ന്യൂയോർക്ക്: ദേശീയ സുരക്ഷയുമായി ബന്ധപ്പെട്ട അടിയന്തര വിഷയങ്ങൾ നിലനിൽക്കുന്ന സാഹചര്യത്തിൽ മകന്റെ വിവാഹച്ചടങ്ങിൽ പങ്കെടുക്കാൻ സാധിക്കുമോയെന്ന കാര്യത്തിൽ അനിശ്ചിതത്വമുണ്ടെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. ഇറാനുമായി ബന്ധപ്പെട്ട സംഘർഷാവസ്ഥയും സമാധാന ചർച്ചകളും ഉൾപ്പെടെയുള്ള വിഷയങ്ങൾ മുൻഗണനയാണെന്ന് അദ്ദേഹം പറഞ്ഞു.
മകന്റെ വിവാഹത്തിൽ പങ്കെടുക്കാൻ പരമാവധി ശ്രമിക്കുമെന്നും എന്നാൽ നിലവിലെ അന്താരാഷ്ട്ര സാഹചര്യം അതിന് അനുകൂലമല്ലെന്നുമാണ് ട്രംപിന്റെ പ്രതികരണം. ചെറിയ സ്വകാര്യ ചടങ്ങായിരിക്കും നടക്കുകയെന്നും ചടങ്ങിൽ പങ്കെടുക്കണമെന്നാണ് മകന്റെ ആഗ്രഹമെന്നും അദ്ദേഹം കൂട്ടിച്ചേർത്തു.
വിവാഹത്തിൽ പങ്കെടുത്താലും ഇല്ലെങ്കിലും മാധ്യമങ്ങൾ വിമർശിക്കുമെന്ന് ട്രംപ് ആരോപിച്ചു. താൻ എടുക്കുന്ന ഏത് തീരുമാനത്തെയും വിവാദമാക്കാനുള്ള ശ്രമമാണ് ചില മാധ്യമങ്ങൾ നടത്തുന്നതെന്നായിരുന്നു അദ്ദേഹത്തിന്റെ വിമർശനം.
ഡൊണാൾഡ് ട്രംപ് ജൂനിയറിന്റെയും മോഡലായ ബെറ്റിന ആൻഡേഴ്സന്റെയും വിവാഹച്ചടങ്ങാണ് ഈ ആഴ്ച നടക്കുന്നത്. ആദ്യം വൈറ്റ് ഹൗസിൽ നടത്താനിരുന്ന പരിപാടി പിന്നീട് ബഹാമാസിലെ സ്വകാര്യ വേദിയിലേക്ക് മാറ്റിയതായി റിപ്പോർട്ടുകളുണ്ട്.
അതേസമയം, നിലവിലെ രാഷ്ട്രീയ-അന്താരാഷ്ട്ര സാഹചര്യത്തിൽ ചടങ്ങിൽ പങ്കെടുക്കുന്ന കാര്യത്തിൽ അന്തിമ തീരുമാനം പിന്നീട് അറിയിക്കാമെന്ന നിലപാടിലാണ് ട്രംപ്.