കൊച്ചി: വിപണിയിൽ അരിവില അനിയന്ത്രിതമായി ഉയരാൻ അനുവദിക്കില്ലെന്നും കൃത്രിമമായ വിലക്കയറ്റം തടയാൻ സർക്കാർ ഇടപെടുമെന്നും മന്ത്രി അനൂപ് ജേക്കബ്. അരിയുടെ പൊതുവിപണിയിലെ വില സർക്കാർ നിരീക്ഷിച്ചുവരികയാണെന്നും വില വർധിക്കുന്ന സാഹചര്യമുണ്ടായാൽ ലഭ്യത കൂട്ടുന്നതിനുള്ള നടപടികൾ സ്വീകരിക്കുമെന്നും മന്ത്രി വ്യക്തമാക്കി.
ഒഎംഎസ്എസ് നിരക്കിൽ ലഭിക്കുന്ന അരിയുടെ വിതരണം വർധിപ്പിക്കാനും നടപടികൾ പുരോഗമിക്കുകയാണ്. ഇതുസംബന്ധിച്ച് സിവിൽ സപ്ലൈസ് കമ്മീഷണർക്ക് പ്രത്യേക നിർദേശം നൽകിയിട്ടുണ്ട്. അരിയുടെ വില അനാവശ്യമായി ഉയരുന്ന സാഹചര്യം ഉണ്ടാകാതിരിക്കാൻ ആവശ്യമായ ഇടപെടലുകൾ നടത്തുമെന്നും മന്ത്രി പറഞ്ഞു.
എഥനോൾ ഉൽപ്പാദനം വർധിപ്പിക്കുന്നതിന്റെ ഭാഗമായി ഭക്ഷ്യസുരക്ഷയെ ബാധിക്കുന്ന സാഹചര്യം ഉണ്ടാകാൻ പാടില്ലെന്നും മന്ത്രി ചൂണ്ടിക്കാട്ടി. വിഷയത്തിൽ കേന്ദ്രസർക്കാരിന്റെ ശ്രദ്ധയിൽ ആശങ്കകൾ കൊണ്ടുവരും. കേന്ദ്രത്തിന്റെ ഇടപെടൽ ഉണ്ടാകുമെന്നാണ് പ്രതീക്ഷയെന്നും അദ്ദേഹം പറഞ്ഞു.
അതേസമയം, ഇ20 പെട്രോളിന്റെ ഗുണനിലവാര പരിശോധനയുമായി ബന്ധപ്പെട്ടും മന്ത്രി പ്രതികരിച്ചു. പരിശോധനയ്ക്കായി ശേഖരിച്ച സാമ്പിളുകൾ കെമിക്കൽ ലാബിൽ നൽകിയിട്ടുണ്ട്. പത്തുദിവസത്തിനകം പരിശോധനാ റിപ്പോർട്ട് ലഭിക്കുമെന്നാണ് പ്രതീക്ഷ. നിശ്ചിത മാനദണ്ഡങ്ങൾ പാലിച്ചാണ് സാമ്പിളുകൾ ശേഖരിച്ചതെന്നും വിഷയത്തെ മുൻവിധിയോടെ സമീപിക്കുന്നില്ലെന്നും മന്ത്രി കൂട്ടിച്ചേർത്തു.