കോഴിക്കോട്: വാഹനാപകടത്തിൽ കൈവിരൽ നഷ്ടമായ യുവാവിന് പകരമായി കാലിലെ വിരൽ മാറ്റിവെച്ച് അപൂർവ ശസ്ത്രക്രിയ വിജയകരമായി പൂർത്തിയാക്കി. കോഴിക്കോട് നഗരത്തിലെ ഒരു സ്വകാര്യ ആശുപത്രിയിലാണ് ചികിത്സ നടന്നത്.
ആറുമാസം മുൻപ് ഉണ്ടായ വാഹനാപകടത്തിൽ 37 വയസുകാരന്റെ ഇടത് കൈയിലെ പ്രധാന വിരൽ പൂർണമായും വേർപെട്ട നിലയിലായിരുന്നു. അപകടത്തെ തുടർന്ന് കൈയുടെ പ്രവർത്തനക്ഷമത ഗണ്യമായി കുറയുകയും ദൈനംദിന ജീവിതത്തെ അത് പ്രതികൂലമായി ബാധിക്കുകയും ചെയ്തിരുന്നു.
തുടർന്നാണ് നഷ്ടമായ വിരലിന് പകരമായി കാലിലെ വിരൽ മാറ്റിവെക്കുന്ന ശസ്ത്രക്രിയയ്ക്ക് മെഡിക്കൽ സംഘം തീരുമാനിച്ചത്. ‘സെക്കൻഡ് ടോ-ടു-തമ്പ് ട്രാൻസ്ഫർ’ എന്ന സങ്കീർണ ശസ്ത്രക്രിയാ രീതിയിലൂടെയാണ് വിരൽ പുനഃസ്ഥാപിച്ചത്.
ശസ്ത്രക്രിയയ്ക്ക് മുൻപായി ഘട്ടംഘട്ടമായ പുനർനിർമാണ ചികിത്സ രോഗിക്ക് നൽകി. ആദ്യം പ്രത്യേക ശസ്ത്രക്രിയാ സാങ്കേതിക വിദ്യ ഉപയോഗിച്ച് കൈയിലെ മൃദുകോശങ്ങൾ പുനഃക്രമീകരിച്ചു. തുടർന്ന് മൈക്രോവാസ്കുലാർ ശസ്ത്രക്രിയയിലൂടെ കാലിലെ രണ്ടാം വിരൽ കൈയിലേക്ക് മാറ്റിസ്ഥാപിക്കുകയും രക്തക്കുഴലുകളും നാഡികളും പുനഃസംയോജിപ്പിക്കുകയും ചെയ്തു.
ശസ്ത്രക്രിയ വിജയകരമായി പൂർത്തിയായതായും രോഗിയുടെ ആരോഗ്യനില തൃപ്തികരമാണെന്നും ചികിത്സയ്ക്ക് നേതൃത്വം നൽകിയ ഡോക്ടർമാർ അറിയിച്ചു. കൈയുടെ പ്രവർത്തനക്ഷമത പരമാവധി വീണ്ടെടുക്കുന്നതിനായി ഫിസിയോതെറാപ്പിയും പുനരധിവാസ ചികിത്സയും തുടരുകയാണ്.
സങ്കീർണമായ മൈക്രോ സർജറി സാങ്കേതിക വിദ്യ ഉപയോഗിച്ച് നടത്തിയ ഈ ചികിത്സ രോഗിക്ക് സാധാരണ ജീവിതത്തിലേക്ക് മടങ്ങിവരാനുള്ള പ്രതീക്ഷ നൽകുന്നതാണെന്ന് മെഡിക്കൽ സംഘം വ്യക്തമാക്കി.