മലയാളത്തിൽ വേരുകളുള്ള ഒരു മനുഷ്യന്റെ ബഹിരാകാശ യാത്രയ്ക്ക് ഇനി നാല് നാൾ മാത്രം. പാതി മലയാളിയും നാസയുടെ ബഹിരാകാശ സഞ്ചാരിയുമായ ഡോ. അനിൽ മേനോൻ ജൂലൈ 15ന് റഷ്യയുടെ സൊയൂസ് എംഎസ്-29 ദൗത്യത്തിലൂടെ അന്താരാഷ്ട്ര ബഹിരാകാശ നിലയത്തിലേക്ക് (ISS) യാത്രതിരിക്കും. എട്ട് മാസം നീളുന്ന ദൗത്യമാണ് അനിലിന് മുന്നിലുള്ളത്.
ജൂലൈ 15ന് വിക്ഷേപണം
ഡോ. അനിൽ മാധവൻ സമോയ്ലെൻകോ മേനോൻ—ഡോക്ടർ, സൈനികൻ, പൈലറ്റ്, ബഹിരാകാശ സഞ്ചാരി. ഒറ്റപ്പാലം സ്വദേശിയായ കെ.പി. ശങ്കരൻ മേനോന്റെയും യുക്രെയ്ൻ സ്വദേശിനിയായ എലിസബത്ത് സമോയ്ലെൻകോയുടെയും മകനാണ് അദ്ദേഹം.
ജൂലൈ 15ന് കസാഖിസ്ഥാനിലെ ബൈക്കനൂർ കോസ്മോഡ്രോമിൽ നിന്ന് സൊയൂസ് എംഎസ്-29 പേടകം വിക്ഷേപിക്കുമ്പോൾ ഫ്ലൈറ്റ് എൻജിനിയറുടെ സീറ്റിൽ അനിൽ മേനോൻ ഉണ്ടാകും. അന്താരാഷ്ട്ര ബഹിരാകാശ നിലയത്തിലെ എക്സ്പെഡിഷൻ 74ന്റെ ഭാഗമായാണ് അദ്ദേഹം എട്ട് മാസത്തെ ദൗത്യത്തിന് പോകുന്നത്. അടുത്ത വർഷം ഏപ്രിലിലാണ് മടക്കയാത്ര.
വർഷങ്ങളുടെ തയ്യാറെടുപ്പിന് പിന്നാലെ
മിനിയാപ്പോളിസിൽ ജനിച്ച അനിൽ മേനോൻ ഹാർവാർഡ് സർവകലാശാലയിൽ നിന്ന് ന്യൂറോബയോളജിയിൽ ബിരുദവും സ്റ്റാൻഫോർഡ് സർവകലാശാലയിൽ നിന്ന് മെക്കാനിക്കൽ എൻജിനിയറിങ്ങിൽ മാസ്റ്റേഴ്സ് ബിരുദവും നേടി. അമേരിക്കൻ വ്യോമസേനയിൽ കേണലായും സേവനമനുഷ്ഠിച്ചു.
തുടർന്ന് സ്റ്റാൻഫോർഡിൽ നിന്ന് വൈദ്യശാസ്ത്ര ബിരുദം നേടിയ അദ്ദേഹം നാസയിൽ സോഫ്റ്റ് ടിഷ്യു മോഡലുകളെ കുറിച്ചുള്ള ഗവേഷണങ്ങളിലും പ്രവർത്തിച്ചു. ആയിരത്തിലധികം മണിക്കൂർ പറന്ന അനുഭവമുള്ള സർട്ടിഫൈഡ് ഫ്ലൈറ്റ് ഇൻസ്ട്രക്ടറായ അനിൽ, പിന്നീട് നാസയിൽ ഫ്ലൈറ്റ് സർജനായും സ്പേസ് എക്സിന്റെ ആദ്യ മനുഷ്യ ബഹിരാകാശ ദൗത്യങ്ങളിൽ ഫ്ലൈറ്റ് സർജനായും പ്രവർത്തിച്ചു.
ബഹിരാകാശ വൈദ്യശാസ്ത്രവുമായി ബന്ധപ്പെട്ട ഇരുപതിലധികം ഗവേഷണ പ്രബന്ധങ്ങൾ രചിച്ച അദ്ദേഹം, 2021-ൽ നാസയുടെ 23-ാമത് ആസ്ട്രനോട്ട് ഗ്രൂപ്പിലേക്ക് തെരഞ്ഞെടുക്കപ്പെട്ടു. ഇത്തവണത്തെ ദൗത്യത്തിൽ വൈദ്യശാസ്ത്രവുമായി ബന്ധപ്പെട്ട വിവിധ പരീക്ഷണങ്ങളാണ് അദ്ദേഹം നടത്തുക.
ബഹിരാകാശ സഞ്ചാരികളായ ദമ്പതികൾ
അനിൽ മേനോന്റെ ഭാര്യ അന്ന മേനോനും ബഹിരാകാശ സഞ്ചാരിയാണ്. സ്പേസ് എക്സിന്റെ ഇൻസ്പിരേഷൻ4 ദൗത്യത്തിന്റെ ഭാഗമായിരുന്ന അന്ന, പിന്നീട് നാസയുടെ 24-ാമത് ആസ്ട്രനോട്ട് ഗ്രൂപ്പിലേക്ക് തെരഞ്ഞെടുക്കപ്പെട്ടു. ദമ്പതികൾക്ക് രണ്ട് മക്കളുണ്ട്.
ആർട്ടെമിസ് പദ്ധതിയിലൂടെ ചാന്ദ്ര ദൗത്യങ്ങൾ സജീവമാകുന്ന സാഹചര്യത്തിൽ അനിലും അന്നയും ഭാവിയിൽ വീണ്ടും ബഹിരാകാശ യാത്ര നടത്താൻ സാധ്യതയുണ്ട്. ഇരുവരിലൊരാൾ ചന്ദ്രനിലിറങ്ങാനും സാധ്യത കൂടുതലാണെന്നാണ് വിലയിരുത്തൽ.
ഇന്ത്യൻ സമയം വൈകിട്ട് 8.17നാണ് സൊയൂസ് എംഎസ്-29യുടെ വിക്ഷേപണം. വിക്ഷേപണവും ഐഎസ്എസിലേക്കുള്ള ഡോക്കിംഗും ലോകമെമ്പാടുമുള്ള ബഹിരാകാശ പ്രേമികൾ ആകാംക്ഷയോടെ കാത്തിരിക്കുകയാണ്.