തൊടുപുഴ: ഇടുക്കി ജില്ലയിലെ ചിന്നക്കനാൽ സൂര്യനെല്ലിയിൽ കാട്ടാന ആക്രമണത്തിൽ യുവതി മരിച്ചു. സിങ്ക് കണ്ടം സ്വദേശിനി മാരി (37)യാണ് മരിച്ചത്. ആക്രമണത്തിൽ ഒപ്പമുണ്ടായിരുന്ന മകനും പരിക്കേറ്റു.
ഇന്ന് രാവിലെയാണ് ദാരുണ സംഭവം നടന്നത്. മകനെ സ്കൂളിൽ വിടുന്നതിനായി വീട്ടിൽ നിന്ന് പുറപ്പെട്ട മാരിയെ വഴിമധ്യേ കാട്ടാന ആക്രമിക്കുകയായിരുന്നു. ആക്രമണത്തിൽ ഗുരുതരമായി പരിക്കേറ്റ യുവതി സംഭവസ്ഥലത്തുവച്ചുതന്നെ മരിച്ചതായാണ് വിവരം.
പരിക്കേറ്റ കുട്ടിയെ ഉടൻ സമീപത്തെ ആശുപത്രിയിൽ പ്രവേശിപ്പിച്ചു. കുട്ടിയുടെ ആരോഗ്യനില തൃപ്തികരമാണെന്നാണ് ലഭിക്കുന്ന വിവരം.
സംഭവത്തെ തുടർന്ന് പ്രദേശത്ത് ആശങ്ക പരന്നിട്ടുണ്ട്. സൂര്യനെല്ലി മേഖലയിലും സമീപ പ്രദേശങ്ങളിലുമായി കഴിഞ്ഞ കുറച്ച് ദിവസങ്ങളായി കാട്ടാനയുടെ സാന്നിധ്യം റിപ്പോർട്ട് ചെയ്തിരുന്നുവെന്ന് നാട്ടുകാർ പറയുന്നു.
പ്രദേശത്ത് കാട്ടാനയുണ്ടെന്ന മുന്നറിയിപ്പ് നേരത്തേ നൽകിയിരുന്നുവെന്ന് വനംവകുപ്പ് അറിയിച്ചു. സംഭവത്തെ തുടർന്ന് വനപാലകരും പൊലീസും സ്ഥലത്തെത്തി പരിശോധന നടത്തി. കാട്ടാനയെ വനത്തിലേക്ക് തുരത്തുന്നതിനും ജനങ്ങളുടെ സുരക്ഷ ഉറപ്പാക്കുന്നതിനുമായി അടിയന്തര നടപടികൾ ആരംഭിച്ചതായി അധികൃതർ അറിയിച്ചു.
കാട്ടാന ശല്യം രൂക്ഷമായ സാഹചര്യത്തിൽ കൂടുതൽ സുരക്ഷാ നടപടികൾ സ്വീകരിക്കണമെന്ന ആവശ്യവുമായി നാട്ടുകാർ രംഗത്തെത്തിയിട്ടുണ്ട്. മാരിയുടെ മരണത്തോടെ വന്യമൃഗ ആക്രമണങ്ങളിൽ ജീവൻ നഷ്ടപ്പെടുന്നവരുടെ എണ്ണം സംസ്ഥാനത്ത് വീണ്ടും ഉയരുകയാണ്.