ജനീവ: കാലാവസ്ഥാ വ്യതിയാനവും പശ്ചിമേഷ്യൻ സംഘർഷങ്ങളും സൃഷ്ടിക്കുന്ന പ്രത്യാഘാതങ്ങൾ ലോകത്തെ സമാനതകളില്ലാത്ത ഭക്ഷ്യപ്രതിസന്ധിയിലേക്ക് തള്ളിവിടുന്നതായി ഐക്യരാഷ്ട്രസഭയുടെ ഞെട്ടിക്കുന്ന റിപ്പോർട്ട്. വരാനിരിക്കുന്ന ‘എൽ നിനോ’ (El Niño) പ്രതിഭാസവും യുദ്ധങ്ങളും ചേർന്ന് 2027 അവസാനത്തോടെ ലോകമെമ്പാടുമുള്ള 4.9 കോടി ജനങ്ങളെ കൊടും പട്ടിണിയിലാക്കുമെന്ന് ലോക ഭക്ഷ്യ പ്രോഗ്രാമിന്റെ (WFP) റിപ്പോർട്ട് വ്യക്തമാക്കുന്നു. 45 രാജ്യങ്ങളിലെ ഭക്ഷ്യസുരക്ഷയെ ഇത് ക്രമാതീതമായി ബാധിക്കും.
ഡബ്ല്യു.എഫ്.പിയുടെ ‘ഫുഡ് സെക്യൂരിറ്റി ആൻഡ് ന്യൂട്രിഷൻ അനാലിസിസ് സർവീസ്’ തയ്യാറാക്കിയ പഠനത്തിലാണ് ലോകം നേരിടാൻ പോകുന്ന ഭയാനകമായ ദുരന്തത്തെക്കുറിച്ച് മുന്നറിയിപ്പ് നൽകുന്നത്. ദുരന്തത്തിന്റെ വ്യാപ്തി കുറയ്ക്കാൻ അടിയന്തര മുൻകരുതൽ നടപടികൾ സ്വീകരിക്കണമെന്ന് യു.എൻ ഏജൻസി ആവശ്യപ്പെട്ടു.
45 രാജ്യങ്ങൾ, 27.4 കോടി മനുഷ്യർ
2026 സെപ്റ്റംബറിനും ഡിസംബറിനും ഇടയിൽ എൽ നിനോ അതിന്റെ ഏറ്റവും ഉയർന്ന തീവ്രതയിലെത്തുമെന്നാണ് കണക്കാക്കപ്പെടുന്നത്. ഇത് കാർഷിക വിളവെടുപ്പിനെ നേരിട്ട് തകരാറിലാക്കുന്നതിനാൽ 2027-ലാകും ദുരിതഫലങ്ങൾ ഏറ്റവും രൂക്ഷമാകുക. 45 രാജ്യങ്ങളിലായി കടുത്ത ഭക്ഷ്യ അരക്ഷിതാവസ്ഥ നേരിടുന്നവരുടെ എണ്ണം 22.5 കോടിയിൽ നിന്ന് 27.4 കോടിയായി ഉയരുമെന്നാണ് ഡബ്ല്യു.എഫ്.പി അനുമാനിക്കുന്നത്. ഭക്ഷ്യസുരക്ഷാ ഭീഷണി നേരിടുന്നവരുടെ എണ്ണത്തിൽ മധ്യ അമേരിക്കയിൽ 83 ശതമാനവും തെക്കൻ ആഫ്രിക്കയിൽ 75 ശതമാനവും വർധനവുണ്ടാകും.
2015 – 2016 കാലഘട്ടത്തിലെ എൽ നിനോ 60 ലക്ഷം മുതൽ ഒരു കോടി പേരെ ബാധിച്ച സ്ഥാനത്താണ്, വരാനിരിക്കുന്ന 2026 – 2027 എൽ നിനോ കുറഞ്ഞത് 4.9 കോടി ജനങ്ങളെ നേരിട്ട് പട്ടിണിയിലേക്ക് തള്ളിവിടുന്നത്.
എന്താണ് എൽ നിനോ പ്രതിഭാസം?
പസഫിക് സമുദ്രത്തിലെ ഉപരിതല താപനിലയിലുണ്ടാകുന്ന അമിത വർധനവാണ് എൽ നിനോയ്ക്ക് കാരണമാകുന്നത്. സമുദ്രോപരിതല താപനില 1982-ന് ശേഷമുള്ള ഏറ്റവും ഉയർന്ന നിലയിലാണെന്നും 1950-ന് ശേഷമുള്ള ഏറ്റവും ശക്തമായ എൽ നിനോ പ്രതിഭാസമായി ഇത് മാറിയേക്കാമെന്നും റിപ്പോർട്ട് മുന്നറിയിപ്പ് നൽകുന്നു.
- പ്രത്യാഘാതങ്ങൾ: കാലവർഷം വൈകൽ, കടുത്ത വരൾച്ച, ക്രമരഹിതമായ മഴ, അതിതീവ്രമഴ മൂലം ഉണ്ടാകുന്ന പ്രാദേശിക വെള്ളപ്പൊക്കം.
- സാമ്പത്തിക ആഘാതം: വിളനാശവും പശ്ചിമേഷ്യൻ സംഘർഷങ്ങളും മൂലമുണ്ടാകുന്ന അമിത വിലക്കയറ്റം സാധാരണക്കാരുടെ ഭക്ഷ്യലഭ്യതയെ തകർക്കും.
- ധനസഹായ തടസ്സം: അമേരിക്കയിൽ നിന്നും യൂറോപ്പിൽ നിന്നും ഐക്യരാഷ്ട്ര സഭയ്ക്കുള്ള ധനസഹായം വെട്ടിക്കുറച്ചത് വരും വർഷങ്ങളിൽ ഏഷ്യൻ, ആഫ്രിക്കൻ, ലാറ്റിനമേരിക്കൻ രാജ്യങ്ങളിലെ ദുരിതാശ്വാസ പ്രവർത്തനങ്ങളെ ബാധിക്കും.
ഏഷ്യൻ-ആഫ്രിക്കൻ-ലാറ്റിനമേരിക്കൻ രാജ്യങ്ങളെയാകും ഈ പ്രതിസന്ധി ഏറ്റവും കൂടുതൽ ഉലയ്ക്കുകയെന്ന് റിപ്പോർട്ട് അടിവരയിടുന്നു.