ചെന്നൈ: ആക്ഷൻ താരം അർജുൻ സർജയെ നായകനാക്കി സുഭാഷ് കെ. രാജ് സംവിധാനം ചെയ്ത ‘ബ്ലാസ്റ്റ്’ മികച്ച പ്രേക്ഷക പ്രതികരണങ്ങളോടെ തീയറ്ററുകളിൽ മുന്നേറുന്നു. മെയ് 28ന് ആഗോള റിലീസായി എത്തിയ ചിത്രം കുടുംബപ്രേക്ഷകരുടെയും ആക്ഷൻ സിനിമാ പ്രേമികളുടെയും പിന്തുണ നേടി ബോക്സ് ഓഫീസിൽ ശ്രദ്ധേയ പ്രകടനമാണ് കാഴ്ചവെക്കുന്നത്.
കരാട്ടെ പരിശീലകനായ ഒരു വ്യക്തിയുടെയും കുടുംബത്തിന്റെയും ജീവിതത്തിലേക്ക് അപ്രതീക്ഷിതമായി കടന്നുവരുന്ന ചിലരുടെ പശ്ചാത്തലത്തിൽ വികസിക്കുന്ന സംഭവങ്ങളാണ് ചിത്രത്തിന്റെ പ്രമേയം. കുടുംബബന്ധങ്ങളും ആക്ഷനും വൈകാരിക മുഹൂർത്തങ്ങളും ചേർത്തൊരുക്കിയ ചിത്രത്തിന് വിവിധ കേന്ദ്രങ്ങളിൽ നിന്ന് മികച്ച പ്രതികരണമാണ് ലഭിക്കുന്നത്.
അർജുൻ സർജയ്ക്കൊപ്പം പ്രീതി മുകുന്ദനും അഭിരാമിയും പ്രധാന കഥാപാത്രങ്ങളായി എത്തുന്ന ചിത്രത്തിൽ ഇവരുടെ പ്രകടനം ഏറെ പ്രശംസിക്കപ്പെടുന്നു. പ്രേക്ഷകരുടെ അഭിപ്രായത്തിൽ ചിത്രത്തിന്റെ പ്രധാന കരുത്ത് ശക്തമായ കഥാപാത്രാവിഷ്കാരവും വികാരഭരിതമായ അവതരണവുമാണ്.
ബോക്സ് ഓഫീസ് കണക്കുകൾ പ്രകാരം ചിത്രം ഇതിനോടകം ആഗോളതലത്തിൽ ഏകദേശം 21 കോടി രൂപയുടെ വരുമാനം സ്വന്തമാക്കിയിട്ടുണ്ട്. ഇന്ത്യയിൽ നിന്ന് മാത്രം 16 കോടിയിലധികം രൂപയും വിദേശ വിപണികളിൽ നിന്ന് അഞ്ച് കോടിയിലധികം രൂപയും ചിത്രം നേടിയതായാണ് റിപ്പോർട്ടുകൾ.
അർജുൻ ചിദംബരം, ദിലീപൻ, ബാല ഹസൻ, ജോൺ കോക്കൻ, രമേഷ് നാരായണൻ, പവൻ, വിവേക് പ്രസന്ന, വിനോദ് സാഗർ എന്നിവർ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു. എജിഎസ് എന്റർടെയ്ൻമെന്റ്സിന്റെ ബാനറിൽ നിർമ്മിച്ച ചിത്രത്തിന് സംഗീതം ഒരുക്കിയത് രവി ബസ്രൂറാണ്. ഛായാഗ്രഹണം അരുൺ രാധാകൃഷ്ണനും എഡിറ്റിംഗ് പ്രദീപ് രാഘവും നിർവഹിച്ചിട്ടുണ്ട്.
മികച്ച പ്രേക്ഷക പിന്തുണയോടെ മുന്നേറുന്ന ‘ബ്ലാസ്റ്റ്’ വരും ദിവസങ്ങളിലും ബോക്സ് ഓഫീസിൽ ശക്തമായ മുന്നേറ്റം തുടരുമെന്ന പ്രതീക്ഷയിലാണ് അണിയറ പ്രവർത്തകർ.