വിപണിയുടെ പ്രതീക്ഷകൾക്കൊത്ത് ഉയരാൻ കഴിയാത്തതിനും സാങ്കേതികവിദ്യയിൽ പിന്നിലായതിനും രണ്ട് വർഷം മുമ്പ് പരസ്യമായി മാപ്പുപറഞ്ഞ കമ്പനിയാണ് സാംസങ്. ഒരുകാലത്ത് ലോകത്തെ ഏറ്റവും വലിയ ടെക് ഭീമനായിരുന്ന കമ്പനിയുടെ ആ തുറന്നുപറച്ചിൽ പലരെയും അമ്പരപ്പിച്ചിരുന്നു. ഓഹരി വിപണിയിലും ഈ തിരിച്ചടി പ്രകടമായി. 2025-ന്റെ തുടക്കത്തിൽ സാംസങ്ങിന്റെ ഓഹരി മൂല്യം അതിന്റെ യഥാർത്ഥ ആസ്തി മൂല്യത്തിന്റെ അടിസ്ഥാനത്തിൽ മാത്രമായിരുന്നു കണക്കാക്കപ്പെട്ടിരുന്നത്. കമ്പനിയുടെ കെട്ടിടങ്ങൾക്കും യന്ത്രങ്ങൾക്കും കടലാസിലുള്ള മൂല്യം മാത്രമാണ് അന്ന് വിപണി വിലമതിച്ചത്.
ഭാവിയിലെ വളർച്ചയോ പ്രതീക്ഷകളോ ഒന്നും വിപണി വിലയിൽ പ്രതിഫലിച്ചിരുന്നില്ല. ചില നിക്ഷേപകർ ഓഹരികൾ വിറ്റൊഴിവാക്കിയപ്പോൾ, ഈ സാഹചര്യത്തിലെ സാധ്യത തിരിച്ചറിഞ്ഞ ചിലർ ഓഹരികൾ വാങ്ങിക്കൂട്ടി. അങ്ങനെ നിക്ഷേപിച്ചവരാണ് ഇന്ന് വൻലാഭം നേടിയത്.
തിരിച്ചുവരവിന് വഴിയൊരുക്കിയ രണ്ട് നിർണായക കരാറുകൾ
സാംസങ്ങിന്റെ തിരിച്ചുവരവിന് പ്രധാന കാരണമായത് രണ്ട് നിർണായക കരാറുകളാണ്.
ആദ്യത്തേത്, മൈക്രോസോഫ്റ്റ്, ഗൂഗിൾ, ആമസോൺ തുടങ്ങിയ കമ്പനികളുടെ ആർട്ടിഫിഷ്യൽ ഇന്റലിജൻസ് ഡാറ്റാ സെന്ററുകളിൽ ഉപയോഗിക്കുന്ന എൻവിഡിയ പ്രോസസറുകൾക്കൊപ്പം സാംസങ്ങിന്റെ ഹൈ-ബാൻഡ് വിഡ്ത്ത് മെമ്മറി (HBM) ചിപ്പുകൾ ഉപയോഗിക്കാൻ എൻവിഡിയ അനുമതി നൽകിയതാണ്. മാസങ്ങളായി സാംസങ് കാത്തിരുന്ന അനുമതിയായിരുന്നു ഇത്. ഇതോടെ ലോകത്തിലെ ഏറ്റവും പ്രധാനപ്പെട്ട എഐ സപ്ലൈ ചെയിനിലേക്ക് കമ്പനിക്ക് പ്രവേശനം ലഭിച്ചു.
രണ്ടാമതായി, ഇലോൺ മസ്കിന്റെ ടെസ്ലയുമായി ചിപ്പ് നിർമ്മാണ കരാറിൽ സാംസങ് ഒപ്പുവച്ചു. തായ്വാൻ കമ്പനിയായ ടിഎസ്എംസിക്ക് പിന്നിലായിരുന്ന സാംസങ്ങിന് ഈ കരാർ വലിയ കരുത്തായി. ഈ രണ്ട് കരാറുകൾക്ക് പിന്നാലെ സാംസങ്ങിന്റെ ഓഹരികൾ മാസങ്ങൾക്കുള്ളിൽ 60 ശതമാനത്തോളം ഉയർന്നു.
മൂന്ന് മാസത്തിൽ 3.64 ലക്ഷം കോടി രൂപയുടെ ലാഭം
2026-ലെ ആദ്യ പാദത്തിൽ സാംസങ്ങിന്റെ പ്രവർത്തന ലാഭം 57 ട്രില്യൺ വോൺ, അതായത് ഏകദേശം 3.64 ലക്ഷം കോടി രൂപയാണ്. മുൻവർഷത്തെ ഇതേ കാലയളവിനെ അപേക്ഷിച്ച് എട്ടിരട്ടി വർധനവാണിത്.
കമ്പനിയുടെ ആകെ വിൽപ്പനയുടെ 61 ശതമാനവും പ്രവർത്തന ലാഭത്തിന്റെ 94 ശതമാനവും സെമികണ്ടക്ടർ വിഭാഗത്തിൽ നിന്നാണ് ലഭിച്ചത്. മെമ്മറി ചിപ്പുകളുടെ വിൽപ്പന മുൻപാദത്തേക്കാൾ 20 ശതമാനം വർധിച്ചപ്പോൾ, ശരാശരി വില 90 ശതമാനം ഉയർന്നു. ഇത് വെറുമൊരു തിരിച്ചുവരവല്ല, മറിച്ച് വിപണിയിലെ ഒരു ‘സൂപ്പർ സൈക്കിൾ’ ആണെന്നാണ് വിദഗ്ധരുടെ വിലയിരുത്തൽ.
എഐ യുഗത്തിൽ മെമ്മറി ചിപ്പുകളുടെ സുവർണകാലം
ലോകത്തെ മെമ്മറി ചിപ്പ് വിപണിയുടെ 95 ശതമാനവും സാംസങ്, എസ്.കെ ഹൈനിക്സ്, മൈക്രോൺ എന്നീ മൂന്ന് കമ്പനികളുടെ നിയന്ത്രണത്തിലാണ്.
ആർട്ടിഫിഷ്യൽ ഇന്റലിജൻസിന്റെ വ്യാപനത്തോടെ മെമ്മറി ചിപ്പുകളുടെ ആവശ്യകത വൻതോതിൽ ഉയർന്നു. ചാറ്റ്ജിപിടി, ജെമിനി തുടങ്ങിയ എഐ സേവനങ്ങളുടെ വ്യാപക ഉപയോഗം ഡാറ്റ സംഭരണത്തിനുള്ള ആവശ്യകത വർധിപ്പിച്ചു. വില ഇനിയും ഉയരുമെന്ന ആശങ്കയിൽ നിരവധി കമ്പനികൾ വരും വർഷങ്ങളിലേക്കുള്ള വിതരണ കരാറുകൾ മുൻകൂട്ടി ഉറപ്പിക്കുകയാണ്.
മുന്നിലുള്ള വെല്ലുവിളികൾ
ഈ വളർച്ചയ്ക്കിടയിലും സാംസങ്ങിന് ചില വെല്ലുവിളികൾ തുടരുന്നുണ്ട്.
മെമ്മറി ചിപ്പ് വിപണി എല്ലായ്പ്പോഴും ഒരേ നിലയിൽ തുടരില്ല. 2019-ൽ ആവശ്യകത കുറഞ്ഞപ്പോൾ കമ്പനിയുടെ ലാഭം പകുതിയായി കുറഞ്ഞ അനുഭവമുണ്ട്. അതിനാൽ പുതിയ നിർമാണശാലകളുടെ വികസനത്തിന് കമ്പനി കൂടുതൽ പ്രാധാന്യം നൽകുകയാണ്. ഈ വർഷം ഒരു പുതിയ പ്ലാന്റ് പ്രവർത്തനം ആരംഭിക്കും. കൂടാതെ ഏകദേശം 55 ബില്യൺ ഡോളർ (ഏകദേശം 5.28 ലക്ഷം കോടി രൂപ) ചെലവിൽ ജൂലൈയിൽ നിർമ്മാണം ആരംഭിക്കുന്ന മറ്റൊരു പ്ലാന്റ് 2030-ലാണ് പൂർത്തിയാകുക.
എഐ സാങ്കേതികവിദ്യ കൂടുതൽ കാര്യക്ഷമമാകുമ്പോൾ മെമ്മറി ഉപയോഗം കുറയാൻ സാധ്യതയുണ്ടെന്നതും മറ്റൊരു വെല്ലുവിളിയാണ്. കൂടാതെ ചിപ്പ് നിർമാണ ലാഭത്തിൽ പങ്കുവേണമെന്ന ദക്ഷിണ കൊറിയൻ സർക്കാരിന്റെ നിർദേശങ്ങളും, മെമ്മറി വിഭാഗത്തിന്റെ ലാഭത്തിന്റെ 15 ശതമാനം ജീവനക്കാർക്ക് നൽകണമെന്ന ആവശ്യവുമായി യൂണിയനുകൾ ഉയർത്തുന്ന പണിമുടക്ക് ഭീഷണിയും കമ്പനിക്ക് സമ്മർദ്ദമുണ്ടാക്കുന്നുണ്ട്.
ചരിത്രം വിശ്വസിച്ച നിക്ഷേപകർക്ക് നേട്ടം
കഴിഞ്ഞ മൂന്ന് പതിറ്റാണ്ടിനിടെ എട്ട് തവണ സാംസങ്ങിന്റെ ഓഹരി മൂല്യം അടിസ്ഥാന ആസ്തി മൂല്യത്തിലേക്ക് താഴ്ന്നിട്ടുണ്ട്. അത്തരം സമയങ്ങളിൽ ഓഹരി വാങ്ങിയ നിക്ഷേപകർക്ക് പിന്നീട് വൻലാഭമാണ് ലഭിച്ചത്.
1998-ലെ ഏഷ്യൻ സാമ്പത്തിക പ്രതിസന്ധിക്ക് ശേഷം സാംസങ്ങിന്റെ ഓഹരികൾ പ്രതിവർഷം ശരാശരി 24.6 ശതമാനം നിരക്കിലാണ് വളർന്നത്. ഈ കാലയളവിൽ ഓഹരി മൂല്യം 470 മടങ്ങ് ഉയർന്നു. 2025-ന്റെ തുടക്കത്തിലും സമാനമായ അവസരമാണ് നിക്ഷേപകർക്ക് ലഭിച്ചത്. കമ്പനിയുടെ താൽക്കാലിക തിരിച്ചടിയേക്കാൾ ദീർഘകാല വളർച്ചയുടെ ചരിത്രത്തിൽ വിശ്വസിച്ചവരാണ് ഇന്ന് നേട്ടം കൊയ്തത്.
ഇനി എന്ത്?
2024-ൽ പ്രതിസന്ധിയിലായിരുന്ന സാംസങ് ഇന്ന് ശക്തമായ തിരിച്ചുവരവ് നടത്തിയിരിക്കുകയാണ്. എൻവിഡിയയുടെ പിന്തുണയും ടെസ്ലയുമായുള്ള കരാറും 2026 വരെയുള്ള മുൻകൂർ ഓർഡറുകളും കമ്പനിയുടെ വളർച്ചയ്ക്ക് ശക്തമായ അടിത്തറയൊരുക്കുന്നു.
ആർട്ടിഫിഷ്യൽ ഇന്റലിജൻസ് സേവനങ്ങളുടെ ഉപയോഗം തുടർച്ചയായി വർധിക്കുന്ന സാഹചര്യത്തിൽ ഈ മുന്നേറ്റം പെട്ടെന്ന് അവസാനിക്കില്ലെന്നാണ് വിലയിരുത്തൽ. ഇനി സാംസങിന് ഈ വളർച്ച എത്രകാലം നിലനിർത്താനാകുമെന്നതാണ് ടെക് ലോകം ഉറ്റുനോക്കുന്നത്.