ന്യൂഡൽഹി: ഇന്ത്യയിലെ ഷോപ്പിംഗ് സംസ്കാരം ഏറെ വ്യത്യസ്തവും അനുഭവസമ്പന്നവുമാണെന്ന് വ്യക്തമാക്കി അമേരിക്കൻ യുവതി കാറ്റി ശർമ്മ പങ്കുവച്ച വീഡിയോ സോഷ്യൽ മീഡിയയിൽ വൈറലായി.
അമേരിക്കയിലെ ശാന്തവും ക്രമബദ്ധവുമായ ഷോപ്പിംഗിനോട് താരതമ്യം ചെയ്യുമ്പോൾ, ഇന്ത്യയിലെ തിരക്കേറിയ മാർക്കറ്റുകളും വിലപേശലുകളും നിറഞ്ഞ അനുഭവങ്ങളാണ് തനിക്ക് ലഭിച്ചതെന്ന് കാറ്റി പറയുന്നു. ഇന്ത്യൻ മാർക്കറ്റുകൾ ഒരു സാമൂഹിക കൂടിച്ചേരലുപോലെയാണെന്നും, നിറങ്ങളും ശബ്ദവും നിറഞ്ഞ പ്രത്യേക അന്തരീക്ഷമാണെന്നും വീഡിയോയിൽ അവൾ വ്യക്തമാക്കുന്നു.
40 ഡിഗ്രി ചൂടിൽ ഷോപ്പിംഗ് നടത്തിയപ്പോൾ രണ്ട് ടവലുകൾക്കായി 800 രൂപ നൽകിയ അനുഭവവും കാറ്റി പങ്കുവെച്ചു. എന്നാൽ ഇതിന് പിന്നാലെ നെറ്റിസൺസ് രസകരമായ പ്രതികരണങ്ങളുമായി രംഗത്തെത്തി. “ഇത് ടൂറിസ്റ്റ് പ്രൈസാണ്”, “വിലപേശൽ പഠിക്കണം” തുടങ്ങിയ കമന്റുകളാണ് കൂടുതലായി എത്തുന്നത്.
അമേരിക്കയിൽ വില നിശ്ചിതമാണെങ്കിലും ഇന്ത്യയിൽ വിലപേശൽ സാധാരണമാണെന്നും, ഷോപ്പിംഗ് തന്നെ ഒരു ഉത്സവമൂഡ് നൽകുന്നതാണെന്നും കാറ്റി വീഡിയോയിൽ പറയുന്നു. ഷോപ്പിംഗിന് ശേഷം 90 രൂപയ്ക്ക് കഴിച്ച പനീർ ബ്രെഡ് പക്കോഡയാണ് ക്ഷീണം മാറ്റിയതെന്നും അവൾ കൂട്ടിച്ചേർത്തു.
ഇന്ത്യൻ മാർക്കറ്റുകളുടെ വ്യത്യസ്തതയും സംസ്കാരവും ലോകത്തിന് മുന്നിൽ വീണ്ടും ചർച്ചയാകുന്ന സാഹചര്യമാണ് ഈ വീഡിയോ സൃഷ്ടിച്ചിരിക്കുന്നത്.