തിരുവനന്തപുരം: യുഡിഎഫ് സർക്കാരിന്റെ ആദ്യ നയപ്രഖ്യാപന പ്രസംഗത്തിൽ വിദ്യാർത്ഥിനികൾക്ക് മൂന്ന് ദിവസത്തെ ആർത്തവ അവധി അനുവദിക്കുമെന്ന് പ്രഖ്യാപനം. നിയമസഭയിൽ ഗവർണർ രാജേന്ദ്ര വിശ്വനാഥ് അർലേക്കർ അവതരിപ്പിച്ച നയപ്രഖ്യാപന പ്രസംഗത്തിലൂടെയാണ് സർക്കാർ തീരുമാനം അറിയിച്ചത്. വിദ്യാർത്ഥിനികളുടെ ആരോഗ്യവും മാനസിക സൗകര്യവും മുൻനിർത്തിയുള്ള നടപടിയായാണ് ഇതിനെ സർക്കാർ വിശേഷിപ്പിക്കുന്നത്.
വിദ്യാഭ്യാസ മേഖലയെ കേന്ദ്രീകരിച്ച് നിരവധി പ്രഖ്യാപനങ്ങളാണ് നയപ്രഖ്യാപനത്തിൽ ഉൾപ്പെട്ടത്. ഉന്നത വിദ്യാഭ്യാസ മേഖലയെ രാജ്യാന്തര നിലവാരത്തിലുള്ള മികവിന്റെ കേന്ദ്രങ്ങളാക്കി മാറ്റുമെന്നും സർക്കാർ വ്യക്തമാക്കി. ഗവേഷണ പ്രവർത്തനങ്ങൾ ശക്തിപ്പെടുത്തുന്നതിനും സർവകലാശാലകളുടെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും പ്രത്യേക പദ്ധതികൾ നടപ്പാക്കുമെന്നും പ്രസംഗത്തിൽ സൂചിപ്പിച്ചു.
സംസ്ഥാനത്തെ എല്ലാ ജില്ലകളിലും ആവശ്യത്തിന് പ്ലസ് വൺ സീറ്റുകൾ അനുവദിക്കുമെന്നും ഗവർണർ അറിയിച്ചു. ഓരോ വർഷവും പ്ലസ് വൺ പ്രവേശന സമയത്ത് ഉയരുന്ന സീറ്റ് ക്ഷാമ പ്രശ്നത്തിന് സ്ഥിരപരിഹാരം കാണുക എന്ന ലക്ഷ്യത്തോടെയാണ് പുതിയ തീരുമാനം.
വിദ്യാർത്ഥികൾക്ക് കൂടുതൽ പഠനസൗകര്യങ്ങളും സാങ്കേതിക പിന്തുണയും ഉറപ്പാക്കുന്ന പദ്ധതികളും സർക്കാർ നടപ്പിലാക്കുമെന്ന് നയപ്രഖ്യാപനത്തിൽ വ്യക്തമാക്കിയിട്ടുണ്ട്. വിദ്യാഭ്യാസ മേഖലയെ കൂടുതൽ ഉൾക്കൊള്ളുന്നതും വിദ്യാർത്ഥിസൗഹൃദവുമാക്കാനുള്ള നീക്കങ്ങളുടെ ഭാഗമായാണ് പുതിയ പ്രഖ്യാപനങ്ങളെ വിലയിരുത്തുന്നത്.