തിരുവനന്തപുരം: നിയുക്ത മുഖ്യമന്ത്രി വി ഡി സതീശൻ മുൻ മുഖ്യമന്ത്രി പിണറായി വിജയന്റെ വസതിയിലെത്തി കൂടിക്കാഴ്ച നടത്തി. അധികാര കൈമാറ്റത്തിന്റെ പശ്ചാത്തലത്തിൽ നടന്ന കൂടിക്കാഴ്ചയ്ക്ക് രാഷ്ട്രീയ പ്രാധാന്യമേറെയാണെന്നാണ് വിലയിരുത്തൽ.
സംസ്ഥാനത്തിന്റെ നിലവിലെ ഭരണകാര്യങ്ങളും സാമ്പത്തിക സാഹചര്യങ്ങളും ഉൾപ്പെടെ വിവിധ വിഷയങ്ങൾ ഇരുവരും ചർച്ച ചെയ്തതായാണ് വിവരം. ഭരണതുടർച്ചയുമായി ബന്ധപ്പെട്ട കാര്യങ്ങളും കൂടിക്കാഴ്ചയിൽ പരാമർശിക്കപ്പെട്ടതായാണ് സൂചന.
സത്യപ്രതിജ്ഞയ്ക്ക് മുന്നോടിയായി വിവിധ രാഷ്ട്രീയ നേതാക്കളെ സന്ദർശിക്കുന്നതിന്റെ ഭാഗമായാണ് വി ഡി സതീശൻ പിണറായി വിജയന്റെ വസതിയിലെത്തിയത്. കൂടിക്കാഴ്ച സൗഹൃദപരമായ അന്തരീക്ഷത്തിലായിരുന്നുവെന്നാണ് കോൺഗ്രസ്-സിപിഎം വൃത്തങ്ങൾ വ്യക്തമാക്കുന്നത്.
സംസ്ഥാന രാഷ്ട്രീയത്തിൽ പുതിയ ഘട്ടത്തിന് തുടക്കമാകുന്ന സാഹചര്യത്തിൽ ഇരുനേതാക്കളുടെയും കൂടിക്കാഴ്ച ശ്രദ്ധേയമായി.