ന്യൂഡൽഹി: റഷ്യയിൽ നിന്ന് ക്രൂഡ് ഓയിൽ വാങ്ങുന്ന രാജ്യങ്ങൾക്കുമേൽ കടുത്ത സാമ്പത്തിക പ്രഹരമേൽപ്പിക്കാൻ അമേരിക്കൻ ജനപ്രതിനിധി സഭ പുതിയ ഉപരോധ ബിൽ പാസാക്കി. റഷ്യൻ എണ്ണയുടെയും പ്രകൃതിവാതകത്തിന്റെയും ഏറ്റവും വലിയ അഞ്ച് ഇറക്കുമതി രാജ്യങ്ങൾക്ക് യു.എസ് വിപണിയിൽ 100 ശതമാനം വരെ ഇറക്കുമതി തീരുവ (Customs Duty) ചുമത്താൻ യു.എസ് പ്രസിഡന്റിന് പൂർണ്ണ അധികാരം നൽകുന്നതാണ് ഈ ബിൽ.
റഷ്യയിൽ നിന്ന് വൻതോതിൽ എണ്ണ വാങ്ങുന്ന ഇന്ത്യ, ചൈന, തുർക്കി, യു.എ.ഇ, അസർബൈജാൻ, ഹംഗറി, സ്ലൊവാക്യ തുടങ്ങിയ രാജ്യങ്ങൾക്കാണ് പുതിയ ബിൽ കനത്ത ഭീഷണിയാകുന്നത്. പശ്ചിമേഷ്യൻ സംഘർഷങ്ങളുടെ പശ്ചാത്തലത്തിൽ ഇന്ത്യ റഷ്യയിൽ നിന്നുള്ള എണ്ണ ഇറക്കുമതി കഴിഞ്ഞ വർഷത്തേക്കാൾ ഗണ്യമായി വർദ്ധിപ്പിച്ചിരുന്നു. സഭ പാസാക്കിയ ബിൽ ഇനി പ്രസിഡന്റ് ഡൊണാൾഡ് ട്രംപിന്റെ അംഗീകാരത്തിനായി അയക്കും. ട്രംപ് ഇതിൽ ഒപ്പുവെക്കുന്നതോടെ ബിൽ നിയമമായി മാറും.
റഷ്യയുടെ ഊർജ്ജ വരുമാനത്തിൽ തടയിടുകയും ഉക്രെയ്ൻ യുദ്ധത്തിനുള്ള റഷ്യയുടെ സാമ്പത്തിക സ്രോതസ്സ് തകർക്കുകയുമാണ് അമേരിക്കയുടെ പ്രധാന ലക്ഷ്യം. റഷ്യൻ ഉദ്യോഗസ്ഥർ, ധനകാര്യ സ്ഥാപനങ്ങൾ, കൂടാതെ എണ്ണ കടത്തുന്ന റഷ്യയുടെ ‘ഷാഡോ ഫ്ലീറ്റ്’ (Shadow Fleet) കപ്പൽ ശൃംഖല എന്നിവയ്ക്കെതിരെയും ബില്ലിൽ കടുത്ത നിയന്ത്രണങ്ങളുണ്ട്. ഇതോടൊപ്പം ഇറാന് മേലുള്ള നിലവിലെ ഉപരോധങ്ങൾ അഞ്ച് വർഷത്തേക്ക് കൂടി നീട്ടാനും ബില്ലിൽ വ്യവസ്ഥയുണ്ട്.
അതേസമയം, റഷ്യയുടെ പ്രകൃതിവാതക കയറ്റുമതിയുടെ 15 ശതമാനത്തിൽ താഴെ മാത്രം ഇറക്കുമതി ചെയ്യുന്ന രാജ്യങ്ങൾക്കും, വാങ്ങിപ്പ് ഗണ്യമായി കുറയ്ക്കാൻ നടപടിയെടുത്ത രാജ്യങ്ങൾക്കും നികുതി ചുമത്തുന്നതിൽ ചെറിയ ഇളവുകൾ ലഭിച്ചേക്കും. എങ്കിലും ബിൽ നിയമമാവുകയും ട്രംപ് 100 ശതമാനം അധിക താരിഫ് നടപ്പിലാക്കുകയും ചെയ്താൽ ഇന്ത്യൻ കയറ്റുമതി മേഖലയ്ക്കും വ്യാപാരികൾക്കും കർഷകർക്കും അത് വൻ തിരിച്ചടിയാകുമെന്ന് സാമ്പത്തിക വിദഗ്ദ്ധർ മുന്നറിയിപ്പ് നൽകുന്നു.