മുംബൈ: 2026 ഐപിഎൽ സീസണിലെ ഏറ്റവും വലിയ കണ്ടെത്തലായി മാറിയ രാജസ്ഥാൻ റോയൽസിന്റെ യുവതാരം വൈഭവ് സൂര്യവംശി റെക്കോർഡുകളും പുരസ്കാരങ്ങളും വാരിക്കൂട്ടി സീസൺ അവസാനിപ്പിച്ചു. വെറും 15-ാം വയസ്സിൽ തന്നെ ക്രിക്കറ്റ് ലോകത്തിന്റെ ശ്രദ്ധാകേന്ദ്രമായ താരം ഒരൊറ്റ സീസണിൽ അഞ്ച് പ്രധാന വ്യക്തിഗത പുരസ്കാരങ്ങളാണ് സ്വന്തമാക്കിയത്.
സീസണിലുടനീളം അതിവിസ്മയകരമായ ബാറ്റിംഗ് പ്രകടനം പുറത്തെടുത്ത വൈഭവ് 776 റൺസ് നേടി റൺവേട്ടക്കാരുടെ പട്ടികയിൽ ഒന്നാമതെത്തുകയും ഓറഞ്ച് ക്യാപ് സ്വന്തമാക്കുകയും ചെയ്തു. ഒരു സെഞ്ചുറിയും അഞ്ച് അർധസെഞ്ചുറികളും ഉൾപ്പെട്ട പ്രകടനമാണ് താരത്തെ ഈ നേട്ടത്തിലേക്ക് എത്തിച്ചത്.
സീസണിൽ 72 സിക്സറുകൾ നേടിയ വൈഭവ്, ഒരു ഐപിഎൽ സീസണിൽ ഏറ്റവും കൂടുതൽ സിക്സറുകൾ നേടുന്ന താരമെന്ന റെക്കോർഡും സ്വന്തമാക്കി. ഇതോടെ വെസ്റ്റിൻഡീസ് ഇതിഹാസ താരം ക്രിസ് ഗെയ്ലിന്റെ പഴയ റെക്കോർഡ് ചരിത്രമായി.
ഓറഞ്ച് ക്യാപിനൊപ്പം മോസ്റ്റ് വാല്യുബിൾ പ്ലെയർ (എംവിഎപി), എമർജിങ് പ്ലെയർ ഓഫ് ദ സീസൺ, സൂപ്പർ സ്ട്രൈക്കർ ഓഫ് ദ സീസൺ, സൂപ്പർ സിക്സസ് ഓഫ് ദ സീസൺ എന്നീ നാല് പ്രധാന പുരസ്കാരങ്ങളും വൈഭവിനെ തേടിയെത്തി. ഇതോടെ അഞ്ച് വ്യക്തിഗത ബഹുമതികളുമായി സീസണിലെ ഏറ്റവും ശ്രദ്ധേയ താരമായി യുവ ബാറ്റർ മാറി.
രാജസ്ഥാൻ റോയൽസിന്റെ വിജയങ്ങളിൽ നിർണായക പങ്കുവഹിച്ച വൈഭവ്, ലോകോത്തര ബൗളർമാർക്കെതിരെയും ഭയമില്ലാത്ത സമീപനമാണ് കാഴ്ചവെച്ചത്. ജസ്പ്രീത് ബുമ്ര, മുഹമ്മദ് സിറാജ്, ജോഫ്ര ആർച്ചർ, രവീന്ദ്ര ജഡേജ തുടങ്ങിയ പ്രമുഖരെ ആത്മവിശ്വാസത്തോടെ നേരിട്ട താരം ഭാവിയിലെ ഇന്ത്യൻ ക്രിക്കറ്റിന്റെ വലിയ പ്രതീക്ഷയെന്ന വിശേഷണവും സ്വന്തമാക്കി.
കൗമാരപ്രായത്തിൽ തന്നെ റെക്കോർഡുകൾ തകർത്ത് മുന്നേറുന്ന വൈഭവ് സൂര്യവംശിയുടെ ഈ സീസൺ പ്രകടനം ഐപിഎൽ ചരിത്രത്തിലെ ഏറ്റവും മികച്ച യുവതാര പ്രകടനങ്ങളിലൊന്നായി വിലയിരുത്തപ്പെടുന്നു.