വാഷിംഗ്ടൺ: ഭൂമിക്ക് പുറത്ത് പ്രപഞ്ചത്തിൽ എവിടെയെങ്കിലും ജീവന്റെ സാന്നിധ്യമുണ്ടോ എന്ന കാലങ്ങളായുള്ള മനുഷ്യന്റെ അന്വേഷണത്തിന് കൂടുതൽ കൃത്യതയും വേഗതയും നൽകുന്ന നിർണ്ണായക ശാസ്ത്ര മുന്നേറ്റം. പ്രമുഖ വീസ്മാൻ ഇൻസ്റ്റിറ്റ്യൂട്ടിലെ ശാസ്ത്രജ്ഞനായ ഗിഡിയോൺ യോഫെയുടെ നേതൃത്വത്തിൽ നടത്തിയ പുതിയ ഗവേഷണമാണ് ഭൗമാതീത ജീവനെ കണ്ടെത്താനുള്ള ശാസ്ത്രീയ തിരച്ചിലിൽ വിപ്ലവകരമായ മാറ്റങ്ങൾക്ക് വഴിവെക്കുന്നത്. ശാസ്ത്രമാസികയായ ‘നാച്ചുറൽ അസ്ട്രോണമി’യിലാണ് ഈ പുതിയ പഠന റിപ്പോർട്ട് പ്രസിദ്ധീകരിച്ചിരിക്കുന്നത്.
ജീവന്റെ സാന്നിധ്യം കണ്ടെത്താൻ ഇതുവരെ ശാസ്ത്രജ്ഞർ പ്രധാനമായും അമിനോ ആസിഡുകൾ, ഫാറ്റി ആസിഡുകൾ പോലുള്ള ബയോസിഗ്നേച്ചർ അണുക്കളെയായിരുന്നു പരിശോധിച്ചിരുന്നത്. എന്നാൽ, ജീവന്റെ സാന്നിധ്യമില്ലാത്ത സ്വാഭാവിക രാസപ്രവർത്തനങ്ങളിലൂടെയും ഇത്തരം രാസപദാർത്ഥങ്ങൾ രൂപപ്പെടാൻ സാധ്യതയുള്ളതിനാൽ അവയെ മാത്രം അടിസ്ഥാനമാക്കിയുള്ള നിഗമനങ്ങൾ പൂർണ്ണമായി വിശ്വസനീയമല്ലെന്ന് ഗവേഷകർ ചൂണ്ടിക്കാണിക്കുന്നു. ഇതിനൊരു പരിഹാരമെന്ന നിലയിലാണ് പുതിയ പഠനം വികസിപ്പിച്ചിരിക്കുന്നത്. അണുക്കളുടെ സാന്നിധ്യം മാത്രം നോക്കാതെ, അവ എങ്ങനെ ക്രമീകരിക്കപ്പെട്ടിരിക്കുന്നുവെന്നും അവയുടെ വൈവിധ്യം എത്രത്തോളമുണ്ടെന്നും വിലയിരുത്തുന്ന പുതിയ രീതിയാണ് ഈ പഠനം നിർദ്ദേശിക്കുന്നത്. ഇതിനായി ആസ്റ്ററോയിഡുകൾ, ഉൽക്കകൾ, സൂക്ഷ്മജീവികൾ, മണ്ണ്, ഫോസിലുകൾ എന്നിവ ഉൾപ്പെടെ നൂറോളം വിവിധ സാമ്പിളുകൾ ഗവേഷകർ വിശദമായ പരിശോധനയ്ക്ക് വിധേയമാക്കി.
ജീവജാലങ്ങൾ നിർമ്മിക്കുന്ന അമിനോ ആസിഡുകൾക്ക് വളരെ ഉയർന്ന വൈവിധ്യവും പ്രത്യേകമായ ക്രമബദ്ധതയുമുണ്ടെന്നാണ് ഗവേഷകരുടെ പ്രധാന കണ്ടെത്തൽ. അതേസമയം, ജീവികളുമായി ബന്ധമില്ലാത്ത ഫാറ്റി ആസിഡുകൾ കുറഞ്ഞ വൈവിധ്യവും അസമമായ വിതരണവുമാണ് കാണിച്ചത്. കോടിക്കണക്കിന് വർഷങ്ങൾ കഴിഞ്ഞ് കേടുപാടുകൾ സംഭവിച്ച സാമ്പിളുകളിലും ദിനോസർ മുട്ടകളുടെ ഫോസിലുകളിലും ഈ പ്രത്യേക പാറ്റേണുകൾ നിലനിൽക്കുന്നതായി പഠനം തെളിയിച്ചു. ഇത് മുൻപ് ജീവനുണ്ടായിരുന്നു എന്ന് കരുതപ്പെടുന്ന ചൊവ്വാ ഗ്രഹത്തിലെ പുരാതന സൂക്ഷ്മജീവികളുടെ തെളിവുകൾ കൂടുതൽ കൃത്യതയോടെ കണ്ടെത്താൻ ശാസ്ത്രലോകത്തെ സഹായിക്കും.
അമേരിക്കൻ ബഹിരാകാശ ഏജൻസിയായ നാസയുടെ വിഖ്യാത ‘യൂറോപ്പ ക്ലിപ്പർ’ (Europa Clipper) ദൗത്യത്തിനും ഈ പുതിയ സാങ്കേതികവിദ്യ ഏറെ സഹായകരമാകും എന്നാണ് വിലയിരുത്തപ്പെടുന്നത്. വ്യാഴത്തിന്റെ ഉപഗ്രഹമായ യൂറോപ്പയെ ലക്ഷ്യമാക്കി കുതിക്കുന്ന നാസയുടെ പേടകം 2030-31 കാലയളവിൽ അവിടെയെത്തുമെന്നാണ് പ്രതീക്ഷിക്കുന്നത്. യൂറോപ്പയുടെ കട്ടിയേറിയ മഞ്ഞുപാളികൾക്ക് അടിയിൽ ഭൂമിയിലെ സമുദ്രങ്ങളെക്കാൾ ഇരട്ടിയിലധികം ജലസാന്നിധ്യമുള്ള വലിയൊരു സമുദ്രം ഉണ്ടെന്നാണ് ശാസ്ത്രജ്ഞരുടെ വിശ്വാസം. അതുകൊണ്ടുതന്നെ പ്രപഞ്ചത്തിൽ ജീവൻ നിലനിൽക്കാൻ ഏറ്റവും സാധ്യതയുള്ള ഗ്രഹോപഗ്രഹങ്ങളിലൊന്നായാണ് യൂറോപ്പയെ കണക്കാക്കുന്നത്. യൂറോപ്പ ക്ലിപ്പർ പേടകം ഉപഗ്രഹത്തിന്റെ ഉപരിതലത്തിൽ നിന്നുള്ള ഐസ് കണങ്ങൾ ശേഖരിച്ച് വിശകലനം ചെയ്യുമ്പോൾ, ഈ പുതിയ ബയോസിഗ്നേച്ചർ രീതി ഉപയോഗിച്ച് അവിടുത്തെ അമിനോ ആസിഡുകളുടെ ഘടന പരിശോധിച്ച് അന്യഗ്രഹ ജീവന്റെ സാന്നിധ്യം പിഴവുകളില്ലാതെ സ്ഥിരീകരിക്കാൻ സാധിക്കുമെന്ന വലിയ പ്രതീക്ഷയിലാണ് ശാസ്ത്രലോകം.