തിരുവനന്തപുരം: വിഴിഞ്ഞം അന്താരാഷ്ട്ര തുറമുഖത്തിലെ അദാനി–എംഎസ്സി ഓഹരികൈമാറ്റവുമായി ബന്ധപ്പെട്ട് സംസ്ഥാന സർക്കാരിനെതിരെ ഗുരുതര ആരോപണവുമായി പ്രതിപക്ഷം. ഓഹരികൈമാറ്റത്തെക്കുറിച്ച് സർക്കാർ മുൻകൂട്ടി അറിഞ്ഞിരുന്നുവെന്ന് പ്രതിപക്ഷ നേതാവ് പിണറായി വിജയൻ ആരോപിച്ചു. അദാനിയുടെ നിയമവിരുദ്ധ നീക്കത്തിൽ മുഖ്യമന്ത്രി വ്യക്തമായ മറുപടി പറയണമെന്നും അദ്ദേഹം ആവശ്യപ്പെട്ടു.
“സംസ്ഥാന സർക്കാരിന്റെ മുൻകൂർ അനുമതിയോടെയല്ലാതെ മുന്നോട്ട് പോകാൻ കഴിയാത്ത വിഷയത്തിൽ അദാനി കമ്പനിക്ക് ഇത്രയും ആത്മവിശ്വാസത്തോടെ കാര്യങ്ങൾ മുന്നോട്ട് കൊണ്ടുപോകാൻ എങ്ങനെ കഴിഞ്ഞു എന്നതാണ് വ്യക്തമാകേണ്ടത്,” എന്ന് പ്രതിപക്ഷ നേതാവ് പറഞ്ഞു. എംഎസ്സി എത്തുന്നതോടെ വിഴിഞ്ഞം തുറമുഖത്തിൽ വിദേശ കമ്പനിയുടെ ആധിപത്യം വർധിക്കുമെന്നും അദാനിക്ക് സർക്കാർ വഴങ്ങരുതെന്നും അദ്ദേഹം ആവശ്യപ്പെട്ടു.
വീര്യം കുറഞ്ഞ മദ്യത്തിനുള്ള നികുതിയിളവിന്റെ കാര്യത്തിലും പ്രതിപക്ഷം സർക്കാരിനെ കടുത്ത ഭാഷയിൽ വിമർശിച്ചു. നികുതി നിർദേശങ്ങൾ ഉൾപ്പെടുത്തിയ ധനബിൽ ഒളിച്ചുകടത്തിയെന്നും, ബക്കാർഡിക്ക് വേണ്ടി മുഖ്യമന്ത്രി അനാവശ്യ ധൃതിയും വാശിയും കാണിച്ചെന്നും പിണറായി വിജയൻ ആരോപിച്ചു.
“കോർപ്പറേറ്റ് കമ്പനികളുടെ ലാഭത്തിനായി സർക്കാർ കുടപിടിക്കുകയാണ്. സംസ്ഥാനത്തിന്റെ താൽപര്യത്തിന് വിരുദ്ധമായ നിരവധി തീരുമാനങ്ങൾ സർക്കാർ നയമെന്ന പേരിൽ നടപ്പാക്കുകയാണ്. നടപടിക്രമങ്ങൾ പാലിക്കാതെയാണ് ധനബിൽ സഭയിൽ പാസാക്കിയത്. ഷെഡ്യൂളിൽ ധനകാര്യബിൽ ഉണ്ടായിരുന്നില്ല. പുതിയ നികുതി നിർദേശങ്ങൾ അന്നത്തെ ഘട്ടത്തിൽ പരിഗണിച്ചിരുന്നില്ലെന്നാണ് മനസ്സിലാക്കേണ്ടത്. ധനബിൽ പാസാക്കുന്നതിൽ അനാവശ്യ ധൃതിയും വാശിയും പ്രകടിപ്പിച്ചു. മദ്യക്കമ്പനികൾക്ക് നികുതിയിളവ് നൽകണമെന്ന വാശിയാണ് മുഖ്യമന്ത്രിക്കുണ്ടായിരുന്നത്. ഇത് സമൂഹത്തിൽ മദ്യവ്യാപനം വർധിപ്പിക്കും,” പ്രതിപക്ഷ നേതാവ് പറഞ്ഞു.
ധനബിൽ പാസായതിന് ശേഷം യുഡിഎഫിൽ ചർച്ച നടത്തുന്നതിന് എന്ത് പ്രസക്തിയാണുള്ളതെന്നും പ്രതിപക്ഷം ചോദിച്ചു. മന്ത്രിസഭയെ അറിയിക്കാതെയാണ് തീരുമാനം എടുത്തതെന്നും, മുന്നണിയിലും ഇക്കാര്യം ചർച്ച ചെയ്തില്ലെന്നും, മുഖ്യമന്ത്രിയെ ഒഴികെ മുന്നണി നേതൃത്വത്തിന് ഈ വിഷയത്തിൽ അറിവില്ലായിരുന്നുവെന്നും പ്രതിപക്ഷ നേതാവ് ആരോപിച്ചു.
കരിമണൽ ഖനന വിഷയത്തിലും മുഖ്യമന്ത്രി നിയമസഭയെ തെറ്റിദ്ധരിപ്പിച്ചുവെന്നും പിണറായി വിജയൻ ആരോപിച്ചു.