ന്യൂഡൽഹി: സ്മാർട്ട്ഫോൺ വിപണിയിലെ കരുത്തരായ ഓപ്പോയുടെ ഏറ്റവും പുതിയ പ്രീമിയം ഹാൻഡ്സെറ്റുകളായ ഫൈൻഡ് എക്സ്9 അൾട്ര, ഫൈൻഡ് എക്സ്9എസ് എന്നിവയുടെ ഇന്ത്യയിലെ ലോഞ്ച് തീയതി പ്രഖ്യാപിച്ചു. വൻ മാറ്റങ്ങളുമായി എത്തുന്ന ഈ രണ്ട് ഫ്ലാഗ്ഷിപ്പ് മോഡലുകളും മെയ് 21-നാണ് ഇന്ത്യൻ വിപണിയിൽ ഔദ്യോഗികമായി അവതരിപ്പിക്കുക. ഹാസൽബ്ലാഡുമായി സഹകരിച്ച് വികസിപ്പിച്ച അത്യാധുനിക ക്യാമറ സംവിധാനങ്ങളാണ് ഇരു ഫോണുകളുടെയും പ്രധാന ആകർഷണം. പുതിയ ആൻഡ്രോയ്ഡ് 16 അടിസ്ഥാനമാക്കിയുള്ള കളർഒഎസ് 16-ലായിരിക്കും ഈ ഹാൻഡ്സെറ്റുകൾ പ്രവർത്തിക്കുക.
ഏറ്റവും കരുത്തുറ്റ ക്യാമറ ഫോണായാണ് ഓപ്പോ ഫൈൻഡ് എക്സ്9 അൾട്ര എത്തുന്നത്. സ്നാപ്ഡ്രാഗൺ 8 എലൈറ്റ് ജെൻ 5 പ്രോസസറും 7,050 എംഎഎച്ച് ബാറ്ററിയുമാണ് ഇതിന് കരുത്തേകുന്നത്. 200 മെഗാപിക്സൽ പ്രൈമറി ക്യാമറ, 200 മെഗാപിക്സൽ ടെലിഫോട്ടോ ലെൻസ്, 10x ഒപ്റ്റിക്കൽ സൂം പിന്തുണയുള്ള 50 മെഗാപിക്സൽ പെരിസ്കോപ്പ് ലെൻസ് എന്നിവയുൾപ്പെടെയുള്ള ക്വാഡ് ക്യാമറ സംവിധാനം ഫോട്ടോഗ്രഫി പ്രേമികൾക്ക് പുത്തൻ അനുഭവം നൽകും.
അതേസമയം, സ്ലിം ഡിസൈനിൽ പ്രീമിയം ലുക്കുമായാണ് ഫൈൻഡ് എക്സ്9എസ് അവതരിപ്പിക്കുന്നത്. മീഡിയാടെക്ക് ഡൈമൻസിറ്റി 9500എസ് ചിപ്സെറ്റും 7,025 എംഎഎച്ച് ബാറ്ററിയുമാണ് ഇതിലുള്ളത്. 50 മെഗാപിക്സൽ പ്രധാന ക്യാമറയടങ്ങുന്ന ട്രിപ്പിൾ റിയർ ക്യാമറ സെറ്റപ്പാണ് ഈ മോഡലിന് നൽകിയിരിക്കുന്നത്. ലാവൻഡ്ർ സ്കൈ, മിഡ്നൈറ്റ് ഗ്രേ, സൺസെറ്റ് ഓറഞ്ച് എന്നീ ആകർഷകമായ നിറങ്ങളിൽ ഫൈൻഡ് എക്സ്9എസ് ലഭ്യമാകും. അൾട്ര മോഡൽ ബ്ലാക്ക് കളർ ഓപ്ഷനിലാണ് എത്തുക. ഇന്ത്യയിൽ അൾട്ര മോഡലിന് ഒരു ലക്ഷം രൂപയ്ക്ക് മുകളിലും എസ് മോഡലിന് ഏകദേശം 85,000 രൂപയുമായിരിക്കും പ്രാരംഭ വിലയെന്നാണ് സൂചന. പ്രീമിയം സെഗ്മെന്റിൽ സാംസങ്, ആപ്പിൾ ഫോണുകളുമായി ഈ മോഡലുകൾ കടുത്ത മത്സരം കാഴ്ചവെക്കുമെന്നാണ് വിപണിയിലെ വിലയിരുത്തൽ.