ഗാസ സിറ്റി: യുദ്ധക്കെടുതിയിൽ തകർന്ന ഗാസയിൽ ലോകകപ്പ് മത്സരങ്ങളുടെ തത്സമയ പ്രദർശനം ഒരുക്കിയ പ്രമുഖ ജീവകാരുണ്യ പ്രവർത്തകൻ ഇസ്രായേൽ വ്യോമാക്രമണത്തിൽ കൊല്ലപ്പെട്ടു. ഈജിപ്ഷ്യൻ റിലീഫ് കമ്മിറ്റിയുടെ ഗാസയിലെ പബ്ലിക് റിലേഷൻസ് ഡയറക്ടറായ മുഹമ്മദ് അൽ വാഹിദി (57) ആണ് മരിച്ചത്. അദ്ദേഹം സഞ്ചരിച്ചിരുന്ന ടാക്സിക്ക് നേരെയായിരുന്നു ഇസ്രായേൽ മിസൈൽ ആക്രമണം.
ചൊവ്വാഴ്ച നടന്ന ഈജിപ്ത്–അർജന്റീന ലോകകപ്പ് മത്സരത്തിന്റെ തലേന്നാണ് ഈ സംഭവം നടന്നത്. ഗാസ സിറ്റിയിലെ സബ്ര മേഖലയിലുണ്ടായ ആക്രമണത്തിൽ ടാക്സിയിലുണ്ടായിരുന്ന അഹമ്മദ് ജിഹാദ് (30) ഉൾപ്പെടെ വഴിയാത്രക്കാരായ പത്തും എട്ടും വയസ്സുള്ള രണ്ട് കുട്ടികളും കൊല്ലപ്പെട്ടു.
രണ്ട് വർഷത്തിലേറെയായി തുടരുന്ന യുദ്ധത്തിൽ സർവതും നഷ്ടപ്പെട്ട ഗാസയിലെ ജനങ്ങൾക്ക് ആശ്വാസ നിമിഷങ്ങൾ സമ്മാനിക്കാനാണ് അൽ വാഹിദി പ്രവർത്തിച്ചിരുന്നത്. അഭയാർഥി ക്യാമ്പുകൾക്ക് സമീപം ഭീമൻ സ്ക്രീനുകൾ സ്ഥാപിച്ച് ലോകകപ്പ് മത്സരങ്ങൾ തത്സമയം കാണാനുള്ള സൗകര്യം ഒരുക്കിയത് അദ്ദേഹത്തിന്റെ നേതൃത്വത്തിലായിരുന്നു. അർജന്റീനയോട് തോറ്റ് പുറത്താകുന്നതിന് മുൻപ് മികച്ച പ്രകടനം കാഴ്ചവെച്ച ഈജിപ്ത് ടീമിന്റെ മത്സരങ്ങൾ കാണാൻ ആയിരക്കണക്കിന് ഫുട്ബോൾ ആരാധകരാണ് ഈ സ്ക്രീനുകൾക്ക് മുന്നിലെത്തിയത്.
“യുദ്ധത്തിൽ എല്ലാം നഷ്ടപ്പെട്ട് കൂടാരങ്ങളിലും തകർന്ന വീടുകളിലും കഴിയുന്ന ജനങ്ങൾക്ക് ചെറിയൊരു ആശ്വാസം നൽകാനാണ് എന്റെ പിതാവ് പ്രവർത്തിച്ചത്. മത്സരങ്ങൾ നേരിട്ട് കാണാനുള്ള അവസരം അദ്ദേഹം ഒരുക്കി,” അൽ വാഹിദിയുടെ മകൻ ഫവാസ് പറഞ്ഞു.
തകർന്ന റോഡുകൾ ഗതാഗതയോഗ്യമാക്കുന്നതിലും അഭയാർഥി ക്യാമ്പുകൾ നിർമ്മിക്കുന്നതിലും അൽ വാഹിദി സജീവമായിരുന്നു. ഗാസയിൽ പ്രവർത്തിക്കുന്ന ഈജിപ്ത് സർക്കാരിന്റെ ഔദ്യോഗിക ദുരിതാശ്വാസ സമിതിയിലെ പ്രധാന പ്രവർത്തകരിൽ ഒരാളായിരുന്നു അദ്ദേഹം.
അദ്ദേഹത്തിന്റെ മരണത്തിൽ ഈജിപ്ത് ശക്തമായ പ്രതിഷേധം രേഖപ്പെടുത്തി. ദുരിതാശ്വാസ പ്രവർത്തനങ്ങളെ ലക്ഷ്യമിടുന്ന ആക്രമണങ്ങൾ അംഗീകരിക്കാനാവില്ലെന്ന് ഈജിപ്ത് വ്യക്തമാക്കി. ബുധനാഴ്ച നടന്ന വിലാപയാത്രയിൽ ഫലസ്തീന്റെയും ഈജിപ്തിന്റെയും പതാകകൾ പുതപ്പിച്ചാണ് മൃതദേഹം സംസ്കരിച്ചത്.
2025 ഒക്ടോബർ 10-ന് ഇസ്രായേലും ഹമാസും തമ്മിൽ ഔദ്യോഗികമായി വെടിനിർത്തൽ കരാറിലെത്തിയിരുന്നു. ഇതിന് ശേഷം കരയുദ്ധത്തിന്റെ തീവ്രത കുറഞ്ഞെങ്കിലും ഗാസയ്ക്ക് മേലുള്ള ഇസ്രായേൽ വ്യോമാക്രമണങ്ങൾ തുടർന്നുകൊണ്ടിരിക്കുകയാണ്. ഗാസ ആരോഗ്യ മന്ത്രാലയത്തിന്റെ കണക്കുകൾ പ്രകാരം, വെടിനിർത്തൽ കാലയളവിൽ മാത്രം നടന്ന വ്യോമാക്രമണങ്ങളിൽ 1,092 പലസ്തീനികൾ കൊല്ലപ്പെടുകയും 3,507 പേർക്ക് പരിക്കേൽക്കുകയും ചെയ്തു. 2023 ഒക്ടോബറിന് ശേഷം ഇതുവരെ 73,118-ലധികം പലസ്തീനികൾ ഇസ്രായേൽ ആക്രമണങ്ങളിൽ കൊല്ലപ്പെട്ടതായി മന്ത്രാലയം വ്യക്തമാക്കുന്നു.