പത്തനംതിട്ട: തൃശൂര് മുണ്ടത്തിക്കോട് വെടിക്കെട്ട് ദുരന്തത്തിന്റെ പശ്ചാത്തലത്തില് പത്തനംതിട്ടയിലെ ചന്ദനപ്പള്ളി വലിയ പെരുന്നാളിനോട് അനുബന്ധിച്ചിരുന്ന വെടിക്കെട്ട് പൂര്ണമായും ഒഴിവാക്കാന് തീരുമാനിച്ചു. വെടിക്കെട്ടിനായി മാറ്റിവെച്ച തുക ജീവകാരുണ്യ പ്രവര്ത്തനങ്ങള്ക്കായി വിനിയോഗിക്കാനാണ് സംഘാടകരുടെ തീരുമാനം.
ആഗോള ജോര്ജ്ജിയന് തീര്ത്ഥാടന കേന്ദ്രമായ ചന്ദനപ്പള്ളി വലിയ പള്ളിയില് മെയ് 7, 8 തീയതികളിലാണ് പ്രധാന പെരുന്നാള് ചടങ്ങുകള് നടക്കുന്നത്. സുരക്ഷാ പരിഗണനകളും ദുരന്തത്തിന്റെ പശ്ചാത്തലവുമാണ് വെടിക്കെട്ട് ഒഴിവാക്കാനുള്ള തീരുമാനത്തിന് പിന്നില്.
അതേസമയം, തൃശൂര് മുണ്ടത്തിക്കോട് വെടിക്കെട്ട് പുരയില് ഏപ്രില് 21ന് ഉണ്ടായ സ്ഫോടനത്തില് മരണസംഖ്യ 15 ആയി ഉയര്ന്നിരുന്നു. ഗുരുതരമായി പരിക്കേറ്റ് ചികിത്സയിലായിരുന്ന പ്രവീണും തിരുവമ്പാടി ലൈസന്സി സതീഷും മരണപ്പെട്ടതോടെയാണ് മരണസംഖ്യ വര്ധിച്ചത്.
ദുരന്തത്തിന്റെ പശ്ചാത്തലത്തില് ഈ വര്ഷത്തെ തൃശൂര് പൂരം വെടിക്കെട്ടില്ലാതെ നടത്താന് അധികൃതര് തീരുമാനിച്ചിട്ടുണ്ട്. പതിവ് ചടങ്ങുകളായ കുടമാറ്റം, ഇലഞ്ഞിത്തറമേളം, മഠത്തില്വരവ് തുടങ്ങിയവ പതിവുപോലെ നടക്കും. 15 വീതം ആനകളെ അണിനിരത്തി പൂരം ചടങ്ങുകള് നടത്താനാണ് പദ്ധതി.