കാളികാവ്: സർക്കാർ ജോലിയെന്ന സ്വപ്നത്തിനായി വർഷങ്ങളോളം കാത്തിരുന്ന മലപ്പുറം കാളികാവ് സ്വദേശിയായ അബ്ദുൾ മജീദിനെ തേടി പി.എസ്.സി അഡ്വൈസ് മെമ്മോ എത്തിയത് വിരമിക്കൽ പ്രായത്തിൽ. 2005-ൽ എഴുതിയ പരീക്ഷയുടെ അടിസ്ഥാനത്തിൽ 18 വർഷങ്ങൾക്ക് ശേഷം ലഭിച്ച നിയമന ശുപാർശയാണ് ഇപ്പോൾ ശ്രദ്ധേയമായിരിക്കുന്നത്.
പാർട്ട് ടൈം ജൂനിയർ അറബിക് ടീച്ചർ തസ്തികയിലേക്കുള്ള പി.എസ്.സി പരീക്ഷയിൽ വിജയിച്ച് റാങ്ക് പട്ടികയിൽ ഇടം നേടിയ അബ്ദുൾ മജീദ്, സർക്കാർ ജോലിക്കായുള്ള പ്രതീക്ഷയോടെ വർഷങ്ങളോളം കാത്തിരുന്നു. എന്നാൽ റാങ്ക് പട്ടികയുടെ കാലാവധി അവസാനിക്കുകയും നിയമനം ലഭിക്കാതിരിക്കുകയും ചെയ്തതോടെ ആ പ്രതീക്ഷ മങ്ങിപ്പോയിരുന്നു.
ഇതിനിടെയാണ് ഏപ്രിൽ 26-ന് അദ്ദേഹത്തിന് അഡ്വൈസ് മെമ്മോ ലഭിച്ചത്. ഏറെക്കാലം നീണ്ട കാത്തിരിപ്പിന് ശേഷമാണ് നിയമന ശുപാർശ ലഭിച്ചതെങ്കിലും, അത് വിരമിക്കൽ പ്രായത്തിൽ എത്തിയ ശേഷമായതിനാൽ അബ്ദുൾ മജീദ് അത്ഭുതത്തോടെയാണ് വാർത്ത സ്വീകരിച്ചത്. ഒഴിവുകൾ നിറയ്ക്കുന്നതിനായി പിന്നീട് നടത്തിയ നടപടികളിലൂടെയാണ് പഴയ പട്ടികയിൽ നിന്നുള്ള നിയമനം ഉണ്ടായതെന്നാണ് വിവരം.
അഡ്വൈസ് മെമ്മോ പ്രകാരം മൂന്ന് മാസത്തിനുള്ളിൽ ആവശ്യമായ രേഖകൾ സമർപ്പിച്ച് ജോലിയിൽ പ്രവേശിക്കണം. എന്നാൽ നിലവിലെ പ്രായപരിധി അദ്ദേഹത്തിന് വെല്ലുവിളിയായി മാറിയിരിക്കുകയാണ്.
എസ്.എസ്.എൽ.സി ബുക്കിൽ 1966 മെയ് 27 എന്നാണ് ജനനത്തീയതി രേഖപ്പെടുത്തിയിട്ടുള്ളത്. എന്നാൽ യഥാർത്ഥ ജനനത്തീയതി 1967 മെയ് 27 ആണെന്നാണ് അബ്ദുൾ മജീദ് പറയുന്നത്. രേഖകളിലെ ഈ വ്യത്യാസം തിരുത്താനായാൽ കുറഞ്ഞത് ഒരു വർഷമെങ്കിലും സ്വപ്നം കണ്ട സർക്കാർ ജോലിയിൽ സേവനം ചെയ്യാനാകുമെന്ന പ്രതീക്ഷയിലാണ് അദ്ദേഹം.
ജനനത്തീയതി സംബന്ധിച്ച രേഖകൾ തിരുത്തുന്നതിനായി വിദ്യാഭ്യാസ മന്ത്രിക്കും റവന്യൂ മന്ത്രിക്കും അപേക്ഷ നൽകിയിട്ടുണ്ടെന്നും അനുകൂല തീരുമാനം ലഭിക്കുമെന്ന പ്രതീക്ഷയിലാണ് താനെന്നും അബ്ദുൾ മജീദ് പറഞ്ഞു.