തിരുവനന്തപുരം: ഇന്ത്യയിലെ പ്രമുഖ ഹൃദ്രോഗ വിദഗ്ധനും ‘ഹൃദയത്തിന്റെ കാവൽക്കാരൻ’ എന്ന് വിശേഷിപ്പിക്കപ്പെട്ടിരുന്ന ഡോ. ജി. വിജയരാഘവൻ (84) അന്തരിച്ചു. തിരുവനന്തപുരത്തെ കിംസ് ഹെൽത്ത്കെയറിന്റെ വൈസ് ചെയർമാനും സ്ഥാപക ഡയറക്ടറുമായിരുന്ന അദ്ദേഹം ഹൃദ്രോഗ ചികിത്സാരംഗത്ത് കേരളത്തിന്റെ അഭിമാനമായിരുന്നു.
ഇന്ത്യയിൽ ആദ്യമായി 2ഡി എക്കോകാർഡിയോഗ്രാഫി ലബോറട്ടറി സ്ഥാപിച്ചത് ഡോ. ജി. വിജയരാഘവനാണ്. തിരുവനന്തപുരത്തെ സൊസൈറ്റി ഫോർ കണ്ടിന്യൂയിങ് മെഡിക്കൽ എജുക്കേഷൻ ആൻഡ് റിസർച്ചിന്റെ പ്രസിഡന്റായും അദ്ദേഹം പ്രവർത്തിച്ചു. തിരുവനന്തപുരം മെഡിക്കൽ കോളേജിൽ കാർഡിയോളജി വിഭാഗം മേധാവിയായും സേവനമനുഷ്ഠിച്ചിട്ടുണ്ട്.
തിരുവനന്തപുരം മെഡിക്കൽ കോളേജിൽ നിന്ന് എം.ബി.ബി.എസ്, എം.ഡി പഠനം പൂർത്തിയാക്കിയ ഡോ. വിജയരാഘവന്റെ വൈദ്യശാസ്ത്രരംഗത്തെ മികച്ച സംഭാവനകൾ പരിഗണിച്ച് രാജ്യം 2009ൽ പത്മശ്രീ നൽകി ആദരിച്ചു.
രാജ്യാന്തര തലത്തിൽ ശ്രദ്ധേയനായ മെഡിക്കൽ അധ്യാപകനായിരുന്ന അദ്ദേഹം നിരവധി ഗവേഷണ പ്രവർത്തനങ്ങളിലും സജീവമായി പങ്കെടുത്തു. ഹൃദ്രോഗ ചികിത്സ, മെഡിക്കൽ വിദ്യാഭ്യാസം, ഗവേഷണം എന്നീ മേഖലകളിലെ സംഭാവനകളിലൂടെ ആരോഗ്യരംഗത്ത് ശ്രദ്ധേയമായ വ്യക്തിത്വമായി മാറിയ ഡോ. ജി. വിജയരാഘവന്റെ വിയോഗം വലിയ നഷ്ടമാണ്.