ന്യൂഡൽഹി: നീറ്റ്-യുജി പരീക്ഷാ ക്രമക്കേടുകളെയും ചോദ്യപേപ്പർ ചോർച്ചയെയും തുടർന്ന് രാജ്യവ്യാപകമായി ഉയർന്ന പ്രതിഷേധങ്ങൾക്കൊടുവിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെച്ചതായി റിപ്പോർട്ട്. പ്രധാനമന്ത്രി നരേന്ദ്ര മോദിക്ക് രണ്ട് പേജുള്ള രാജിക്കത്ത് സമർപ്പിച്ചാണ് അദ്ദേഹം പദവി ഒഴിഞ്ഞത്.
വിദ്യാർഥികളുടെ ഭാവി ദീർഘകാല നിയമ-രാഷ്ട്രീയ പോരാട്ടങ്ങളിൽ കുടുങ്ങിപ്പോകരുത് എന്ന ലക്ഷ്യത്തോടെയാണ് ഈ തീരുമാനമെടുത്തതെന്ന് രാജിക്കത്തിൽ അദ്ദേഹം വ്യക്തമാക്കുന്നു.
‘എന്റെ യുവസുഹൃത്തുക്കളേ’ എന്ന് അഭിസംബോധന ചെയ്തുകൊണ്ടാണ് കത്ത് ആരംഭിക്കുന്നത്. നീറ്റ് പരീക്ഷാ പ്രതിസന്ധി പരിഹരിക്കാൻ സർക്കാർ സ്വീകരിച്ച നടപടികളെ ന്യായീകരിക്കുന്ന ധർമേന്ദ്ര പ്രധാൻ, അഴിമതിക്കേസുകൾ സിബിഐക്ക് കൈമാറിയതും പരീക്ഷ റദ്ദാക്കി വീണ്ടും സുതാര്യമായി നടത്താൻ തീരുമാനിച്ചതും രാജിക്കത്തിൽ പരാമർശിക്കുന്നു.
പ്രധാനമന്ത്രി നൽകിയ പിന്തുണയ്ക്കും മാർഗനിർദേശങ്ങൾക്കും നന്ദി രേഖപ്പെടുത്തിയ അദ്ദേഹം, വിദ്യാർഥികളുടെയും രാജ്യത്തിന്റെയും താൽപര്യമാണ് തനിക്ക് ഏറ്റവും പ്രധാനമെന്നും കൂട്ടിച്ചേർത്തു.
2026-ലെ നീറ്റ് പരീക്ഷയുമായി ബന്ധപ്പെട്ട ക്രമക്കേടുകൾ പുറത്തുവന്നതിനെ തുടർന്ന് ആഴ്ചകളോളം രാജ്യത്ത് ശക്തമായ പ്രതിഷേധങ്ങളാണ് നടന്നത്. വിദ്യാർഥി സംഘടനകളും പ്രതിപക്ഷ പാർട്ടികളും കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ട് രംഗത്തിറങ്ങിയിരുന്നു.
രാജിക്കത്തിലെ പ്രധാന ഭാഗങ്ങൾ
പ്രിയപ്പെട്ട യുവസുഹൃത്തുക്കളേ,
കഴിഞ്ഞ നാല് പതിറ്റാണ്ടിലേറെയായി വിദ്യാർഥികളുടെയും അധ്യാപകരുടെയും വിദ്യാഭ്യാസ പരിഷ്കരണങ്ങളുടെയും നന്മയ്ക്കായി ഞാൻ പ്രവർത്തിച്ചുവരികയാണ്. ശക്തവും ഉൾക്കൊള്ളുന്നതുമായ ദീർഘവീക്ഷണമുള്ള വിദ്യാഭ്യാസ സംവിധാനമാണ് ശക്തമായ ഒരു രാജ്യത്തിന്റെ അടിത്തറയെന്ന് ഞാൻ എന്നും വിശ്വസിക്കുന്നു.
രാജ്യത്തെ യുവാക്കളുടെ ആഗ്രഹങ്ങളെയും വികാരങ്ങളെയും ന്യായമായ പ്രതീക്ഷകളെയും ഞാൻ ആഴത്തിൽ ബഹുമാനിക്കുന്നു. ഇന്ത്യയിലെ യുവതലമുറയുടെ സ്വപ്നങ്ങൾ സാക്ഷാത്കരിക്കുക എന്നത് നമ്മുടെ ധാർമിക പ്രതിബദ്ധതയാണ്. ബഹുമാനപ്പെട്ട പ്രധാനമന്ത്രിയുടെ നേതൃത്വത്തിൽ രാജ്യത്തെ സേവിക്കാൻ ലഭിച്ച അവസരത്തിന് ഞാൻ അദ്ദേഹത്തോട് നന്ദി രേഖപ്പെടുത്തുന്നു.
എന്നാൽ 2026 മേയ് 3-ന് നടന്ന നീറ്റ്-യുജി പരീക്ഷയുമായി ബന്ധപ്പെട്ട് ചില ക്രമക്കേടുകൾ പുറത്തുവന്നു. വിഷയത്തിന്റെ ഗൗരവം മനസിലാക്കി അന്വേഷണം സിബിഐക്ക് കൈമാറുകയും പരീക്ഷ റദ്ദാക്കി പുനഃപരീക്ഷ നടത്താൻ തീരുമാനിക്കുകയും ചെയ്തു. അടുത്ത വർഷം മുതൽ പരീക്ഷ കമ്പ്യൂട്ടർ അധിഷ്ഠിത (CBT) രീതിയിൽ നടത്താനും തീരുമാനമായി.
ഈ കാലയളവിലുടനീളം 20 ലക്ഷത്തിലധികം വിദ്യാർഥികൾക്കായി പരീക്ഷ സുഗമമായി നടത്തുക എന്നതായിരുന്നു സർക്കാരിന്റെ പ്രധാന ലക്ഷ്യം. കേന്ദ്രവും സംസ്ഥാന സർക്കാരുകളും ജില്ലാ ഭരണകൂടങ്ങളും ചേർന്നാണ് ഈ ദൗത്യം വിജയകരമാക്കിയത്.
ആദ്യ ദിവസം മുതൽ ഞാൻ ഇതിന്റെ പൂർണ ഉത്തരവാദിത്തം ഏറ്റെടുത്തിരുന്നു. ഒരു വിദ്യാർഥിയുടെയും ഭാവി പരീക്ഷാ മാഫിയ കാരണം തകരാൻ അനുവദിക്കില്ലെന്നും ആരോടും അനീതി ഉണ്ടാകില്ലെന്നും ഞാൻ ഉറപ്പാക്കിയിരുന്നു.
ജൂലൈ 16-ന് പ്രഖ്യാപിച്ച നീറ്റ്-യുജി ഫലങ്ങൾ തൃപ്തികരമായിരുന്നു. സാമ്പത്തികമായി പിന്നാക്കം നിൽക്കുന്ന കുടുംബങ്ങളിൽ നിന്നുള്ള നിരവധി വിദ്യാർഥികൾ മികച്ച വിജയം നേടി. എന്നിരുന്നാലും, ഉത്തരവാദിത്തപ്പെട്ട ചിലർ വിദ്യാർഥികളെ തെറ്റിദ്ധരിപ്പിക്കാൻ ശ്രമിച്ചത് എന്നെ ഏറെ വേദനിപ്പിച്ചു.
ജനാധിപത്യത്തിന്റെ കരുത്തിൽ എനിക്ക് എന്നും വിശ്വാസമുണ്ട്. യുവാക്കളുടെ സ്വപ്നങ്ങളെയും പ്രതീക്ഷകളെയും ഞാൻ ആഴത്തിൽ ബഹുമാനിക്കുന്നു. അവർ ഇന്ത്യയുടെ ഭാവി മാത്രമല്ല, പുതിയ ഇന്ത്യയുടെ നിർമ്മാതാക്കളുമാണ്.
ജന്തർ മന്തറിലെയും രാജ്യത്തുടനീളമുള്ള സാഹചര്യവും കണക്കിലെടുത്ത്, ദേശവിരുദ്ധ ശക്തികൾ സാഹചര്യം ദുരുപയോഗം ചെയ്യുന്നത് തടയുക, ദേശീയ ഐക്യം നിലനിർത്തുക, ഒരു ഇന്ത്യൻ വിദ്യാർഥിയുടെ പോലും ഭാവി നിയമപരമായ സങ്കീർണ്ണതകളിൽ കുടുങ്ങിപ്പോകാതിരിക്കുക, കുട്ടികൾക്ക് പഠനത്തിലും കരിയറിലും ശ്രദ്ധ കേന്ദ്രീകരിക്കാൻ അവസരം നൽകുക എന്നീ ലക്ഷ്യങ്ങളോടെയാണ് ഞാൻ എന്റെ രാജി സമർപ്പിച്ചത്.
ആദരണീയനായ പ്രധാനമന്ത്രിയുടെ മാർഗനിർദേശത്തിനും വിശ്വാസത്തിനും പിന്തുണയ്ക്കും ഞാൻ ഹൃദയംഗമമായ നന്ദി രേഖപ്പെടുത്തുന്നു. മന്ത്രിസഭയിലെ സഹപ്രവർത്തകർക്കും മന്ത്രാലയത്തിലെ ഉദ്യോഗസ്ഥർക്കും ജീവനക്കാർക്കും ഒപ്പം പ്രവർത്തിച്ച എല്ലാവർക്കും നന്ദി അറിയിക്കുന്നു.
രാഷ്ട്രസേവനമാണ് എന്റെ ജീവിതത്തിലെ ഏറ്റവും വലിയ മുൻഗണന. ഭാരതമാതാവിന്റെയും ഒഡീഷയിലെ ജനങ്ങളുടെയും രാജ്യത്തെ യുവാക്കളുടെയും പ്രതീക്ഷകൾ നിറവേറ്റുന്നതിനായി ഭാവിയിലും സാധ്യമായ എല്ലാ രീതിയിലും ഞാൻ പ്രവർത്തിച്ചുകൊണ്ടിരിക്കും.