തിരുവനന്തപുരം: സിഎംആര്എല്–എക്സാലോജിക് കേസുമായി ബന്ധപ്പെട്ട് നടന്ന ഇ.ഡി പരിശോധനയ്ക്കു പിന്നാലെ തലസ്ഥാനത്ത് സംഘര്ഷാവസ്ഥ. ഇ.ഡി ഉദ്യോഗസ്ഥര് സഞ്ചരിച്ച വാഹനം ആക്രമിക്കപ്പെട്ട സംഭവത്തില് പ്രതിഷേധത്തിനിടെ സിപിഎം നേതാവ് എം.എ. ബേബിയെ പൊലീസ് കസ്റ്റഡിയിലെടുത്തു.
മുൻ മുഖ്യമന്ത്രി പിണറായി വിജയന്റെ വസതിയില് പരിശോധന പൂര്ത്തിയാക്കി ഇ.ഡി സംഘം മടങ്ങുന്നതിനിടെയായിരുന്നു പ്രതിഷേധം ശക്തമായത്. സ്ഥലത്ത് ഒത്തുകൂടിയ സിപിഎം പ്രവര്ത്തകര് മുദ്രാവാക്യം വിളിച്ച് പ്രതിഷേധം നടത്തുകയും തുടര്ന്ന് ഇ.ഡി ഉദ്യോഗസ്ഥരുടെ വാഹനത്തിന് നേരെ ആക്രമണമുണ്ടായെന്നുമാണ് വിവരം. വാഹനത്തിന്റെ ചില്ലുകള് തകര്ന്നതായും ഉദ്യോഗസ്ഥര്ക്ക് സുരക്ഷാ വളയം ഒരുക്കിയാണ് സ്ഥലത്ത് നിന്ന് മാറ്റിയതെന്നും റിപ്പോര്ട്ടുകളുണ്ട്.
സംഭവസ്ഥലത്ത് പൊലീസും പ്രവര്ത്തകരും തമ്മില് ഉന്തുംതള്ളും ഉണ്ടായി. സ്ഥിതി നിയന്ത്രണവിധേയമാക്കാന് പൊലീസ് ഇടപെടുകയും ചിലരെ സ്ഥലത്ത് നിന്ന് മാറ്റുകയും ചെയ്തു. പ്രതിഷേധത്തിനിടെ എത്തിയ എം.എ. ബേബിയെ പൊലീസ് കസ്റ്റഡിയിലെടുത്തതായാണ് വിവരം.
ഇ.ഡി നടപടിക്കെതിരെ സിപിഎം നേതൃത്വം രാഷ്ട്രീയ പ്രതിഷേധം ശക്തമാക്കിയിട്ടുണ്ട്. കേന്ദ്ര ഏജൻസികളെ ഉപയോഗിച്ച് പ്രതിപക്ഷ നേതാക്കളെ ലക്ഷ്യമിടുന്നുവെന്ന ആരോപണമാണ് സിപിഎം ഉയര്ത്തുന്നത്. അതേസമയം, നിയമാനുസൃതമായ അന്വേഷണ നടപടികളാണ് നടക്കുന്നതെന്ന നിലപാടിലാണ് അന്വേഷണ ഏജൻസികൾ.
സംഭവവുമായി ബന്ധപ്പെട്ട് പൊലീസ് കൂടുതല് അന്വേഷണം ആരംഭിച്ചിട്ടുണ്ട്.