തിരുവനന്തപുരം: വിവാദപരമായ മൈക്രോ ഫിനാൻസ് തട്ടിപ്പ് കേസിൽ എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശന് പ്രോസിക്യൂഷൻ അനുമതി നൽകാനാവില്ലെന്ന നിർണ്ണായക നിലപാടുമായി സർക്കാർ. കേസിൽ പ്രോസിക്യൂഷൻ അനുമതി നൽകാൻ തങ്ങൾക്ക് അധികാരമില്ലെന്ന് വ്യക്തമാക്കി പിന്നോക്ക വിഭാഗ ക്ഷേമ വകുപ്പ് സെക്രട്ടറി പുറപ്പെടുവിച്ച ഉത്തരവിന്റെ പകർപ്പ് പുറത്തുവന്നു. നിയമപരമായി അനുമതി നൽകേണ്ട നിയമാധികാരി വകുപ്പല്ലെന്ന ന്യായീകരണമാണ് സർക്കാർ ഉയർത്തുന്നത്.
അതേസമയം, പ്രോസിക്യൂഷൻ അനുമതിയുടെ കാര്യത്തിൽ സർക്കാരും വിജിലൻസും പരസ്പരവിരുദ്ധവും വിചിത്രവുമായ നിലപാടുകൾ സ്വീകരിച്ചതിനെതിരെ ഹൈക്കോടതി കടുത്ത അമർഷം രേഖപ്പെടുത്തി. പ്രോസിക്യൂഷൻ അനുമതി ആവശ്യമില്ലെന്ന് പിന്നോക്ക വിഭാഗ വകുപ്പ് അഡീഷണൽ ചീഫ് സെക്രട്ടറിയും, എന്നാൽ ഉദ്യോഗസ്ഥർ ഉൾപ്പെട്ട കേസിൽ അനുമതി വേണമെന്ന് വിജിലൻസ് അഭിഭാഷകനും കോടതിയെ അറിയിച്ചതാണ് ജസ്റ്റിസ് ബദറുദ്ദീന്റെ കടുത്ത വിമർശനത്തിന് വഴിവെച്ചത്.
“ആരാണ് സർക്കാരിന് ഇത്തരത്തിൽ നിയമോപദേശം നൽകുന്നത്?” എന്ന് ആശ്ചര്യത്തോടെ ചോദിച്ച ഹൈക്കോടതി, സർക്കാരിനുവേണ്ടി ഹാജരായ വിജിലൻസ് അഭിഭാഷകൻ ഈ പദവിയിൽ ഇരിക്കാൻ പോലും യോഗ്യനല്ലെന്ന് കുറ്റപ്പെടുത്തി. സ്വാധീനമുള്ള വ്യക്തികൾ ഉൾപ്പെടുന്ന ഇത്തരം കേസുകളിൽ അനാസ്ഥ കാണിക്കുന്നത് അംഗീകരിക്കാനാകില്ലെന്നും കോടതി വ്യക്തമാക്കി. ഒടുവിൽ, വിഷയത്തിൽ വ്യക്തമായ ഔദ്യോഗിക നിലപാട് അറിയിക്കാൻ സംസ്ഥാന സർക്കാരിനോട് നിർദ്ദേശിച്ച കോടതി, ഹർജി മാറ്റിവെച്ചു.