ലാഹോർ: ജപ്പാനിലെ ഐച്ചി-നാഗോയയിൽ നടക്കാനിരിക്കുന്ന ഏഷ്യൻ ഗെയിംസിനുള്ള പാകിസ്ഥാൻ ക്രിക്കറ്റ് ടീമിനെ പ്രഖ്യാപിച്ചു. മുൻനിര താരങ്ങളായ ബാബർ അസം, ഷഹീൻ ഷാ അഫ്രീദി, സൽമാൻ അലി ആഗ, ഷദാബ് ഖാൻ എന്നിവരെ ഒഴിവാക്കിയാണ് 15 അംഗ ടീമിനെ പാകിസ്ഥാൻ പ്രഖ്യാപിച്ചിരിക്കുന്നത്.
ഓപ്പണർ സാഹിബ്സാദ ഫർഹാനാണ് ടീമിനെ നയിക്കുക. അബ്ദുൾ സമദ് വൈസ് ക്യാപ്റ്റനാകും. സെപ്റ്റംബർ 19ന് ആരംഭിക്കുന്ന ഏഷ്യൻ ഗെയിംസിൽ ക്രിക്കറ്റ് മത്സരങ്ങൾ സെപ്റ്റംബർ 24നാണ് തുടങ്ങുന്നത്. ഒക്ടോബർ 3നാണ് മെഡൽ മത്സരങ്ങൾ നടക്കുക.
യുവതാരങ്ങൾക്ക് പ്രാമുഖ്യം നൽകിയിരിക്കുന്ന ടീമിൽ 30-കാരനായ സാഹിബ്സാദ ഫർഹാനാണ് ഏറ്റവും പരിചയസമ്പന്നനായ താരം. പാകിസ്ഥാനായി 46 ടി20 മത്സരങ്ങളിൽ നിന്ന് രണ്ട് സെഞ്ചുറികളും 10 അർധസെഞ്ചുറികളും ഉൾപ്പെടെ 1,305 റൺസ് ഫർഹാൻ നേടിയിട്ടുണ്ട്. 2026 ടി20 ലോകകപ്പിൽ പാകിസ്ഥാന്റെ ടോപ് സ്കോററുമായിരുന്നു അദ്ദേഹം.
ആകിഫ് ജാവേദ്, അലി റാസ, മാസ് സദാഖത്, സാദ് മസൂദ് എന്നിവരാണ് ടീമിലെ പുതുമുഖങ്ങൾ. വിക്കറ്റ് കീപ്പറായി ഉസ്മാൻ ഖാൻ ടീമിലിടം നേടിയിട്ടുണ്ട്.
അബ്രാർ അഹമ്മദ്, അഹമ്മദ് ഡാനിയൽ, അരാഫത് മിൻഹാസ്, ഹൈദർ അലി, ഹസൻ നവാസ്, മുഹമ്മദ് സൽമാൻ മിർസ, സയിം അയൂബ്, സുഫ്യാൻ മുഖീം എന്നിവരാണ് ടീമിലെ മറ്റ് അംഗങ്ങൾ.
2023-ലെ ഏഷ്യൻ ഗെയിംസിൽ പാകിസ്ഥാൻ നാലാം സ്ഥാനത്താണ് ഫിനിഷ് ചെയ്തത്.
ഏഷ്യൻ ഗെയിംസിനുള്ള പാകിസ്ഥാൻ ടീം:
സാഹിബ്സാദ ഫർഹാൻ (ക്യാപ്റ്റൻ), അബ്ദുൾ സമദ് (വൈസ് ക്യാപ്റ്റൻ), അബ്രാർ അഹമ്മദ്, അഹമ്മദ് ഡാനിയൽ, ആകിഫ് ജാവേദ്, അലി റാസ, അരാഫത് മിൻഹാസ്, ഹൈദർ അലി, ഹസൻ നവാസ്, മാസ് സദാഖത്, മുഹമ്മദ് സൽമാൻ മിർസ, സാദ് മസൂദ്, സയിം അയൂബ്, സുഫ്യാൻ മുഖീം, ഉസ്മാൻ ഖാൻ (വിക്കറ്റ് കീപ്പർ).