തിരുവനന്തപുരം: ശ്വാസതടസ്സവുമായി ചികിത്സയ്ക്കെത്തിയ 16-കാരിക്ക് നൽകിയത് 88-കാരിയുടെ എക്സ്റേ. എക്സ്റേ മാറിപ്പോയത് അറിയാതെ ഇതിന്റെ അടിസ്ഥാനത്തിൽ പെൺകുട്ടിയുടെ നട്ടെല്ലിന് വളവുണ്ടെന്ന് കണ്ടെത്തി നാലുദിവസത്തോളം ചികിത്സ നൽകിയ സംഭവത്തിൽ കോന്നി മെഡിക്കൽ കോളേജിൽ നടപടിക്ക് നിർദേശം. വീഴ്ച വരുത്തിയവർക്കെതിരെ നടപടി സ്വീകരിക്കാൻ ആരോഗ്യ മന്ത്രി കെ. മുരളീധരൻ മെഡിക്കൽ കോളേജ് സൂപ്രണ്ടിന് നിർദേശം നൽകി.
എക്സ്റേ മാറിനൽകിയതിൽ വീഴ്ച സംഭവിച്ചെന്നാണ് മെഡിക്കൽ കോളേജ് സൂപ്രണ്ടിന്റെ പ്രാഥമിക റിപ്പോർട്ട്. എക്സ്റേ വിതരണം ചെയ്യുന്ന കൗണ്ടറിലാണ് പിഴവ് സംഭവിച്ചതെന്നും ഡയറക്ടറേറ്റ് ഓഫ് മെഡിക്കൽ എജ്യൂക്കേഷന് നൽകിയ റിപ്പോർട്ടിൽ വ്യക്തമാക്കുന്നു. സംഭവത്തിൽ റേഡിയോളജി, പൾമണോളജി വിഭാഗങ്ങളിലെ ഡോക്ടർമാരോട് വിശദീകരണം തേടുമെന്നും സൂപ്രണ്ട് അറിയിച്ചു.
ശ്വാസതടസ്സത്തെ തുടർന്ന് ഡോക്ടറുടെ നിർദേശപ്രകാരമാണ് 16-കാരി റേഡിയോളജി വിഭാഗത്തിലെത്തി എക്സ്റേ എടുത്തത്. എന്നാൽ റേഡിയോളജി വിഭാഗത്തിൽനിന്ന് പെൺകുട്ടിക്ക് നൽകിയത് 88-കാരിയുടെ എക്സ്റേയായിരുന്നു. ഈ എക്സ്റേയുമായി വീണ്ടും ഡോക്ടറെ കണ്ടപ്പോൾ പരിശോധനയിൽ നട്ടെല്ലിന് വളവുണ്ടെന്ന് കണ്ടെത്തിയതായി പറഞ്ഞ് മരുന്ന് നൽകുകയായിരുന്നു. ഡോക്ടറുടെ നിർദേശപ്രകാരം മൂന്നുദിവസത്തിന് ശേഷം ശ്വാസകോശ പരിശോധനയ്ക്കായി പത്തനംതിട്ട ജനറൽ ആശുപത്രിയിലെത്തിയപ്പോഴാണ് എക്സ്റേ മാറിപ്പോയ വിവരം പുറത്തായത്.
ജനറൽ ആശുപത്രിയിലെ ഡോക്ടർമാർ എക്സ്റേ പരിശോധിച്ചപ്പോഴാണ് ചിത്രത്തിലെ കണ്ടെത്തലുകളും പെൺകുട്ടിയുടെ പ്രായവും തമ്മിൽ പൊരുത്തക്കേടുണ്ടെന്ന് വ്യക്തമായത്. തുടർന്ന് പെൺകുട്ടിയും മാതാപിതാക്കളും കോന്നി മെഡിക്കൽ കോളേജിലെത്തി സൂപ്രണ്ടിന് പരാതി നൽകി.
സംഭവത്തിൽ സംസ്ഥാന ബാലാവകാശ കമ്മീഷനും സ്വമേധയാ കേസെടുത്തിട്ടുണ്ട്. സംഭവത്തിൽ വീഴ്ച വരുത്തിയവർക്കെതിരെ വിശദമായ പരിശോധനയ്ക്ക് ശേഷമാകും നടപടി സ്വീകരിക്കുക.