മുംബൈ: പ്രതിഷേധിക്കുക എന്നത് ദേശവിരുദ്ധതയല്ലെന്നും വിദ്യാർത്ഥികൾക്ക് പ്രതിഷേധിക്കാനുള്ള അവകാശമുണ്ടെന്നും ആർഎസ്എസ് മേധാവി മോഹൻ ഭാഗവത് വ്യക്തമാക്കി. മുംബൈയിലെ നിതാ മുകേഷ് അംബാനി കൾച്ചറൽ സെന്ററിൽ നടന്ന ഐഐഎംയുഎൻ (IIMUN) വാർഷിക ചാമ്പ്യൻഷിപ്പ് കോൺഫറൻസിന്റെ ഉദ്ഘാടന ചടങ്ങിൽ ജെൻ സിയെയും ജനറേഷൻ ആൽഫയെയും അഭിസംബോധന ചെയ്ത് സംസാരിക്കവെയായിരുന്നു അദ്ദേഹത്തിന്റെ പരാമർശം.
മറ്റ് തലമുറകളെ അപേക്ഷിച്ച് യുവാക്കൾ കൂടുതൽ സത്യസന്ധരാണെന്ന് മോഹൻ ഭാഗവത് പറഞ്ഞു. യുവാക്കളുടെ പ്രതിഷേധവും അവരുടെ ആശങ്കകളും യഥാർഥമായിരുന്നുവെന്നും, മികച്ച സംവിധാനത്തിനായുള്ള പ്രതിഷേധം അംഗീകരിക്കപ്പെടേണ്ടതാണെന്നും അദ്ദേഹം ചൂണ്ടിക്കാട്ടി.
പ്രതിഷേധം സംവാദത്തിലേക്കുള്ള ഒരു മാർഗമാണെന്ന് അദ്ദേഹം പറഞ്ഞു. പരസ്പര കാഴ്ചപ്പാടുകൾ മനസ്സിലാക്കാൻ സംവാദം സഹായിക്കുമെന്നും, പ്രശ്നങ്ങൾക്ക് പരിഹാരം ലഭിക്കാതെ വന്നാൽ അതിന്റെ അടിയന്തരത ചൂണ്ടിക്കാട്ടി ശബ്ദമുയർത്തുന്നത് സ്വാഭാവികമാണെന്നും അദ്ദേഹം വ്യക്തമാക്കി.
ജനാധിപത്യത്തിൽ പ്രതിഷേധം ഏകാഭിപ്രായം രൂപപ്പെടുത്താനുള്ള ഒരു ഉപാധിയാണെന്നും മോഹൻ ഭാഗവത് പറഞ്ഞു. വിവിധ അഭിപ്രായങ്ങൾ ചർച്ചകളിലൂടെ സമവായത്തിലേക്ക് എത്തണം. എന്നാൽ ആശങ്കകൾ കേൾക്കപ്പെടാതെ പോകുമ്പോഴാണ് പ്രക്ഷോഭങ്ങൾ ഉയരുന്നത്. ഈ പ്രക്രിയ സമൂഹത്തിൽ വിഭജനമല്ല, മറിച്ച് ഏകാഭിപ്രായം വളർത്താനായിരിക്കണമെന്നും അദ്ദേഹം കൂട്ടിച്ചേർത്തു.
വിദ്യാഭ്യാസം ഒരു കച്ചവടമല്ലെന്നും അത് സമൂഹത്തിന്റെ ഉത്തരവാദിത്വമാണെന്നും അദ്ദേഹം പറഞ്ഞു. വിദ്യാഭ്യാസ മേഖലയ്ക്കായി ബജറ്റിൽ കൂടുതൽ തുക മാറ്റിവെക്കണമെന്നും അദ്ദേഹം ആവശ്യപ്പെട്ടു. പെല്ലറ്റ് ആക്രമണങ്ങളെ കുറിച്ച് സംസാരിക്കവെ, അന്നത്തെ സംഭവങ്ങളെക്കുറിച്ച് കൃത്യമായ വിവരങ്ങൾ ലഭ്യമായിരുന്നില്ലെന്നും അദ്ദേഹം പറഞ്ഞു.
മറ്റ് രാജ്യങ്ങളെ കീഴടക്കുക എന്നത് ഇന്ത്യയുടെ നയമല്ലെന്നും പാകിസ്താനുമായും ചൈനയുമായും ശാശ്വത വൈരാഗ്യം വേണ്ടതില്ലെന്നും അദ്ദേഹം അഭിപ്രായപ്പെട്ടു. ഭീകരവാദം ഒരുതരത്തിലുള്ള യുദ്ധമാണെന്നും അദ്ദേഹം ചൂണ്ടിക്കാട്ടി.
സംവരണം തുടരുമെന്നും സാമൂഹിക അസമത്വം നിലനിൽക്കുന്നിടത്തോളം അതിന്റെ ആവശ്യകത അവസാനിക്കില്ലെന്നും മോഹൻ ഭാഗവത് വ്യക്തമാക്കി. സാമൂഹിക നീതിയും ഐക്യവും ഉറപ്പാക്കുന്നതിനാണ് സംവരണമെന്നും അദ്ദേഹം പറഞ്ഞു.
LGBTQIA+ സമൂഹവും ഇന്ത്യൻ സമൂഹത്തിന്റെ ഭാഗമാണെന്ന് അദ്ദേഹം പറഞ്ഞു. സ്വവർഗ ബന്ധത്തിന് പ്രത്യേക നിയമപരമായ അംഗീകാരം നൽകണമെന്നും കുടുംബമാണ് വിവാഹത്തിന്റെ അടിസ്ഥാനമെന്നും നിലവിലുള്ള നിയമങ്ങൾ സമൂഹം രൂപപ്പെടുത്തിയതാണെന്നും അദ്ദേഹം അഭിപ്രായപ്പെട്ടു.
ഇന്ത്യയുടെ ഇന്റർനാഷണൽ മൂവ്മെന്റ് ടു യൂണൈറ്റ് നേഷൻസ് (IIMUN)യുടെ 15-ാം വാർഷികാഘോഷത്തിന്റെ ഭാഗമായാണ് വാർഷിക ചാമ്പ്യൻഷിപ്പ് കോൺഫറൻസ് സംഘടിപ്പിച്ചത്. രാജ്യത്തെ 100-ലധികം നഗരങ്ങളിൽ നിന്നുള്ള 2,000-ത്തിലധികം വിദ്യാർഥികൾ പങ്കെടുത്ത സമ്മേളനത്തിൽ 15 മുതൽ 19 വയസ് വരെയുള്ള വിദ്യാർഥികളാണ് വിവിധ സ്കൂളുകളെയും കോളേജുകളെയും പ്രതിനിധീകരിച്ച് പങ്കെടുത്തത്. യുവജനങ്ങളുടെ നേതൃത്വത്തിൽ സംഘടിപ്പിക്കുന്ന രാജ്യത്തെ ഏറ്റവും വലിയ വിദ്യാർഥി സംഗമങ്ങളിലൊന്നായാണ് ഈ സമ്മേളനം വിലയിരുത്തപ്പെടുന്നത്.