എസ്‌യുവി വിപണിയിൽ വീണ്ടും സ്കോർപിയോ മുന്നിൽ; ഹാരിയറിന് കുതിപ്പ്, ഫോർച്യൂണറിന് ഇടിവ്

ഇന്ത്യൻ വാഹന വിപണിയിൽ 4.5 മുതൽ 4.8 മീറ്റർ വരെയുള്ള എസ്‌യുവി വിഭാഗത്തിൽ മത്സരം കടുക്കുമ്പോൾ 2026 ഏപ്രിലിലും മുന്നേറ്റം തുടരുകയാണ് മഹീന്ദ്ര സ്കോർപിയോ. മാസത്തിലെ വിൽപ്പനയിൽ ഒന്നാം സ്ഥാനം നിലനിർത്തിയെങ്കിലും വാർഷിക കണക്കിൽ സ്കോർപിയോയ്ക്ക് നേരിയ ഇടിവാണ് രേഖപ്പെടുത്തിയത്.

കഴിഞ്ഞ മാസം സ്കോർപിയോയുടെ 14,719 യൂണിറ്റുകളാണ് വിറ്റഴിഞ്ഞത്. എന്നാൽ 2025 ഏപ്രിലിനെ അപേക്ഷിച്ച് 5.25 ശതമാനത്തിന്റെ കുറവ് രേഖപ്പെടുത്തി. കഴിഞ്ഞ വർഷം ഇതേ കാലയളവിൽ 15,534 യൂണിറ്റുകളായിരുന്നു വിൽപ്പന.

രണ്ടാം സ്ഥാനത്ത് എത്തിയ മഹീന്ദ്ര XUV 7XO മികച്ച വളർച്ചയാണ് രേഖപ്പെടുത്തിയത്. ഏപ്രിലിൽ 8,630 യൂണിറ്റുകളുടെ വിൽപ്പനയോടെ 26.71 ശതമാനം വാർഷിക വർധനവാണ് മോഡൽ നേടിയത്. മൂന്നാം സ്ഥാനത്ത് മഹീന്ദ്ര XEV 9S ഇടംപിടിച്ചു. ഈ മോഡലിന്റെ 3,242 യൂണിറ്റുകളാണ് വിറ്റഴിഞ്ഞത്.

ഏറ്റവും വലിയ വളർച്ച നേടിയത് ടാറ്റ ഹാരിയറാണ്. 2,545 യൂണിറ്റുകളുടെ വിൽപ്പനയോടെ 151.48 ശതമാനം വാർഷിക വളർച്ച രേഖപ്പെടുത്തി ഹാരിയർ നാലാം സ്ഥാനത്തെത്തി.

അതേസമയം, ടൊയോട്ട ഫോർച്യൂണറിന് വിൽപ്പനയിൽ ഇടിവ് നേരിട്ടു. 2,253 യൂണിറ്റുകൾ വിറ്റഴിച്ചെങ്കിലും കഴിഞ്ഞ വർഷത്തെ അപേക്ഷിച്ച് 22.42 ശതമാനം കുറവാണ് രേഖപ്പെടുത്തിയത്. മഹീന്ദ്ര XEV 9e ആറാം സ്ഥാനത്ത് എത്തിയപ്പോൾ ഈ മോഡലിനും വാർഷിക അടിസ്ഥാനത്തിൽ ഇടിവ് അനുഭവപ്പെട്ടു.

ടാറ്റ സഫാരി 1,467 യൂണിറ്റുകളുടെ വിൽപ്പനയോടെ 9.48 ശതമാനം വളർച്ച നേടി ഏഴാം സ്ഥാനത്തെത്തി. എംജി ഹെക്ടർ 1,297 യൂണിറ്റുകളുടെ വിൽപ്പനയുമായി എട്ടാം സ്ഥാനവും 32.75 ശതമാനം വളർച്ചയും സ്വന്തമാക്കി.

ഹ്യുണ്ടായി അൽകാസർ ഒമ്പതാം സ്ഥാനത്തെത്തി. എന്നാൽ വിൽപ്പനയിൽ 16.42 ശതമാനത്തിന്റെ വാർഷിക ഇടിവാണ് രേഖപ്പെടുത്തിയത്. എസ്‌യുവി വിപണിയിൽ ഉപഭോക്താക്കളുടെ മുൻഗണന മാറിക്കൊണ്ടിരിക്കുമ്പോൾ വരും മാസങ്ങളിലും മത്സരം കൂടുതൽ കടുക്കുമെന്നാണ് വിലയിരുത്തൽ.