കേരളത്തിന്റെ പതിനാറാമത് നിയമസഭാ തെരഞ്ഞെടുപ്പ് ഫലം പുറത്തുവരുന്ന നിർണായക ദിനത്തിലേക്കാണ് സംസ്ഥാനം ഇന്ന് കടന്നുപോകുന്നത്. നാടിന്റെ നാഡീസ്പന്ദനങ്ങൾക്കൊപ്പം കണക്ക് കൂട്ടി പിടിച്ചും പ്രതീക്ഷകളും ആശങ്കകളും തമ്മിൽ ചേർന്ന് നിൽക്കുന്ന രാഷ്ട്രീയ കേരളം ഏറെ ആകാംക്ഷയോടെ കാത്തിരുന്നത് ഈ നിമിഷത്തിനായാണ്. അടുത്ത അഞ്ച് വർഷം കേരളത്തെ ആരാണ് നയിക്കുക എന്ന ചോദ്യത്തിന് ഇന്നാണ് ഉത്തരമെത്തുന്നത്. ഭരണത്തുടർച്ചയോ ഭരണ മാറ്റമോ, അതോ തൂക്കുസഭയോ; എന്തായാലും അത് ജനാധിപത്യത്തിന്റെ വിധിയാണ്, ജനത്തിന്റെ ശബ്ദമാണ്. സ്വതന്ത്രവും സുതാര്യവുമായ തെരഞ്ഞെടുപ്പ് പ്രക്രിയയാണ് നമ്മുടെ ജനാധിപത്യത്തിന്റെ അടിത്തറ. ഓരോ വോട്ടും ഒരു പൗരന്റെ വിശ്വാസവും പ്രതീക്ഷയും ആഗ്രഹവും ചേർന്നതാണ്. ആ വിശ്വാസത്തെ മാനിച്ചുകൊണ്ട് ഭരണവും ഭരണാധികാരികളും മുന്നോട്ട് പോകേണ്ടതുണ്ട്. ജനങ്ങൾ അഞ്ചുവർഷത്തേക്ക് അധികാരം ഏൽപ്പിക്കുന്ന ജനപ്രതിനിധികൾ അവരുടെ മണ്ഡലങ്ങളിലെ ജനങ്ങളുമായി ആത്മബന്ധം പുലർത്തി പ്രവർത്തിക്കുക എന്നത് ഒരു ഔപചാരിക ചുമതലയല്ല; അത് ഒരു നൈതിക ഉത്തരവാദിത്വമാണ്.
കേരളത്തിന്റെ രാഷ്ട്രീയ സംസ്കാരം എപ്പോഴും ശ്രദ്ധേയമായ ഒന്നാണ്. ശക്തമായ രാഷ്ട്രീയ മത്സരങ്ങൾക്കിടയിലും സൗഹാർദവും പരസ്പര ബഹുമാനവും നിലനിർത്താനുള്ള പാരമ്പര്യം ഇവിടെ നിലനിൽക്കുന്നു. എതിരാളികളെ ശത്രുക്കളായി കാണാതെ, അഭിപ്രായ വ്യത്യാസങ്ങളോടെ സഹജീവികളായി കാണുന്ന ഈ സമീപനമാണ് കേരള രാഷ്ട്രീയത്തെ വ്യത്യസ്തമാക്കുന്നത്. ഈ സംസ്കാരം കൂടുതൽ ശക്തിപ്പെടേണ്ടത് ഇന്നിന്റെ ആവശ്യമാണ്. ഒരു ശക്തമായ ഭരണപക്ഷം എത്രത്തോളം അനിവാര്യമാണോ, അത്രത്തോളം ശക്തമായ പ്രതിപക്ഷവും അനിവാര്യമാണ്. ജനങ്ങളുടെ ശബ്ദം നിയമസഭയിൽ മുഴങ്ങേണ്ടത് ഒരേയൊരു സ്വരത്തിൽ അല്ല, ബഹുസ്വരതയിലൂടെയാണ്.
ഭരണപക്ഷം തെറ്റുമ്പോൾ ചൂണ്ടിക്കാണിക്കുകയും, ശരിയായ നയങ്ങൾക്ക് പിന്തുണ നൽകുകയും ചെയ്യുന്ന സൃഷ്ടിപരമായ പ്രതിപക്ഷമാണ് ജനാധിപത്യത്തിന്റെ ആരോഗ്യത്തിന് ആവശ്യമായത്. ഇന്ന് രൂപപ്പെടുന്ന സർക്കാർ ഏതു മുന്നണിയുടേതായാലും, വികസനവും സാമൂഹ്യനീതിയും ജനക്ഷേമവും മുൻഗണനയായിരിക്കണം. രാഷ്ട്രീയ പ്രതികാരങ്ങളും അനാവശ്യ വിവാദങ്ങളും ഒഴിവാക്കി നാടിന്റെ മുന്നേറ്റം ലക്ഷ്യമാക്കിയുള്ള പ്രവർത്തനങ്ങളാണ് ജനങ്ങൾ പ്രതീക്ഷിക്കുന്നത്. പുതിയ തലമുറ രാഷ്ട്രീയത്തിൽ കൂടുതൽ ഉത്തരവാദിത്തവും ശുദ്ധതയും ആഗ്രഹിക്കുന്നുണ്ട്; പഴയ വൈരാഗ്യ രാഷ്ട്രീയത്തെ അവർ നിരസിക്കുകയാണ്. തെരഞ്ഞെടുപ്പ് ഫലം ഒരുദിവസത്തെ വിധി മാത്രമാണ്; എന്നാൽ ജനാധിപത്യം ഒരു തുടർച്ചയായ പ്രക്രിയയാണ്. ജയവും പരാജയവും താൽക്കാലികം, പക്ഷേ ജനവിശ്വാസം ശാശ്വതമാണ്. ആ വിശ്വാസം നിലനിർത്താൻ എല്ലാ രാഷ്ട്രീയ ശക്തികളും ഒരുമിച്ച് പ്രവർത്തിക്കേണ്ട സമയമാണിത്. ഫലം എന്തായാലും, ജനവും ജനാധിപത്യവും നാടും ശക്തമായി നിലനിൽക്കട്ടെ. കേരളം മുന്നേറട്ടെ;സൗഹാർദത്തോടെ, ഉത്തരവാദിത്തത്തോടെ, പ്രതീക്ഷയോടെ.