ചെന്നൈ: തമിഴ് താരം ധനുഷ് നായകനായി എത്തിയ ‘കര’ ഒടിടി റിലീസിനൊരുങ്ങുന്നു. തിയറ്റർ റിലീസിന് ശേഷം പ്രേക്ഷകർക്കിടയിൽ ചർച്ചയായ ചിത്രം ഇനി വീട്ടിലിരുന്ന് കാണാനുള്ള അവസരമാണ് ആരാധകർക്ക് ലഭിക്കുന്നത്. ചിത്രത്തിന്റെ ഡിജിറ്റൽ റിലീസ് തീയതിയും പ്ലാറ്റ്ഫോമും ഔദ്യോഗികമായി പ്രഖ്യാപിച്ചു.
മെയ് 28 മുതൽ പ്രമുഖ ഒടിടി പ്ലാറ്റ്ഫോമിലൂടെ ചിത്രത്തിന്റെ സ്ട്രീമിംഗ് ആരംഭിക്കും. റിലീസിന് പിന്നാലെ സമ്മിശ്ര പ്രതികരണങ്ങളാണ് ചിത്രത്തിന് ലഭിച്ചിരുന്നത്. എങ്കിലും ധനുഷിന്റെ പ്രകടനവും കഥയുടെ അവതരണ ശൈലിയും പ്രേക്ഷക ശ്രദ്ധ നേടിയിരുന്നു.
‘പോർ തൊഴിൽ’ എന്ന ചിത്രത്തിന് ശേഷം സംവിധായകൻ വിഘ്നേശ് രാജ സംവിധാനം ചെയ്ത ചിത്രമാണ് ‘കര’. ചിത്രത്തിൽ മലയാളികളുടെ പ്രിയതാരം മമിതയാണ് ധനുഷിന്റെ നായികയായി എത്തിയത്. തമിഴ് സിനിമയിൽ മമിതയുടെ ശ്രദ്ധേയമായ മുന്നേറ്റങ്ങളിലൊന്നായും ഈ ചിത്രം വിലയിരുത്തപ്പെടുന്നു.
മലയാളത്തിൽ നിന്ന് സുരാജ് വെഞ്ഞാറമൂടും പ്രധാന കഥാപാത്രത്തെ അവതരിപ്പിച്ചിട്ടുള്ള ചിത്രം വേൽസ് ഫിലിം ഇന്റർനാഷണലിന്റെ ബാനറിൽ ഡോ. ഐശാരി കെ. ഗണേഷാണ് നിർമ്മിച്ചത്. സംഗീതം ജി.വി. പ്രകാശ് കുമാറും ഛായാഗ്രഹണം തേനി ഈശ്വറും നിർവഹിച്ചു.
അതേസമയം തമിഴ് സിനിമയിൽ മമിതയുടെ തിരക്കേറിയ കാലഘട്ടമാണ് ഇപ്പോൾ. വിജയ് നായകനാകുന്ന ‘ജന നായകൻ’ ചിത്രത്തിൽ ശ്രദ്ധേയ കഥാപാത്രത്തിലും, സൂര്യയുടെ പുതിയ ചിത്രത്തിലും മമിത എത്തുന്നുവെന്ന റിപ്പോർട്ടുകൾ നേരത്തെ പുറത്തുവന്നിരുന്നു. പുതിയ തലമുറയിലെ ശ്രദ്ധേയ താരങ്ങളിലൊരാളായി മമിത ഇതിനകം തന്നെ തമിഴ് സിനിമയിൽ സ്ഥാനം ഉറപ്പിച്ചുകഴിഞ്ഞു.
ധനുഷിന്റെ അടുത്തകാല ചിത്രങ്ങളിലൊന്നായ ‘ഇഡ്ലി കടൈ’ക്കും പ്രേക്ഷകശ്രദ്ധ ലഭിച്ചിരുന്നു. രചനയും സംവിധാനവും നിർവഹിച്ചുകൊണ്ട് നായകനായും ധനുഷ് എത്തിയ ചിത്രം അദ്ദേഹത്തിന്റെ സംവിധാനജീവിതത്തിലെ മറ്റൊരു പ്രധാന ചുവടുവയ്പായി മാറിയിരുന്നു.