കാഠ്മണ്ഡു: നേപ്പാളിലെ മിന്നൽ പ്രളയത്തിൽ മരണസംഖ്യ 734 ആയി ഉയർന്നു. ഇതിനിടെ ദുരന്തബാധിത ടിബറ്റ് മേഖലയിൽ 23 രാജ്യങ്ങളിൽ നിന്നുള്ള 261 വിദേശ പൗരന്മാരെ കാണാതായതായി ചൈന അറിയിച്ചു. ടിബറ്റിൽ മാത്രം 16 പേർ മരിച്ചതായും അധികൃതർ വ്യക്തമാക്കി.
ടിബറ്റ് സ്വയംഭരണ മേഖലാ അധികൃതർ ഞായറാഴ്ച നടത്തിയ വാർത്താസമ്മേളനത്തിലാണ് കണക്കുകൾ പുറത്തുവിട്ടത്. കാണാതായ വിദേശ പൗരന്മാരിൽ ഏറ്റവും കൂടുതൽ പേർ നേപ്പാളിൽ നിന്നുള്ളവരാണ്. 104 നേപ്പാൾ പൗരന്മാരെയാണ് കാണാതായത്. ഇന്ത്യയിൽ നിന്നുള്ള 49 പേരെയും ലാത്വിയയിൽ നിന്നുള്ള 33 പേരെയും അമേരിക്കയിൽ നിന്നുള്ള 18 പേരെയും ബ്രിട്ടനിൽ നിന്നുള്ള 15 പേരെയും കാണാതായതായി അധികൃതർ അറിയിച്ചു. സംഭവവിവരം വിദേശരാജ്യങ്ങളുടെ നയതന്ത്ര പ്രതിനിധികളെ അറിയിച്ചതായും ചൈന വ്യക്തമാക്കി.
ഇതിനിടെ നേപ്പാളിൽ വീണ്ടും പ്രളയ മുന്നറിയിപ്പ് നൽകി. ഭോട്ടെ കോശി നദിയിലെ ജലനിരപ്പ് ഉയരുകയാണ്. മുന്നറിയിപ്പിനെ തുടർന്ന് ഇന്ന് പുലർച്ചെ മാധ്യമപ്രവർത്തകർ ഉൾപ്പെടെ നിരവധി പേരെ പ്രദേശത്തുനിന്ന് മാറ്റി. നേപ്പാളിൽ ഏകദേശം 2,426 പേരെയും ടിബറ്റിലെ ഗ്വിറോങ് കൗണ്ടിയിൽ 554 പേരെയും ഉൾപ്പെടെ ഏകദേശം 3,000 പേരെയാണ് കാണാതായിരിക്കുന്നത്. കാണാതായവരിൽ കുറഞ്ഞത് 540 പേർ വിദേശ പൗരന്മാരാണ്. ഇവരിൽ ഭൂരിഭാഗവും ഇന്ത്യയിൽ നിന്നുള്ള തീർഥാടകരാണെന്നാണ് വിവരം.
മിന്നൽ പ്രളയത്തെ തുടർന്ന് നേരിടുന്ന ഊർജ പ്രതിസന്ധി ഒഴിവാക്കാൻ നേപ്പാൾ ഇന്ത്യയുടെ സഹായം തേടി. മുൻകൂറായി വൈദ്യുതി ഇറക്കുമതി ചെയ്യാൻ അനുമതി തേടിയിട്ടുണ്ട്. നേപ്പാളിലെ 13 ജലവൈദ്യുത നിലയങ്ങൾ പൂർണമായോ ഭാഗികമായോ തകർന്നതോടെ വൈദ്യുതി ഉൽപ്പാദനത്തിൽ 550 മെഗാവാട്ടിന്റെ കുറവുണ്ടായി. നിലവിലെ ഉഭയകക്ഷി കരാറുകൾ പ്രകാരമാണ് നേപ്പാളിന്റെ അപേക്ഷയെന്നാണ് ഇന്ത്യൻ അധികൃതർ വ്യക്തമാക്കുന്നത്.
അതിനിടെ നേപ്പാളിൽ കുടുങ്ങിയ 36 അംഗ മലയാളി സംഘം കൊച്ചിയിൽ തിരിച്ചെത്തി. പുലർച്ചെ 2.15ന് കൊച്ചി അന്താരാഷ്ട്ര വിമാനത്താവളത്തിലാണ് സംഘം എത്തിയത്. കണ്ണൂർ, കാസർഗോഡ്, കോട്ടയം, എറണാകുളം സ്വദേശികളാണ് ഒരാഴ്ചത്തെ ടൂർ പാക്കേജിന്റെ ഭാഗമായി നേപ്പാളിലെത്തിയത്. കൺമുന്നിൽ കണ്ട ദുരന്തത്തിന്റെ ഞെട്ടലിലാണ് സംഘം. സമീപത്തെ അമ്പലത്തിൽ കയറിയതിനാൽ മാത്രമാണ് ദുരന്തത്തിൽപ്പെടാതെ രക്ഷപ്പെട്ടതെന്ന് യാത്രാസംഘാംഗങ്ങൾ പറഞ്ഞു.
നേപ്പാൾ-ചൈന അതിർത്തി മേഖലയിൽ കാണാതായവർക്കായുള്ള തിരച്ചിൽ രക്ഷാപ്രവർത്തകർ തുടരുകയാണ്. ഹിമാനി തകർന്നതിനെ തുടർന്നുണ്ടായ അതിശക്തമായ മലവെള്ളപ്പാച്ചിലും മണ്ണിടിച്ചിലും നിരവധി ജനവാസമേഖലകളെയാണ് തകർത്തത്. നിരവധി പാലങ്ങൾ തകർന്നതിനു പുറമെ ഏകദേശം 40 കിലോമീറ്റർ റോഡുകൾക്കും കേടുപാടുകൾ സംഭവിച്ചു. അടിസ്ഥാന സൗകര്യങ്ങൾ തകർന്നത് രക്ഷാപ്രവർത്തനത്തിന് വലിയ വെല്ലുവിളിയാണെന്ന് നേപ്പാൾ അധികൃതർ അറിയിച്ചു.
ദുരന്തത്തിന്റെ വ്യാപ്തി കണക്കിലെടുത്ത് വിദഗ്ധരായ വിദേശ സംഘങ്ങളുടെ സഹായവും നേപ്പാൾ തേടിയിട്ടുണ്ട്. രാജ്യത്തിന്റെ പുനർനിർമാണത്തിന് ഏകദേശം 4 മുതൽ 5 ബില്യൺ ഡോളർ വരെ ചെലവ് വരുമെന്ന് നേപ്പാൾ ധനമന്ത്രിയെ ഉദ്ധരിച്ച് റിപ്പോർട്ടുകളുണ്ട്.