പത്താം ക്ലാസ് യോഗ്യത മതി; ഇന്ത്യൻ വ്യോമസേനയിൽ ഗ്രൂപ്പ് ‘സി’ ഒഴിവുകൾ, എഴുത്തുപരീക്ഷയിലൂടെ നിയമനം

ഇന്ത്യൻ വ്യോമസേന (IAF) ഗ്രൂപ്പ് ‘സി’ സിവിലിയൻ തസ്തികകളിലേക്കുള്ള നിയമന വിജ്ഞാപനം പുറത്തിറക്കി. ബംഗളൂരുവിലെ എച്ച്.ക്യു. മെയിന്റനൻസ് കമാൻഡ്, വിമാനപുരയിൽ മൾട്ടി ടാസ്കിംഗ് സ്റ്റാഫ് (MTS) തസ്തികയിലേക്കാണ് നിയമനം. ആകെ 6 ഒഴിവുകളാണുള്ളത്.

പത്താം ക്ലാസ് വിജയിച്ച ഇന്ത്യൻ പൗരന്മാർക്ക് അപേക്ഷിക്കാം. അപേക്ഷകൾ തപാൽ മുഖേനയാണ് സമർപ്പിക്കേണ്ടത്.

യോഗ്യത

• അംഗീകൃത ബോർഡിൽ നിന്ന് പത്താം ക്ലാസ് (Matriculation) വിജയിച്ചിരിക്കണം.
• വാച്ച്മാൻ, ലസ്കാർ, ജെസ്റ്റനർ ഓപ്പറേറ്റർ, ഗാർഡനർ എന്നീ ജോലികളിൽ ഒരു വർഷത്തെ പ്രവൃത്തി പരിചയം ഉണ്ടായിരിക്കണം.
• അപേക്ഷകർക്ക് കുറഞ്ഞത് 18 വയസും പരമാവധി 25 വയസും പ്രായമുണ്ടായിരിക്കണം.
• അപേക്ഷ സ്വീകരിക്കുന്ന അവസാന തീയതിയാണ് പ്രായപരിധി കണക്കാക്കുന്നതിനുള്ള അടിസ്ഥാന തീയതി.

തിരഞ്ഞെടുപ്പ് രീതി

• പ്രായം, വിദ്യാഭ്യാസ യോഗ്യത, സർട്ടിഫിക്കറ്റുകൾ എന്നിവ പരിശോധിച്ച് പ്രാഥമിക പട്ടിക തയ്യാറാക്കും.
• യോഗ്യത നേടിയ ഉദ്യോഗാർഥികളെ എഴുത്തുപരീക്ഷയ്ക്ക് വിളിക്കും.
• ജനറൽ ഇന്റലിജൻസ് & റീസണിംഗ്, ന്യൂമറിക്കൽ ആപ്റ്റിറ്റ്യൂഡ്, ജനറൽ ഇംഗ്ലീഷ്, ജനറൽ അവയർനെസ് എന്നീ വിഷയങ്ങളിൽ നിന്നായിരിക്കും ചോദ്യങ്ങൾ.
• ചോദ്യപേപ്പർ ഇംഗ്ലീഷിലും ഹിന്ദിയിലും ലഭ്യമാകും.
• എഴുത്തുപരീക്ഷയിൽ വിജയിക്കുന്നവർക്ക് രേഖാ പരിശോധന ഉണ്ടായിരിക്കും.
• തുടർന്ന് അന്തിമ റാങ്ക് ലിസ്റ്റ് പ്രസിദ്ധീകരിക്കും.

ശമ്പളം

ഈ തസ്തികയ്ക്ക് 7-ാം ശമ്പള കമ്മീഷൻ പ്രകാരമുള്ള ലെവൽ-1 ശമ്പളമാണ് ലഭിക്കുക.

• അടിസ്ഥാന ശമ്പളം: ₹18,000
• ഡി.എ, എച്ച്.ആർ.എ, മറ്റ് അലവൻസുകൾ ഉൾപ്പെടെ പ്രതിമാസം ഏകദേശം ₹28,000 മുതൽ ₹35,000 വരെ ശമ്പളം ലഭിക്കാം.
• കേന്ദ്ര സർക്കാർ ജീവനക്കാർക്കുള്ള മറ്റ് ആനുകൂല്യങ്ങളും ലഭിക്കും.

പ്രധാന തീയതി

• അപേക്ഷ സമർപ്പിക്കേണ്ട അവസാന തീയതി: 2026 ജൂലൈ 27

https://indianairforce.nic.in