കൊട്ടാരക്കര നീലേശ്വരത്ത് ടിപ്പർ ലോറി ബസ് സ്റ്റോപ്പിലേക്ക് ഇടിച്ചുകയറി മൂന്ന് നിരപരാധികളുടെ ജീവൻ കവർന്ന ദുരന്തം കേരളത്തെ വീണ്ടും ഞെട്ടിച്ചിരിക്കുകയാണ്. അപകടത്തിൽ നിരവധി പേർക്ക് ഗുരുതര പരിക്കേറ്റതും ചികിത്സയിൽ തുടരേണ്ടി വന്നതും ഈ ദുരന്തത്തിന്റെ വ്യാപ്തി വ്യക്തമാക്കുന്നു. ഓരോ റോഡപകടത്തിനും ശേഷം പതിവായി ഉയരുന്ന ചോദ്യങ്ങൾ തന്നെയാണ് വീണ്ടും സമൂഹം ചോദിക്കുന്നത്. എത്ര ജീവനുകൾ കൂടി നഷ്ടപ്പെട്ടാൽ മാത്രമാണ് റോഡുകളിലെ മരണവേഗത്തിന് നിയന്ത്രണം വരിക?. പ്രാഥമിക വിവരങ്ങൾ പ്രകാരം അമിതവേഗമാണ് അപകടത്തിന് കാരണമെന്ന് വ്യക്തമാണ്. എന്നാൽ ഇത് ഒറ്റപ്പെട്ട ഒരു അപകടമെന്ന നിലയിൽ കാണാൻ കഴിയില്ല. വർഷങ്ങളായി കേരളത്തിലെ റോഡുകളിൽ ടിപ്പർ ലോറികളുടെ അമിതവേഗവും അശ്രദ്ധമായ ഡ്രൈവിംഗും പൊതുജനങ്ങളുടെ ഭയത്തിനും പ്രതിഷേധത്തിനും കാരണമായിട്ടുണ്ട്. പലപ്പോഴും വിദ്യാർഥികളും കാൽനടയാത്രക്കാരും സാധാരണ യാത്രക്കാരുമാണ് ഇത്തരം അപകടങ്ങളുടെ ഇരകളാകുന്നത്. റോഡുകൾ വാഹനങ്ങൾക്ക് മാത്രമുള്ളതല്ല. അവ ജനങ്ങളുടേതാണ്.
സ്കൂളിലേക്ക് പോകുന്ന കുട്ടികൾക്കും ജോലിക്ക് പോകുന്ന തൊഴിലാളികൾക്കും ചികിത്സയ്ക്കായി യാത്ര ചെയ്യുന്ന രോഗികൾക്കും സുരക്ഷിതമായി ഉപയോഗിക്കാനുള്ള പൊതുസമ്പത്താണ് റോഡുകൾ. എന്നാൽ ചില ടിപ്പർ ലോറികൾ റോഡുകളെ സ്വന്തം സ്വത്തായി കണക്കാക്കി മരണവേഗത്തിൽ പായുന്ന കാഴ്ചയാണ് പലപ്പോഴും കാണുന്നത്. ഒരു നിമിഷത്തെ അശ്രദ്ധ നിരവധി കുടുംബങ്ങളുടെ ജീവിതകാലത്തെ വേദനയായി മാറുന്നു. സംസ്ഥാന സർക്കാർ, ജില്ലാ ഭരണകൂടങ്ങൾ, ഗതാഗത വകുപ്പ് എന്നിവ ടിപ്പർ ലോറികളുടെ യാത്രാസമയവും നിയന്ത്രണങ്ങളും സംബന്ധിച്ച് നിരവധി നിർദേശങ്ങൾ നൽകിയിട്ടുണ്ട്. സ്കൂൾ തുറക്കുന്നതിന് മുൻപ് തന്നെ ഉടമകളുടെയും ഡ്രൈവർമാരുടെയും യോഗങ്ങൾ വിളിച്ച് സുരക്ഷാ നിർദേശങ്ങൾ നൽകുകയും ചെയ്തിരുന്നു. ഭൂരിഭാഗം ഡ്രൈവർമാരും ഈ നിർദേശങ്ങൾ പാലിക്കുന്നുണ്ടെങ്കിലും ഒരു ന്യൂനപക്ഷത്തിന്റെ നിരുത്തരവാദപരമായ സമീപനമാണ് ഇത്തരം ദുരന്തങ്ങൾക്ക് വഴിവെക്കുന്നത്.
നിയമങ്ങൾ ഉണ്ടാക്കുന്നത് മാത്രം പോരാ; അവ കർശനമായി നടപ്പാക്കുകയും വേണം. അമിതവേഗം, അനധികൃത ഓട്ടം, രേഖകളില്ലാത്ത വാഹനങ്ങൾ, സുരക്ഷാ മാനദണ്ഡങ്ങളുടെ ലംഘനം എന്നിവയിൽ യാതൊരു വിട്ടുവീഴ്ചയും ഉണ്ടാകരുത്. സ്പീഡ് ഗവർണറുകൾ, ജിപിഎസ് നിരീക്ഷണം, ഓട്ടോമാറ്റിക് ക്യാമറകൾ, കർശന പിഴകൾ, ലൈസൻസ് റദ്ദാക്കൽ തുടങ്ങി നിലവിലുള്ള സംവിധാനങ്ങൾ കൂടുതൽ കാര്യക്ഷമമായി നടപ്പാക്കണം. നിയമലംഘകരെ രാഷ്ട്രീയമോ സാമ്പത്തികമോ ആയ സ്വാധീനങ്ങളുടെ പേരിൽ സംരക്ഷിക്കുന്ന സമീപനവും അവസാനിപ്പിക്കണം. റോഡപകടങ്ങൾ വെറും കണക്കുകളല്ല. ഓരോ മരണത്തിനും പിന്നിൽ തകർന്ന സ്വപ്നങ്ങളും തകർന്ന കുടുംബങ്ങളുമുണ്ട്. രാവിലെ വീട്ടിൽ നിന്ന് യാത്ര തിരിക്കുന്ന ഒരാൾ വൈകുന്നേരം സുരക്ഷിതമായി മടങ്ങിയെത്തുമെന്ന പ്രതീക്ഷയിലാണ് ഓരോ കുടുംബവും ജീവിക്കുന്നത്.
ആ പ്രതീക്ഷകളെ ചവിട്ടിമെതിക്കുന്ന തരത്തിൽ റോഡുകളെ മരണപ്പാതകളാക്കി മാറ്റാൻ ആർക്കും അവകാശമില്ല. കൊട്ടാരക്കരയിലെ ദുരന്തം മറ്റൊരു വാർത്തയായി മാത്രം മാറരുത്. ഇത് ഒരു മുന്നറിയിപ്പായി കാണണം. നിയമം ഭയപ്പെടാത്തവരെ നിയമം ഭയപ്പെടുത്തണം. റോഡുകളെ മനുഷ്യരക്തം ചിന്തുന്ന യുദ്ധഭൂമികളാക്കുന്ന മരണവ്യാപാരികൾക്കെതിരെ മാതൃകാപരമായ നടപടികൾ സ്വീകരിക്കണം. നിരപരാധികളുടെ ജീവൻ കാക്കാൻ ഭരണകൂടവും നിയമസംവിധാനങ്ങളും ഇനി കൂടുതൽ ശക്തമായി ഇടപെടേണ്ട സമയമാണിത്. ഇനിയും ഒരു കുടുംബം കൂടി കണ്ണീരിലാകാതിരിക്കണമെങ്കിൽ, റോഡുകളിലെ മരണവേഗത്തിന് ഇപ്പോൾ തന്നെ അറുതി വരണം.