ഉടൻ നടപ്പാക്കാത്തതിൽ പ്രതിഷേധിച്ച് എറണാകുളം യൂണിയൻ യോഗം ബഹിഷ്കരിച്ചു; തീരുമാനത്തിന് പിന്നിൽ രാഷ്ട്രീയ ലക്ഷ്യമെന്ന് ആരോപണം
തിരുവനന്തപുരം: സംസ്ഥാനത്ത് മിൽമ പാലിന് ലിറ്ററിന് നാല് രൂപ വർദ്ധിപ്പിക്കാൻ മിൽമ ബോർഡ് യോഗത്തിൽ ധാരണയായി. എന്നാൽ തിരഞ്ഞെടുപ്പ് പെരുമാറ്റച്ചട്ടം നിലനിൽക്കുന്നതിനാൽ പുതുക്കിയ വില ഉടൻ പ്രാബല്യത്തിൽ വരില്ല. ലിറ്ററിന് മൂന്ന് മുതൽ ആറ് രൂപ വരെ വർദ്ധിപ്പിക്കണമെന്നായിരുന്നു വിവിധ യൂണിയനുകളുടെ ആവശ്യം. എന്നാൽ നിലവിലെ സാഹചര്യത്തിൽ വില കൂട്ടുന്നത് പെരുമാറ്റച്ചട്ട ലംഘനമാകുമോ എന്ന ആശങ്കയിലാണ് ബോർഡ്. ഇക്കാര്യത്തിൽ വ്യക്തത തേടി തിരഞ്ഞെടുപ്പ് കമ്മീഷന് കത്തയച്ചിരുന്നെങ്കിലും അനുകൂല മറുപടി ലഭിക്കാത്ത സാഹചര്യത്തിലാണ് തീരുമാനം നീട്ടിവെച്ചത്.
അതേസമയം, വില വർദ്ധനവ് വൈകിപ്പിക്കുന്നതിന് പിന്നിൽ രാഷ്ട്രീയ ലക്ഷ്യങ്ങളുണ്ടെന്ന ആരോപണം ഇതിനോടകം ഉയർന്നു കഴിഞ്ഞു. സംസ്ഥാനത്ത് ഭരണം മാറാൻ സാധ്യതയുണ്ടെങ്കിൽ, വില വർദ്ധനയുടെ ഉത്തരവാദിത്തം പുതിയ സർക്കാരിന്റെ തലയിൽ കെട്ടിവെച്ച് തടിതപ്പാനുള്ള നീക്കമാണ് നടക്കുന്നതെന്ന് ഒരു വിഭാഗം യൂണിയൻ പ്രതിനിധികൾ കുറ്റപ്പെടുത്തുന്നു. ഡിസംബറിൽ തന്നെ വില വർദ്ധനയുണ്ടാകുമെന്ന് ക്ഷീരവകുപ്പ് മന്ത്രി സൂചന നൽകിയിട്ടും തീരുമാനം നീണ്ടുപോകുന്നതിൽ ക്ഷീരകർഷകർക്കിടയിലും പ്രതിഷേധം ശക്തമാണ്.
തീരുമാനം ഉടൻ നടപ്പിലാക്കാത്തതിൽ പ്രതിഷേധിച്ച് മിൽമയുടെ നിർണ്ണായക യോഗത്തിൽ നിന്ന് എറണാകുളം യൂണിയൻ ഭാരവാഹികൾ ഇറങ്ങിപ്പോയി. വില വർദ്ധിപ്പിക്കാൻ തത്വത്തിൽ തീരുമാനമെടുത്തിട്ടും അത് നടപ്പിലാക്കാൻ ബോർഡ് മടിക്കുന്നത് എന്തിനാണെന്ന് പ്രതിഷേധക്കാർ ചോദിക്കുന്നു. പെരുമാറ്റച്ചട്ടം അവസാനിച്ചാലുടൻ പാലിന് ലിറ്ററിന് നാല് രൂപ വർദ്ധിപ്പിച്ചു കൊണ്ടുള്ള ഔദ്യോഗിക വിജ്ഞാപനം പുറത്തിറങ്ങാനാണ് സാധ്യത. മിൽമയുടെ ഈ നീക്കം സാധാരണക്കാരായ ഉപഭോക്താക്കൾക്ക് വലിയ സാമ്പത്തിക ബാധ്യതയുണ്ടാക്കുമെങ്കിലും കർഷകരുടെ പ്രതിസന്ധി കണക്കിലെടുത്ത് വില കൂട്ടിയേ തീരൂ എന്ന നിലപാടിലാണ് മിൽമ അധികൃതർ.