെ വാദം. തീരദേശ ജനത തലമുറകളായി സംരക്ഷിച്ച ഭൂമിയും കടലും സ്വകാര്യ താൽപര്യങ്ങൾക്ക് വിട്ടുകൊടുക്കാനുള്ള നീക്കമാണിതെന്നും അദ്ദേഹം വിമർശിച്ചു.
മറ്റ് വകുപ്പുകളുടെ കൈവശമുള്ള ഭൂമി ഉൾപ്പെടുത്തി ലാൻഡ് ബാങ്ക് രൂപീകരിക്കുന്നത് ആശങ്കാജനകമാണെന്നും പരമ്പരാഗത മത്സ്യത്തൊഴിലാളികൾക്ക് കടലിലേക്കുള്ള സ്വാഭാവിക പ്രവേശനം നഷ്ടപ്പെടാൻ ഇടയാക്കുമെന്നും പ്രതിപക്ഷ നേതാവ് പറഞ്ഞു. കടലിനെ ആശ്രയിച്ച് ജീവിക്കുന്ന രണ്ടുലക്ഷത്തിലധികം കുടുംബങ്ങളെ ഇത് ഗുരുതരമായി ബാധിക്കുമെന്നും തൊഴിൽ നഷ്ടപ്പെടുന്ന സാഹചര്യം സൃഷ്ടിക്കുമെന്നും അദ്ദേഹം മുന്നറിയിപ്പ് നൽകി.
തീരദേശത്തെ ധാതുസമ്പത്ത് ചൂഷണം ചെയ്യാൻ സ്വകാര്യ ശക്തികൾക്ക് അവസരമൊരുക്കുന്നതാണ് ബില്ലെന്നും പൊതുചെലവിൽ കോർപ്പറേറ്റ് താൽപര്യങ്ങൾക്ക് വഴിതുറക്കുകയാണെന്നും പ്രതിപക്ഷം ആരോപിച്ചു. തീരദേശ ഭൂമി സ്വകാര്യ സ്ഥാപനങ്ങളുടെ നിയന്ത്രണത്തിലാകുമെന്ന ആശങ്കയും പ്രതിപക്ഷ നേതാവ് സഭയിൽ ഉന്നയിച്ചു.
വികസനത്തിനായി സ്വകാര്യ നിക്ഷേപം അനിവാര്യമാണെന്ന സർക്കാർ നിലപാടും തീരദേശവാസികളുടെ അവകാശങ്ങൾ സംരക്ഷിക്കണമെന്ന പ്രതിപക്ഷത്തിന്റെ വാദവും ഏറ്റുമുട്ടിയതോടെയാണ് ബിൽ നിയമസഭയിൽ കടുത്ത രാഷ്ട്രീയ തർക്കത്തിന് വഴിവച്ചത്. ഒടുവിൽ ബിൽ പാസായതോടെ പ്രതിഷേധിച്ച് പ്രതിപക്ഷം സഭ വിട്ടിറങ്ങി.