തിരുവനന്തപുരം: തന്റെ പേഴ്സണൽ സ്റ്റാഫിൽ സഹോദരി ഭർത്താവായ ബെന്നി തോമസിനെ നിയമിച്ചതുമായി ബന്ധപ്പെട്ട വിവാദങ്ങളിൽ വിശദീകരണവുമായി മന്ത്രി സണ്ണി ജോസഫ് രംഗത്ത്. ബെന്നി തോമസിനെ നിയമിച്ചത് തന്റെ ബന്ധുവായതുകൊണ്ടല്ലെന്നും അദ്ദേഹത്തിന്റെ മികച്ച രാഷ്ട്രീയ ട്രാക്ക് റെക്കോർഡ് പരിഗണിച്ചാണെന്നും മന്ത്രി വ്യക്തമാക്കി. പേഴ്സണൽ സ്റ്റാഫ് നിയമനം എന്നത് അപേക്ഷ ക്ഷണിച്ച് പരീക്ഷയും അഭിമുഖവും നടത്തി നടത്തേണ്ട ഒന്നല്ലെന്ന് അദ്ദേഹം ഓർമ്മിപ്പിച്ചു.
നിലവിലെ വിവാദങ്ങൾ ദൗർഭാഗ്യകരമാണെന്ന് മന്ത്രി പറഞ്ഞു. പേഴ്സണൽ സ്റ്റാഫ് നിയമനത്തിൽ പ്രത്യേകമായ യോഗ്യതാ മാനദണ്ഡങ്ങളോ നിയമപരമായ അയോഗ്യതകളോ നിലവിലില്ല. ആരെ നിയമിക്കണമെന്നത് ബന്ധപ്പെട്ട മന്ത്രിയുടെ തീരുമാനമാണ്. ബെന്നി തോമസ് തന്റെ ബന്ധുവാണെന്ന കാര്യം താൻ തന്നെയാണ് വെളിപ്പെടുത്തിയത്. പാർട്ടിയുടെ സജീവ പ്രവർത്തകനായ അദ്ദേഹം തിരഞ്ഞെടുപ്പുകളിൽ തന്റെ ചീഫ് ഏജന്റായി പ്രവർത്തിച്ചിട്ടുള്ള വ്യക്തിയാണ്. രാഷ്ട്രീയ പ്രവർത്തനത്തിൽ മികച്ച പരിചയസമ്പത്തുള്ള, തനിക്ക് പൂർണ്ണ വിശ്വാസമുള്ള ഒരാൾ എന്ന നിലയിലാണ് അദ്ദേഹത്തെ നിയമിച്ചതെന്നും സണ്ണി ജോസഫ് കൂട്ടിച്ചേർത്തു. മന്ത്രി എന്ന നിലയിലുള്ള തന്റെ ഔദ്യോഗിക പ്രവർത്തനങ്ങൾ കുറ്റമറ്റ രീതിയിൽ മുന്നോട്ട് കൊണ്ടുപോകാൻ ഇത്തരമൊരു വ്യക്തിയുടെ സഹായം അനിവാര്യമാണ്. മാധ്യമങ്ങളിൽ നിന്ന് ഇത്രത്തോളം രൂക്ഷമായ വിമർശനം പ്രതീക്ഷിച്ചിരുന്നില്ലെന്നും നിയമസഭയിൽ പോലും പ്രതിപക്ഷ നേതാവ് ഈ വിഷയത്തിൽ തന്നെ വിമർശിച്ചിട്ടില്ലെന്നും അദ്ദേഹം ചൂണ്ടിക്കാട്ടി.
അതേസമയം, ഈ നിയമനവുമായി ബന്ധപ്പെട്ട് കെ.പി.സി.സി യോഗത്തിൽ മന്ത്രിക്കെതിരെ വിമർശനം ഉയർന്നുവെന്ന വാർത്തകൾ അടിസ്ഥാനരഹിതമാണെന്ന് മന്ത്രി പി.സി വിഷ്ണുനാഥ് പ്രതികരിച്ചു. പാർട്ടി യോഗത്തിൽ കെ.പി.സി.സി അധ്യക്ഷനെതിരെയോ സണ്ണി ജോസഫിനെതിരെയോ ആരും വിമർശനം ഉന്നയിച്ചിട്ടില്ലെന്ന് അദ്ദേഹം വ്യക്തമാക്കി.