കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിന് നേരെ ഇറാൻ നടത്തിയ മിസൈലാക്രമണത്തിൽ കൊല്ലപ്പെട്ടത് ഇന്ത്യക്കാരനാണെന്ന് സ്ഥിരീകരണം. മധ്യപ്രദേശ് സ്വദേശിയായ മൻസൂദ് അഹമ്മദ് റഹ്മാൻ (55) ആണ് മരിച്ചത്. കുവൈത്തിലെ ഇന്ത്യൻ എംബസിയാണ് മരണപ്പെട്ടത് ഇന്ത്യക്കാരനാണെന്ന വിവരം ഔദ്യോഗികമായി പുറത്തുവിട്ടത്. ഇദ്ദേഹത്തിന്റെ കുടുംബവുമായി നിരന്തരം സമ്പർക്കം പുലർത്തുന്നുണ്ടെന്നും മൃതദേഹം നാട്ടിലെത്തിക്കാനുള്ള നടപടികൾ ആരംഭിച്ചതായും എംബസി വ്യക്തമാക്കി. ആക്രമണത്തിൽ പരിക്കേറ്റ 63 പേരിൽ മൂന്ന് ഇന്ത്യക്കാരുമുണ്ട്. പരിക്കേറ്റവർ നിലവിൽ കുവൈത്തിലെ ആറ് പ്രമുഖ ആശുപത്രികളിലായി ചികിത്സയിലാണ്. ഇവരിൽ ഏഴ് പേരുടെ നില അതീവ ഗുരുതരമാണെന്നും അവർക്ക് അടിയന്തര ശസ്ത്രക്രിയകൾ വേണ്ടിവന്നതായും ആശുപത്രി അധികൃതർ അറിയിച്ചു.
അതിനിടെ, തങ്ങളുടെ പരമാധികാരത്തിന് നേരെ ഇറാൻ നടത്തിയ ബാലിസ്റ്റിക് മിസൈൽ-ഡ്രോൺ ആക്രമണത്തെ കുവൈത്ത് ഭരണകൂടം ശക്തമായ ഭാഷയിൽ അപലപിച്ചു. ആക്രമണത്തിന് ശക്തമായ തിരിച്ചടി നൽകുമെന്ന സൂചനയും കുവൈത്ത് നൽകിയിട്ടുണ്ട്. വിമാനത്താവളത്തിന് പുറമെ കുവൈത്തിലെ ചില വിദേശ നയതന്ത്ര മിഷൻ ഓഫീസുകൾക്ക് നേരെയും ആക്രമണമുണ്ടായതായാണ് വിവരം. ഹോർമുസ് കടലിടുക്കിലെ ഇറാന്റെ സൈനിക താവളങ്ങൾക്ക് നേരെ അമേരിക്ക നടത്തിയ വ്യോമാക്രമണത്തിന് പ്രതികാരമായാണ് കുവൈത്തിലെയും ബഹ്റൈനിലെയും കേന്ദ്രങ്ങളെ ലക്ഷ്യമിട്ട് ഇറാൻ മിസൈൽ വർഷം നടത്തിയത്.
ആക്രമണത്തെത്തുടർന്ന് കുവൈത്ത് വിമാനത്താവളത്തിന്റെ പ്രവർത്തനം പൂർണ്ണമായും നിർത്തിവെച്ചിരിക്കുകയാണ്. ഇതോടെ കേരളത്തിൽ നിന്നുള്ളവയുൾപ്പെടെ നിരവധി വിമാന സർവീസുകൾ തടസ്സപ്പെടുകയും പലതും സുരക്ഷിത താവളങ്ങളിലേക്ക് വഴിതിരിച്ചുവിടുകയും ചെയ്തു. കോഴിക്കോട്ട് നിന്നും കുവൈത്തിലേക്ക് പുറപ്പെട്ട എയർ ഇന്ത്യ എക്സ്പ്രസ് വിമാനം (IX 393) യാത്രയ്ക്കിടെ പകുതി വഴിയിൽ വെച്ച് അടിയന്തരമായി കോഴിക്കോട്ടേക്ക് തന്നെ തിരിച്ചുവിട്ടു. കൊച്ചി നെടുമ്പാശ്ശേരി വിമാനത്താവളത്തിൽ നിന്നുള്ള രണ്ട് പ്രധാന സർവീസുകൾ പൂർണ്ണമായി റദ്ദാക്കി. കൊച്ചിയിൽ നിന്നും ബഹ്റൈനിലേക്ക് 122 യാത്രക്കാരുമായി പുറപ്പെടാനൊരുങ്ങിയ എയർ ഇന്ത്യ എക്സ്പ്രസ് വിമാനവും രാത്രി 9.45-നുള്ള ഇൻഡിഗോയുടെ സർവീസുമാണ് റദ്ദാക്കിയത്. ഗൾഫ് മേഖലയിൽ വ്യോമപാതകൾ അനിശ്ചിതത്വത്തിലായതോടെ വരും ദിവസങ്ങളിലും സർവീസുകൾ മുടങ്ങാൻ സാധ്യതയുണ്ട്.