സൂറത്ത്: ഗുജറാത്ത് – മഹാരാഷ്ട്ര ദേശീയപാതയിലുണ്ടായ ദാരുണമായ ബസ് അപകടത്തിൽ ഏഴ് പേർ മരിച്ചു. മഹാരാഷ്ട്ര റോഡ് ട്രാൻസ്പോർട്ട് കോർപ്പറേഷന്റെ (എംഎസ്ആർടിസി) രണ്ട് ബസുകൾ തമ്മിൽ കൂട്ടിയിടിച്ചാണ് അപകടമുണ്ടായത്. നിയന്ത്രണം വിട്ട ഒരു ബസ് തലകീഴായി മറിഞ്ഞ് തീപിടിക്കുകയായിരുന്നു. തീപിടിച്ച ബസിനുള്ളിൽ അകപ്പെട്ട യാത്രക്കാരാണ് മരണപ്പെട്ടത്. അപകടത്തിൽ നാൽപതോളം പേർക്ക് പരിക്കേറ്റിട്ടുണ്ട്. ദേശീയപാത 53-ൽ ഉവ ഗ്രാമത്തിന് സമീപമാണ് ഈ വൻ ദുരന്തമുണ്ടായത്.
അപകടത്തിൽപ്പെട്ട ബസുകളിൽ ഒന്ന് സൂറത്തിൽ നിന്ന് ധൂലെയിലേക്കും മറ്റൊന്ന് മഹാരാഷ്ട്രയിലെ ചാലിസ്ഗാവിൽ നിന്ന് സൂറത്തിലേക്കും വരികയായിരുന്നു. ചാലിസ്ഗാവിൽ നിന്ന് വരികയായിരുന്ന ബസ് ആദ്യം റോഡിലുണ്ടായിരുന്ന ഒരു ട്രാക്ടറിലിടിച്ച് നിയന്ത്രണം വിടുകയായിരുന്നുവെന്ന് സൂറത്ത് പോലീസ് സൂപ്രണ്ട് രാജേഷ് ഘാതിയ പറഞ്ഞു. തുടർന്ന് ഡിവൈഡറും തകർത്ത് എതിർദിശയിൽ നിന്ന് വരികയായിരുന്ന ബസിലേക്ക് ഇത് ഇടിച്ചുകയറി. ഇടിയുടെ ആഘാതത്തിൽ റോഡിന് താഴേക്ക് തലകീഴായി മറിഞ്ഞ ബസിന് തൊട്ടുപിന്നാലെ തീപിടിക്കുകയായിരുന്നു.
വിവരമറിഞ്ഞ് പോലീസും ഫയർഫോഴ്സും ഉടനടി സ്ഥലത്തെത്തിയാണ് രക്ഷാപ്രവർത്തനം നടത്തിയത്. പരിക്കേറ്റ യാത്രക്കാരെ അടിയന്തരമായി ബർദോളിയിലെ വിവിധ ആശുപത്രികളിലേക്ക് മാറ്റി. അപകടത്തിൽ മരിച്ചവരിൽ മഹാരാഷ്ട്ര ട്രാൻസ്പോർട്ട് കോർപ്പറേഷൻ ജീവനക്കാരുമുണ്ടെന്നാണ് വിവരം. ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് മഹാരാഷ്ട്ര ഗതാഗതമന്ത്രി പ്രതാപ് സർനായിക് 10 ലക്ഷം രൂപ വീതം ധനസഹായം പ്രഖ്യാപിച്ചു. പരിക്കേറ്റവർക്ക് ലഭ്യമായതിൽ ഏറ്റവും മികച്ച ചികിത്സ ഉറപ്പാക്കാൻ അദ്ദേഹം ഉദ്യോഗസ്ഥർക്ക് നിർദേശം നൽകിയിട്ടുണ്ട്.