ന്യൂഡൽഹി: റിസർവ് ബാങ്ക് ഓഫ് ഇന്ത്യ ഇത്തവണ കേന്ദ്ര സർക്കാരിന് റെക്കോർഡ് ലാഭവിഹിതം കൈമാറാനൊരുങ്ങുന്നതായി റിപ്പോർട്ട്. ഏകദേശം 3 ലക്ഷം കോടി രൂപ വരെ കേന്ദ്രത്തിന് ലഭിക്കുമെന്നാണ് സാമ്പത്തിക വിദഗ്ധരുടെ വിലയിരുത്തൽ. കഴിഞ്ഞ വർഷം നൽകിയ 2.7 ലക്ഷം കോടി രൂപയുടെ റെക്കോർഡിനെ പോലും ഇത് മറികടക്കും.
ആഗോള സാമ്പത്തിക പ്രതിസന്ധികളും ഇന്ധനവില വർധനവും സർക്കാരിന് വലിയ സാമ്പത്തിക സമ്മർദ്ദം സൃഷ്ടിക്കുന്ന സാഹചര്യത്തിലാണ് ആർബിഐയുടെ ഈ സഹായം നിർണായകമാകുന്നത്. ലാഭവിഹിത കൈമാറ്റത്തിന് അംഗീകാരം നൽകുന്നതിനായി ആർബിഐ ബോർഡ് ഉടൻ യോഗം ചേരും.
വിദേശനാണ്യ ശേഖര നിക്ഷേപങ്ങൾ, ബോണ്ട് ഇടപാടുകൾ, കറൻസി മാനേജ്മെന്റ്, സ്വർണ നിക്ഷേപങ്ങളിൽ നിന്നുള്ള നേട്ടങ്ങൾ എന്നിവ വഴിയാണ് ആർബിഐ പ്രധാനമായും വരുമാനം കണ്ടെത്തുന്നത്. കഴിഞ്ഞ സാമ്പത്തിക വർഷത്തിൽ വിദേശനാണ്യ വ്യാപാരത്തിലുണ്ടായ ലാഭവും ആഗോള പലിശനിരക്കിലെ വർധനവും സ്വർണവിലയിലെ കുതിപ്പും ആർബിഐയുടെ വരുമാനം ഗണ്യമായി ഉയർത്തിയെന്നാണ് റിപ്പോർട്ടുകൾ.
ആർബിഐയുടെ പ്രവർത്തനച്ചെലവും കരുതൽ നിധിയും മാറ്റിവെച്ചതിന് ശേഷം ശേഷിക്കുന്ന അധിക വരുമാനമാണ് കേന്ദ്ര സർക്കാരിന് ലാഭവിഹിതമായി കൈമാറുന്നത്. ഇത്തവണ ഈ അധിക തുക സാധാരണയേക്കാൾ വളരെ കൂടുതലായിരിക്കുമെന്നാണ് സൂചന.
ഈ തുക ലഭിക്കുന്നതിലൂടെ നികുതി വർധനയോ അധിക കടമെടുപ്പോ ഇല്ലാതെ സർക്കാരിന് സാമ്പത്തിക ആശ്വാസം ലഭിക്കും. ക്ഷേമപദ്ധതികൾ, വികസന പ്രവർത്തനങ്ങൾ, ബജറ്റ് കമ്മി നിയന്ത്രണം തുടങ്ങിയ മേഖലകളിൽ ഇത് സഹായകരമാകുമെന്നാണ് വിലയിരുത്തൽ.
ഇറാൻ സംഘർഷം ഉൾപ്പെടെയുള്ള അന്താരാഷ്ട്ര പ്രതിസന്ധികൾ മൂലം ഇന്ധനവില ഉയരുന്ന സാഹചര്യത്തിൽ, കേന്ദ്ര സർക്കാരിന് ആർബിഐയുടെ ഈ ലാഭവിഹിതം വലിയ സാമ്പത്തിക കരുത്താകുമെന്നാണ് സാമ്പത്തിക നിരീക്ഷകരുടെ അഭിപ്രായം.