ദുബായ്: രാജ്യാന്തര വിപണിയിൽ ഇന്ത്യൻ രൂപയ്ക്ക് ചരിത്രത്തിലെ ഏറ്റവും വലിയ തകർച്ച. ഇതോടെ വിനിമയ നിരക്കിൽ യുഎസ് ഡോളറും ഗൾഫ് കറൻസികളും റെക്കോർഡ് കുതിപ്പ് രേഖപ്പെടുത്തി. വിനിമയ മൂല്യം എക്കാലത്തെയും ഉയർന്ന നിരക്കിൽ എത്തിയതോടെ ഗൾഫ് പ്രവാസികൾക്ക് നാട്ടിലേക്ക് പണം അയയ്ക്കാൻ മികച്ച സുവർണ്ണാവസരമാണ് കൈവന്നിരിക്കുന്നത്. ചൊവ്വാഴ്ചത്തെ വിപണി കണക്കുകൾ പ്രകാരം യുഎഇ ദിർഹത്തിന് ചരിത്രത്തിലാദ്യമായി 26 രൂപ 22 പൈസ എന്ന നിരക്കിലാണ് വിനിമയം നടക്കുന്നത്.
ഡോളറിനെതിരെ രൂപയുടെ മൂല്യം റെക്കോർഡ് താഴ്ചയിലേക്ക് കൂപ്പുകുത്തിയതോടെ കുവൈത്ത് ദിനാറിന്റെ വിനിമയ നിരക്കിലും വൻ വർദ്ധനവുണ്ടായി. ഒരു കുവൈത്തി ദിനാറിന് 312 രൂപ 90 പൈസയാണ് ചൊവ്വാഴ്ച രേഖപ്പെടുത്തിയ ഉയർന്ന നിരക്ക്. തിങ്കളാഴ്ച തന്നെ കുവൈത്ത് ദിനാർ 311 രൂപയ്ക്ക് മുകളിലേക്ക് ഉയർന്നിരുന്നു. മറ്റ് ഗൾഫ് കറൻസികളായ സൗദി റിയാലിന് 25 രൂപ 70 പൈസയും, ഒമാനി റിയാലിന് ചരിത്രത്തിലാദ്യമായി 250 ഇന്ത്യൻ രൂപ എന്ന റെക്കോർഡ് നിരക്കും രേഖപ്പെടുത്തി. ഖത്തരി റിയാലിന്റെ മൂല്യം 26 രൂപ 40 പൈസയിലേക്കും, ബഹ്റൈൻ ദിനാറിന്റെ വിനിമയ നിരക്ക് ഒരു ബഹ്റൈൻ ദിനാറിന് 255 രൂപ 70 പൈസ എന്ന ഉയർന്ന നിരക്കിലേക്കും എത്തിയിട്ടുണ്ട്.
രാജ്യാന്തര വിപണിയിൽ ഒരു യുഎസ് ഡോളറിന്റെ വിനിമയ മൂല്യം ചരിത്രത്തിലാദ്യമായി 96 രൂപ 29 പൈസ എന്ന നിരക്കിലേക്കാണ് കുതിച്ചുയർന്നത്. രൂപ നേരിടുന്ന ഈ കനത്ത തിരിച്ചടിക്ക് പ്രധാന കാരണം ആഗോള വിപണിയിൽ യുഎസ് ഡോളർ കൈവരിച്ച അസാധാരണ കരുത്താണ്. ഇതിനൊപ്പം അന്താരാഷ്ട്ര തലത്തിൽ നിലനിൽക്കുന്ന ഭൗമരാഷ്ട്രീയ സംഘർഷങ്ങളെത്തുടർന്ന് അസംസ്കൃത എണ്ണവില (Crude Oil) ആഗോളതലത്തിൽ വൻതോതിൽ വർദ്ധിച്ചതും ഇന്ത്യൻ രൂപയുടെ മൂല്യത്തകർച്ചയ്ക്ക് ആക്കം കൂട്ടി. ഗൾഫ് മേഖലയിൽ ശമ്പളം കൈപ്പറ്റുന്ന സാധാരണക്കാരായ പ്രവാസികൾക്ക് ഈ ഉയർന്ന വിനിമയ നിരക്ക് വലിയ സാമ്പത്തിക നേട്ടമാണ് സമ്മാനിക്കുന്നത്.