‘മുൻകൂട്ടി കാൻസറുണ്ടായിരുന്നുവെന്ന്’ പറഞ്ഞ് ക്ലെയിം തള്ളി; ഇൻഷുറൻസ് കമ്പനിക്ക് തിരിച്ചടി, ചികിത്സാച്ചെലവും നഷ്ടപരിഹാരവും നൽകാൻ കോടതി

സ്തനാർബുദ ചികിത്സയ്ക്കുള്ള ആരോഗ്യ ഇൻഷുറൻസ് ക്ലെയിം മുൻകൂട്ടി രോഗമുണ്ടായിരുന്നുവെന്ന കാരണം ചൂണ്ടിക്കാട്ടി നിഷേധിച്ച ഇൻഷുറൻസ് കമ്പനിക്ക് ഉപഭോക്തൃ കോടതിയുടെ തിരിച്ചടി. മുൻകൂർ രോഗമുണ്ടായിരുന്നുവെന്നതിന് വ്യക്തമായ തെളിവില്ലെന്ന് കണ്ടെത്തിയ കോടതി, പരാതിക്കാരന് ചികിത്സാച്ചെലവും നഷ്ടപരിഹാരവും പലിശ സഹിതം നൽകാൻ ഉത്തരവിട്ടു.

ഹിമാചൽ പ്രദേശിലെ സോളൻ ഉപഭോക്തൃ തർക്കപരിഹാര കമ്മീഷനാണ് ആരോഗ്യ ഇൻഷുറൻസ് കമ്പനിക്കെതിരെ നിർണായക വിധി പുറപ്പെടുവിച്ചത്. മുൻകൂട്ടി സ്തനാർബുദം ഉണ്ടായിരുന്നുവെന്ന ആരോപണം അടിസ്ഥാനരഹിതമാണെന്ന് വിലയിരുത്തിയ കോടതി പരാതിക്കാരന് ആകെ 1.3 ലക്ഷം രൂപ നൽകാൻ നിർദേശിച്ചു.

2022 നവംബർ 3-നാണ് പരാതിക്കാരൻ 17,970 രൂപ പ്രീമിയം അടച്ച് അഞ്ച് ലക്ഷം രൂപ പരിരക്ഷയുള്ള ആരോഗ്യ ഇൻഷുറൻസ് പോളിസി എടുത്തത്. അദ്ദേഹത്തിനും ഭാര്യക്കും രണ്ട് പെൺമക്കൾക്കും 2023 നവംബർ 2 വരെ പോളിസി പരിരക്ഷ ലഭിച്ചിരുന്നു.

പിന്നീട് ഭാര്യയ്ക്ക് ഇടത് സ്തനത്തിൽ വേദനയും അസ്വസ്ഥതയും അനുഭവപ്പെട്ടതിനെ തുടർന്ന് ആശുപത്രിയിൽ പ്രവേശിപ്പിച്ചു. തുടർപരിശോധനയ്ക്കായി ചണ്ഡീഗഡിലെ പി.ജി.ഐ.എം.ഇ.ആറിലേക്ക് മാറ്റിയപ്പോൾ സ്തനാർബുദമാണെന്ന് സ്ഥിരീകരിച്ചു.

ചികിത്സയ്ക്കായി അഞ്ച് ലക്ഷത്തോളം രൂപ സ്വന്തം കൈയിൽ നിന്ന് ചെലവായതായി പരാതിക്കാരൻ അറിയിച്ചു. എന്നാൽ ക്യാഷ്‌ലെസ് ചികിത്സാ സൗകര്യവും പിന്നീട് റീഇംബഴ്‌സ്‌മെന്റും നൽകാൻ ഇൻഷുറൻസ് കമ്പനി തയ്യാറായില്ല.

2021 മെയ് 15-ലെ അൾട്രാസൗണ്ട് റിപ്പോർട്ട് ചൂണ്ടിക്കാട്ടി പോളിസി എടുക്കുന്നതിന് മുമ്പ് തന്നെ രോഗം ഉണ്ടായിരുന്നുവെന്നും അത് മറച്ചുവെച്ചാണ് ഇൻഷുറൻസ് എടുത്തതെന്നും കമ്പനി വാദിച്ചു. ഇതിന്റെ അടിസ്ഥാനത്തിലാണ് ക്ലെയിം തള്ളിയത്.

എന്നാൽ ഈ വാദം തെളിയിക്കാൻ സ്വതന്ത്ര അന്വേഷണ റിപ്പോർട്ടോ മറ്റ് വ്യക്തമായ തെളിവുകളോ കമ്പനി ഹാജരാക്കിയിട്ടില്ലെന്ന് കോടതി നിരീക്ഷിച്ചു. പരാതിക്കാരൻ മെഡിക്കൽ ബില്ലുകൾ സമർപ്പിച്ചിരുന്നില്ലെങ്കിലും കമ്പനി തന്നെ കോടതിയിൽ നൽകിയ രേഖകളുടെ അടിസ്ഥാനത്തിൽ 80,439 രൂപ ചികിത്സാച്ചെലവായി നൽകാൻ കോടതി ഉത്തരവിട്ടു.

ഈ തുകയ്ക്ക് പരാതി നൽകിയ ദിവസം മുതൽ 9 ശതമാനം പലിശയും നൽകണം. കൂടാതെ മാനസിക ബുദ്ധിമുട്ടുണ്ടാക്കിയതിന് 30,000 രൂപയും കോടതിച്ചെലവായി 20,000 രൂപയും നൽകണമെന്നും കോടതി നിർദേശിച്ചു. 30 ദിവസത്തിനകം മുഴുവൻ തുകയും നൽകണമെന്നും ഉത്തരവിൽ വ്യക്തമാക്കിയിട്ടുണ്ട്.

പോളിസി കാലയളവിൽ ലഭിക്കേണ്ട ന്യായമായ ക്ലെയിമുകൾ നൽകുക ഇൻഷുറൻസ് കമ്പനികളുടെ ബാധ്യതയാണെന്ന് ഈ വിധി വീണ്ടും വ്യക്തമാക്കുന്നു. മതിയായ രേഖകൾ നൽകിയിട്ടും അന്യായമായി ക്ലെയിം നിഷേധിക്കപ്പെട്ടാൽ ഉപഭോക്താക്കൾക്ക് നിയമപരമായി അത് ചോദ്യം ചെയ്യാനുള്ള അവകാശമുണ്ടെന്നും കോടതി നിരീക്ഷിച്ചു. സഹായത്തിനായി സംസ്ഥാന ഉപഭോക്തൃ ഹെൽപ്‌ലൈനിലോ ദേശീയ ഉപഭോക്തൃ ഹെൽപ്‌ലൈൻ നമ്പറായ 1915-ലോ ബന്ധപ്പെടാമെന്നും അറിയിച്ചു.