തിരുവനന്തപുരം: ജിഎൻഎയുമായി വൈദ്യുതി വാങ്ങാൻ കെഎസ്ഇബി കരാറിലേർപ്പെട്ടിട്ടില്ലെന്ന് മുഖ്യമന്ത്രി. ഹിമാചൽ വൈദ്യുതിയിൽനിന്നും ജിഎൻഎയിൽനിന്നും രണ്ട് നിർദേശങ്ങളാണ് ലഭിച്ചതെന്നും ഇവയിൽ കൂടുതൽ ലാഭകരമെന്ന് വിലയിരുത്തിയാണ് ജിഎൻഎയെ പരിഗണിച്ചതെന്നും മുഖ്യമന്ത്രി വാർത്താസമ്മേളനത്തിൽ വ്യക്തമാക്കി. എന്നാൽ ഇതുവരെ കരാർ ഒപ്പിട്ടിട്ടില്ലെന്നും അദ്ദേഹം ആവർത്തിച്ചു. അതേസമയം, വൈദ്യുതി വാങ്ങൽ വിഷയം മന്ത്രിസഭാ യോഗത്തിൽ ചർച്ചയായില്ല.
ജിഎൻഎയുമായി വൈദ്യുതി ബോർഡ് കരാറുണ്ടാക്കിയിട്ടില്ലെന്നും സമ്മർദം ചെലുത്തി കരാർ ഒപ്പിടുവിക്കാനാണ് ശ്രമം നടന്നതെന്നും മുഖ്യമന്ത്രി പറഞ്ഞു. പത്ത് വർഷം അധികാരത്തിലിരുന്ന സർക്കാർ ഇക്കാര്യത്തിൽ എന്താണ് ചെയ്തതെന്ന് പ്രതിപക്ഷത്തോട് ചോദിച്ച അദ്ദേഹം, പ്രതിപക്ഷ നേതാവിന് ഏതെല്ലാം രേഖകളാണ് വേണ്ടതെന്നും ചോദിച്ചു. എല്ലാ കാര്യങ്ങളും കൃത്യമായാണ് നടക്കുന്നതെന്നും മുഖ്യമന്ത്രി അവകാശപ്പെട്ടു.
മുൻ മുഖ്യമന്ത്രി പിണറായി വിജയൻ വിഷയത്തിൽ പരസ്പരവിരുദ്ധമായ കാര്യങ്ങളാണ് പറയുന്നതെന്നും സിപിഎം സംസ്ഥാന സെക്രട്ടറി എം.വി. ഗോവിന്ദനും ഇപ്പോൾ ഇതിൽ ഇടപെട്ടിട്ടുണ്ടെന്നും മുഖ്യമന്ത്രി പരിഹസിച്ചു. ഗോവിന്ദന് വിഷയത്തിന്റെ യഥാർഥ സ്ഥിതി പോലും മനസ്സിലായിട്ടില്ലെന്നായിരുന്നു അദ്ദേഹത്തിന്റെ പ്രതികരണം.
അതേസമയം, നിയമനിർമാണ നടപടികൾക്കായി നവംബർ 30 മുതൽ ഡിസംബർ 10 വരെ നിയമസഭ സമ്മേളനം ചേരാനും മന്ത്രിസഭാ യോഗം തീരുമാനിച്ചു. യുഡിഎഫ് യോഗത്തിന്റെ തീയതി താൻ അറിയിക്കാമെന്ന് മുഖ്യമന്ത്രി വ്യക്തമാക്കിയെങ്കിലും അടൂർ പ്രകാശിന്റെ അഭിപ്രായങ്ങളോട് പ്രതികരിച്ചില്ല.