സാനോ: ക്രിക്കറ്റ് ലോകത്തെ ഞെട്ടിച്ച ചരിത്ര പോരാട്ടത്തിൽ കരുത്തരായ ഇന്ത്യയെ അവസാന നിമിഷം വരെ മുൾമുനയിൽ നിർത്തി ജപ്പാൻ കീഴടങ്ങി. മഴ കാരണം 5 ഓവറാക്കി ചുരുക്കിയ മത്സരത്തിൽ ഒരുവേള ജപ്പാൻ അട്ടിമറി വിജയം നേടുമെന്ന് തോന്നിപ്പിച്ചെങ്കിലും, ഒടുവിൽ 2 റൺസിന്റെ നാടകീയ ജയം ഇന്ത്യ സ്വന്തമാക്കുകയായിരുന്നു.
ടോസ് നേടി ബാറ്റിംഗിനിറങ്ങിയ ഇന്ത്യയെ കൃത്യതയാർന്ന പന്തുകളിലൂടെ ജപ്പാൻ 5 ഓവറിൽ 4 വിക്കറ്റ് നഷ്ടത്തിൽ 32 റൺസിലൊതുക്കി. ഇന്ത്യൻ ബാറ്റിംഗ് നിരയിൽ ഒരാൾക്ക് പോലും സിക്സർ നേടാനായില്ല; ആകെ പിറന്നത് 2 ഫോറുകൾ മാത്രം. 16 റൺസെടുത്ത ക്യാപ്റ്റൻ ശ്രേയസ് അയ്യരാണ് ടോപ് സ്കോറർ. സഞ്ജു സാംസൺ 9 റൺസും ഇഷാൻ കിഷൻ 3 റൺസുമെടുത്ത് പുറത്തായി. സൂപ്പർ താരം അഭിഷേക് ശർമ്മ ഗോൾഡൻ ഡക്കായി മടങ്ങിയത് ഇന്ത്യൻ ആരാധകരെ അമ്പരപ്പിച്ചു. തിലക് വർമ്മ (1), ശിവം ദുബെ (0) എന്നിവർ പുറത്താകാതെ നിന്നു.
33 റൺസ് വിജയലക്ഷ്യവുമായി മറുപടി ബാറ്റിംഗിനിറങ്ങിയ ജപ്പാൻ പോരാട്ടവീര്യം പുറത്തെടുത്തെങ്കിലും 5 ഓവറിൽ 3 വിക്കറ്റ് നഷ്ടത്തിൽ 30 റൺസെടുക്കാനേ സാധിച്ചുള്ളൂ. 12 റൺസെടുത്ത ക്യാപ്റ്റൻ കെൻഡൽ കഡോവാകി ഫ്ലെമിംഗും 9 റൺസുമായി പുറത്താകാതെ നിന്ന ബെഞ്ചമിൻ ഇറ്റോ ഡേവിസുമാണ് ജപ്പാനായി മികച്ച പോരാട്ടം നടത്തിയത്. ഇന്ത്യക്കായി വാഷിംഗ്ടൺ സുന്ദർ രണ്ട് വിക്കറ്റ് വീഴ്ത്തി.