ഇന്ത്യന് വിപണിയില് ടിയാഗോയുടെ പുതുക്കിയ പതിപ്പുകളായ ടിയാഗോയും ടിയാഗോ ഇവിയും അവതരിപ്പിക്കാനൊരുങ്ങി ടാറ്റ മോട്ടോഴ്സ്. പുതിയ ടീസറിലൂടെ ടിയാഗോയുടെ ഉള്ഭാഗത്തെ പ്രധാന മാറ്റങ്ങളും സവിശേഷതകളും കമ്പനി പുറത്തുവിട്ടിട്ടുണ്ട്. കൂടുതല് ആധുനിക രൂപകല്പ്പനയും പുതിയ സാങ്കേതിക സൗകര്യങ്ങളുമായാണ് വാഹനം എത്തുന്നത്.
പ്രീമിയം ലുക്കില് പുതിയ ക്യാബിന്
പുതിയ ടിയാഗോയുടെ ഇന്റീരിയര് മുന്മോഡലിനെ അപേക്ഷിച്ച് കൂടുതല് പ്രീമിയം അനുഭവം നല്കുന്ന രീതിയിലാണ് രൂപകല്പ്പന ചെയ്തിരിക്കുന്നത്. ലെയേര്ഡ് ഹോറിസോണ്ടല് ഡാഷ്ബോര്ഡ് ഡിസൈന്, ഫാബ്രിക് ഇന്സേര്ട്ടുകള്, മെച്ചപ്പെടുത്തിയ മെറ്റീരിയല് ഫിനിഷ് എന്നിവയാണ് പ്രധാന മാറ്റങ്ങള്. വലിയ വാഹനങ്ങളില് കാണുന്ന രീതിയിലുള്ള ആംറെസ്റ്റ് സംവിധാനവും ഉള്പ്പെടുത്തിയിട്ടുണ്ട്.
ഡിജിറ്റല് ക്ലസ്റ്ററും പുതിയ സെന്റര് കണ്സോളും
ടച്ച്സ്ക്രീന് ഇന്ഫോടെയ്ന്മെന്റ് യൂണിറ്റിന് സമീപമായി പുതിയ ഡിജിറ്റല് ഇന്സ്ട്രുമെന്റ് ക്ലസ്റ്ററാണ് ശ്രദ്ധേയമായ മറ്റൊരു സവിശേഷത. സെന്റര് കണ്സോള് പൂര്ണമായും പുനര്രൂപകല്പ്പന ചെയ്തിട്ടുണ്ട്. എഎംടി പതിപ്പില് പരമ്പരാഗത ഗിയര് ലിവറിന് പകരം റോട്ടറി ഡ്രൈവ് സെലക്ടറാണ് ഉള്പ്പെടുത്തിയിരിക്കുന്നത്. പാഡില് ഷിഫ്റ്ററുകളും പുതിയ മോഡലില് തുടരുമെന്ന സൂചനയുണ്ട്.
വയര്ലെസ് ചാര്ജിംഗും ഫാസ്റ്റ് ചാര്ജിംഗ് പോര്ട്ടുകളും
വാഹനത്തില് വയര്ലെസ് ഫോണ് ചാര്ജിംഗ് സൗകര്യം ഉള്പ്പെടുത്തിയിട്ടുണ്ട്. കൂടാതെ മുന്നിലും പിന്നിലും യാത്രക്കാര്ക്കായി യു.എസ്.ബി ടൈപ്പ്-സി ചാര്ജിംഗ് പോര്ട്ടുകളും നല്കിയിട്ടുണ്ട്. അതിവേഗ ചാര്ജിംഗിനായി 65 വാട്ട് പിന്തുണയും ഉണ്ടായേക്കും.
പുറംഭാഗത്തും മാറ്റങ്ങള്
പുതിയ കറുത്ത ഗ്രില്, എല്.ഇ.ഡി ഡി.ആര്.എല്ലുകളുള്ള ഹെഡ്ലാമ്പുകള്, പുനര്രൂപകല്പ്പന ചെയ്ത ബമ്പര്, പുതിയ അലോയ് വീലുകള്, കണക്റ്റഡ് ടെയില് ലാമ്പുകള് എന്നിവയാണ് പുറം രൂപകല്പ്പനയിലെ പ്രധാന പുതുമകള്. 360 ഡിഗ്രി ക്യാമറ സംവിധാനത്തിനുള്ള സാധ്യതയും ടീസറില് നിന്ന് വ്യക്തമാകുന്നു. സുരക്ഷയ്ക്കായി ആറ് എയര്ബാഗുകളും ലഭ്യമാക്കും.
എഞ്ചിനില് വലിയ മാറ്റമില്ല
സാങ്കേതികമായി നിലവിലെ 1.2 ലിറ്റര് പെട്രോള്, സി.എന്.ജി എന്ജിന് ഓപ്ഷനുകള് തുടരുമെന്നാണ് സൂചന. 5 സ്പീഡ് മാനുവല്, 5 സ്പീഡ് എഎംടി ഗിയര്ബോക്സുകളും തുടരും. നിലവിലെ മോഡലിന്റെ വില പരിധിയോട് ചേര്ന്നായിരിക്കും പുതിയ ടിയാഗോയും വിപണിയിലെത്തുക.