ഭോപ്പാൽ: ഗർഭിണികൾക്കായി അംഗൻവാടി വഴി വിതരണം ചെയ്ത പോഷകാഹാരപ്പൊതിയിൽ ചത്ത പാമ്പിൻകുഞ്ഞിനെ കണ്ടെത്തിയ സംഭവം മധ്യപ്രദേശിൽ വൻ പ്രതിഷേധത്തിന് ഇടയാക്കി. പാണ്ഡുർണ ജില്ലയിലെ കാർഘട്ട് കാംതി ഗ്രാമത്തിലാണ് സംഭവം റിപ്പോർട്ട് ചെയ്തത്.
വച്ഛല ബായി ധുർവെ എന്ന ഗർഭിണിക്ക് അംഗൻവാടിയിൽ നിന്ന് ലഭിച്ച ലഡ്ഡു അടങ്ങിയ പോഷകാഹാരപ്പൊതി വീട്ടിലെത്തിച്ച് പരിശോധിക്കുമ്പോഴാണ് കുടുംബാംഗങ്ങൾ ചത്ത പാമ്പിൻകുഞ്ഞിനെ കണ്ടെത്തിയത്. ഭക്ഷണം കഴിക്കുന്നതിന് മുമ്പ് സംഭവം ശ്രദ്ധയിൽപ്പെട്ടതിനാൽ വലിയ ദുരന്തം ഒഴിവായെന്നാണ് നാട്ടുകാർ പറയുന്നത്.
സംഭവം പുറത്തറിഞ്ഞതോടെ പ്രദേശവാസികൾ കടുത്ത പ്രതിഷേധവുമായി രംഗത്തെത്തി. ഗർഭിണികൾക്കും കുട്ടികൾക്കും വിതരണം ചെയ്യുന്ന ഭക്ഷണത്തിന്റെ ഗുണനിലവാരത്തെയും സുരക്ഷാ മാനദണ്ഡങ്ങളെയും കുറിച്ച് ഗുരുതര ആശങ്കകളാണ് ഉയരുന്നത്. പൊതുവിതരണത്തിനായി തയ്യാറാക്കുന്ന ഭക്ഷണത്തിന്റെ നിർമ്മാണത്തിലും വിതരണത്തിലും വീഴ്ച സംഭവിച്ചോയെന്ന ചോദ്യവും ശക്തമായി ഉയർന്നിട്ടുണ്ട്.
സംഭവത്തെ തുടർന്ന് വനിതാ-ശിശു വികസന വകുപ്പ് പ്രോജക്ട് ഓഫീസർ ഉഷാ പാണ്ഡ്രെയുടെ നേതൃത്വത്തിൽ ഉദ്യോഗസ്ഥസംഘം സ്ഥലത്തെത്തി. ബന്ധപ്പെട്ട പോഷകാഹാരപ്പൊതി കസ്റ്റഡിയിലെടുത്ത് പ്രാഥമിക പരിശോധന നടത്തി. ഭക്ഷണത്തിന്റെ സാമ്പിളുകൾ ശാസ്ത്രീയ പരിശോധനയ്ക്കായി സുരക്ഷിതമായി സൂക്ഷിച്ചിരിക്കുകയാണ്.
വിഷയത്തിന്റെ ഗൗരവം കണക്കിലെടുത്ത് ആക്ടിങ് കളക്ടർ അഗ്രിം കുമാർ അഞ്ചംഗ അന്വേഷണ സമിതിയെ നിയോഗിച്ചു. ഭക്ഷ്യസുരക്ഷാ വകുപ്പ് ശേഖരിച്ച സാമ്പിളുകൾ ഭോപ്പാലിലെ സംസ്ഥാന ഭക്ഷ്യപരിശോധന കേന്ദ്രത്തിലേക്ക് അയച്ചിട്ടുണ്ട്. ലബോറട്ടറി പരിശോധനാഫലവും അന്വേഷണ റിപ്പോർട്ടും ലഭിച്ചശേഷം ഉത്തരവാദികൾക്കെതിരെ കർശന നടപടി സ്വീകരിക്കുമെന്ന് ജില്ലാ ഭരണകൂടം അറിയിച്ചു.
അതേസമയം, സംഭവത്തെക്കുറിച്ചുള്ള അഭ്യൂഹങ്ങളും സ്ഥിരീകരിക്കാത്ത വിവരങ്ങളും പ്രചരിപ്പിക്കരുതെന്ന് അധികൃതർ ജനങ്ങളോട് അഭ്യർഥിച്ചിട്ടുണ്ട്. ഔദ്യോഗിക അന്വേഷണ റിപ്പോർട്ടിന്റെ അടിസ്ഥാനത്തിലായിരിക്കും തുടർനടപടികൾ സ്വീകരിക്കുകയെന്നും ഭരണകൂടം വ്യക്തമാക്കി.