തിരുവനന്തപുരം: കിഫ്ബിയുടെ പ്രവർത്തനങ്ങളിൽ നിയന്ത്രണം ഏർപ്പെടുത്താനുള്ള സംസ്ഥാന സർക്കാരിന്റെ നീക്കത്തിനെതിരെ വിമർശനം ശക്തമാക്കി സിപിഐഎം സംസ്ഥാന സെക്രട്ടറി എം വി ഗോവിന്ദൻ. കിഫ്ബി പദ്ധതികൾ ഉപേക്ഷിക്കുന്നത് കേരളത്തിന്റെ വികസനത്തെ ഗുരുതരമായി ബാധിക്കുമെന്നും എല്ലാം സ്വകാര്യവൽക്കരിക്കാനാണ് യുഡിഎഫ് ശ്രമിക്കുന്നതെന്നും അദ്ദേഹം ആരോപിച്ചു. കിഫ്ബി പദ്ധതികൾ ഇനി എങ്ങനെ മുന്നോട്ടുപോകുമെന്ന് മുഖ്യമന്ത്രി വ്യക്തമാക്കണമെന്ന് മുൻ ധനമന്ത്രി കെ എൻ ബാലഗോപാലും ആവശ്യപ്പെട്ടു.
കഴിഞ്ഞ സർക്കാരിന്റെ കാലത്ത് കിഫ്ബി വഴി ഏകദേശം ഒരുലക്ഷം കോടി രൂപയുടെ പദ്ധതികൾ ആസൂത്രണം ചെയ്ത് നടപ്പാക്കിയതായാണ് എം വി ഗോവിന്ദൻ ചൂണ്ടിക്കാട്ടിയത്. ഈ പദ്ധതികളെല്ലാം വേണ്ടെന്നുവയ്ക്കുന്നത് വികസനത്തെ ബാധിക്കുന്ന ഗൗരവകരമായ തീരുമാനമായിരിക്കുമെന്നും അദ്ദേഹം പറഞ്ഞു. സർക്കാർ മാറിയെന്ന കാരണത്താൽ വികസനത്തിന് സഹായകരമായ പദ്ധതികൾ അവസാനിപ്പിക്കുന്നത് ശരിയായ നിലപാടല്ലെന്നും അദ്ദേഹം വിമർശിച്ചു.
കിഫ്ബി വലിയ അപകടമാണെന്നും അതിന്റെ പ്രവർത്തനം അവസാനിപ്പിക്കുമെന്നുമുള്ള മുഖ്യമന്ത്രിയുടെ പ്രഖ്യാപനത്തിൽ വ്യക്തത വേണമെന്ന് കെ എൻ ബാലഗോപാൽ ആവശ്യപ്പെട്ടു. കിഫ്ബി പദ്ധതികളുടെ ഭാവി എന്താണെന്ന് മുഖ്യമന്ത്രി വ്യക്തമാക്കണം. വി ഡി സതീശൻ മുൻകാലങ്ങളിൽ കിഫ്ബിയെക്കുറിച്ച് പറഞ്ഞ കാര്യങ്ങൾ റിപ്പോർട്ടായി പുറത്തുവന്നാൽ ആരും വിശ്വസിക്കില്ലെന്നും ബാലഗോപാൽ പരിഹസിച്ചു.
അതേസമയം, കിഫ്ബി സർക്കാരിന് വലിയ സാമ്പത്തിക ബാധ്യത സൃഷ്ടിക്കുന്നുവെന്നും നിലവിലെ രീതിയിൽ പ്രവർത്തനം തുടരേണ്ടതില്ലെന്നുമാണ് സുധാ പിള്ള അധ്യക്ഷയായ വിദഗ്ധ സമിതിയുടെ റിപ്പോർട്ടിലെ പ്രധാന നിർദേശങ്ങൾ. കിഫ്ബിയിൽ സമഗ്രമായ അഴിച്ചുപണി വേണമെന്നും റിപ്പോർട്ട് ശുപാർശ ചെയ്യുന്നു. കിഫ്ബി സർക്കാരിന് കടബാധ്യത വരുത്തിയിട്ടുണ്ടെന്ന് മുഖ്യമന്ത്രിയും നേരത്തേ വ്യക്തമാക്കിയിരുന്നു.
കിഫ്ബി ഇത്രയും കാലം സ്വതന്ത്രമായ സംവിധാനമായി പ്രവർത്തിച്ചെന്നും വരുമാനത്തിന്റെ 99.4 ശതമാനവും വായ്പ തിരിച്ചടവിനായി വിനിയോഗിച്ചെന്നും വി ഡി സതീശൻ ആരോപിച്ചിരുന്നു. കിഫ്ബിയുടെ കടമെടുപ്പ് സംസ്ഥാനത്തിന്റെ കടമെടുപ്പ് പരിധിയിൽനിന്ന് 25,932.55 കോടി രൂപ കുറയ്ക്കാൻ കാരണമായെന്നും അദ്ദേഹം കുറ്റപ്പെടുത്തിയിരുന്നു.
കിഫ്ബിയുടെ പ്രവർത്തനരീതിയിൽ മാറ്റം വരുത്താനുള്ള സർക്കാർ നീക്കം കേരളത്തിന്റെ വികസന പദ്ധതികളെ എങ്ങനെ ബാധിക്കുമെന്നതും നിലവിലുള്ള പദ്ധതികളുടെ ഭാവി എന്താകുമെന്നതുമാണ് ഇനി നിർണായകമാകുന്നത്.