കുവൈത്തിലേക്ക് വൻതോതിൽ മയക്കുമരുന്ന് കടത്താനുള്ള ശ്രമം കസ്റ്റംസ് ഉദ്യോഗസ്ഥർ തടഞ്ഞു. ഈജിപ്തിൽ നിന്ന് എത്തിയ യാത്രക്കാരന്റെ ലഗേജിൽ കോഴിയിറച്ചിക്കുള്ളിൽ അതീവ രഹസ്യമായി ഒളിപ്പിച്ച നിലയിൽ മെത്താംഫെറ്റാമൈൻ (ക്രിസ്റ്റൽ മെത്ത്) എന്ന മാരക മയക്കുമരുന്നാണ് കുവൈത്ത് അന്താരാഷ്ട്ര വിമാനത്താവളത്തിലെ ടെർമിനൽ 5-ൽ നടത്തിയ പരിശോധനയിൽ കണ്ടെത്തിയത്.
പതിവ് യാത്രാ പരിശോധനയ്ക്കിടെ ഒരു യാത്രക്കാരന്റെ ലഗേജിൽ ഉദ്യോഗസ്ഥർക്ക് സംശയം തോന്നുകയായിരുന്നു. തുടർന്ന് നടത്തിയ വിശദമായ പരിശോധനയിലാണ് കോഴിയിറച്ചിക്കുള്ളിൽ ഒളിപ്പിച്ച മയക്കുമരുന്ന് കണ്ടെത്തിയത്. കസ്റ്റംസ് പരിശോധന മറികടക്കാൻ വ്യത്യസ്തമായ രീതിയിലാണ് പ്രതി മയക്കുമരുന്ന് ഒളിപ്പിച്ചിരുന്നത്.
പിടിച്ചെടുത്ത മയക്കുമരുന്ന് നിയമപരമായ നടപടികൾ പാലിച്ച് സുരക്ഷിതമായി കസ്റ്റഡിയിലെടുത്തതായി അധികൃതർ അറിയിച്ചു. സംഭവത്തിൽ ഔദ്യോഗിക റിപ്പോർട്ട് തയ്യാറാക്കി വരികയാണെന്നും പ്രതിയെയും പിടിച്ചെടുത്ത ലഹരിമരുന്നും തുടർ നടപടികൾക്കായി ജനറൽ അഡ്മിനിസ്ട്രേഷൻ ഫോർ ഡ്രഗ് കൺട്രോളിന് കൈമാറുമെന്നും കസ്റ്റംസ് അധികൃതർ വ്യക്തമാക്കി.
അതിർത്തികളിലും വിമാനത്താവളങ്ങളിലും കസ്റ്റംസ് പരിശോധനാ സംഘത്തിന്റെ ജാഗ്രതയും, ലഹരിക്കടത്തുകാർ സ്വീകരിക്കുന്ന പുതിയ തന്ത്രങ്ങൾ കണ്ടെത്താനുള്ള ഉദ്യോഗസ്ഥരുടെ കഴിവും തെളിയിക്കുന്ന സംഭവമാണിതെന്ന് അധികൃതർ കൂട്ടിച്ചേർത്തു.