കൊച്ചി: പ്രശസ്ത പിന്നണി ഗായിക എസ്. ജാനകിയുടെ നിര്യാണത്തിൽ നടൻ മോഹൻലാൽ അനുശോചനം രേഖപ്പെടുത്തി. തന്റെ ആദ്യചിത്രമായ മഞ്ഞിൽ വിരിഞ്ഞ പൂക്കൾ എന്ന സിനിമയിലെ ഗാനങ്ങൾ ആലപിച്ച ഗായിക എന്ന നിലയിൽ ജാനകിയമ്മയോട് തനിക്ക് ഒരിക്കലും മറക്കാനാവാത്ത കടപ്പാടുണ്ടെന്ന് അദ്ദേഹം പറഞ്ഞു. എല്ലാവരെയും സമഭാവനയോടെ കാണുന്ന, ശാന്തശീലയായ അമ്മമനസ്സിനുടമയായിരുന്നു അവർ എന്നും മോഹൻലാൽ ഓർമിച്ചു.
കഴിഞ്ഞ ആറ് പതിറ്റാണ്ടിലേറെയായി തന്റെ സ്വരമാധുര്യം കൊണ്ട് സംഗീതാസ്വാദകരെ മറ്റൊരു തലത്തിലേക്ക് ഉയർത്തിയ പ്രിയഗായികയായിരുന്നു ജാനകിയമ്മയെന്ന് മോഹൻലാൽ പറഞ്ഞു.
മോഹൻലാലിന്റെ അനുശോചന സന്ദേശത്തിൽ അദ്ദേഹം പറഞ്ഞു:
“ഭാരതത്തിന്റെ ഗാനകോകിലം ജാനകിയമ്മ നമ്മെ വിട്ടുപിരിഞ്ഞു. ഒരു കാലഘട്ടം മുഴുവൻ മലയാളവും ഹിന്ദിയുമടക്കമുള്ള ഭാഷകളിൽ എത്രയോ ഹൃദയഹാരിയായ ഗാനങ്ങൾ സമ്മാനിച്ച സ്നേഹസാഗരമാണ് ജാനകിയമ്മ. മലയാളി മനസ്സുകളിൽ തേനും വയമ്പും നിറച്ച, കാലാതീതമായ ഒട്ടേറെ ഗാനങ്ങൾ സംഭാവന ചെയ്ത അനുഗ്രഹീത ഗായിക. എന്റെ ആദ്യചിത്രമായ ‘മഞ്ഞിൽ വിരിഞ്ഞ പൂക്കളിലെ’ ഗാനങ്ങൾ പാടിയ ഗായിക എന്ന നിലയിൽ ഒരിക്കലും മറക്കാനാവാത്ത കടപ്പാടാണ് ജാനകിയമ്മയോട് എനിക്കുള്ളത്.
സന്തോഷവും വിഷാദവും കുട്ടിത്തവും ഉൾപ്പെടെയുള്ള എല്ലാ മനുഷ്യഭാവങ്ങൾക്കും ജാനകിയമ്മ തന്റെ മധുരസ്വരം പകർന്നു നൽകി. ആദ്യചിത്രത്തിന് ശേഷവും ജാനകിയമ്മ ആലപിച്ച ഒട്ടേറെ ഗാനരംഗങ്ങളുടെ ഭാഗമാകാൻ എനിക്ക് ഭാഗ്യമുണ്ടായി. എല്ലാവരെയും സമഭാവനയോടെ കാണുന്ന, ശാന്തശീലയായ അമ്മമനസ്സിനുടമയായിരുന്നു അവർ. വ്യക്തിപരമായി എനിക്ക് ഏറെ അടുപ്പമുണ്ടായിരുന്നു ജാനകിയമ്മയുമായി. അമ്മയുടെ ആത്മാവിന് നിത്യശാന്തി നേരുന്നു.”
ഇന്നലെ രാത്രി 7.30ന് മൈസൂരുവിലെ അപ്പോളോ ബിജിഎസ് ആശുപത്രിയിലായിരുന്നു എസ്. ജാനകിയുടെ വിയോഗം. ഇന്ന് രാവിലെ 8 മുതൽ വൈകിട്ട് 4 വരെ മൈസൂരുവിലെ മഹാരാജാ കോളേജ് ഗ്രൗണ്ടിൽ പൊതുദർശനം ഒരുക്കിയിട്ടുണ്ട്. തുടർന്ന് വൈകിട്ട് 4.30ന് മൈസൂരുവിലെ കനിയനഹുണ്ടി ഫാം ഹൗസിൽ ഔദ്യോഗിക ബഹുമതികളോടെ സംസ്കാര ചടങ്ങുകൾ നടക്കും.