മുംബൈ: ഐപിഎല്ലില് മുംബൈ ഇന്ത്യന്സിനെതിരായ മത്സരത്തില് ചെന്നൈ സൂപ്പര് കിംഗ്സിന്റെ മലയാളി താരം സഞ്ജു സാംസണ് വെടിക്കെട്ട് പ്രകടനത്തോടെ റെക്കോര്ഡുകള് തിരുത്തി എഴുതി. പുറത്താകാതെ 54 പന്തില് നിന്ന് ആറ് സിക്സറും പത്ത് ബൗണ്ടറിയും ഉള്പ്പെടെ 101 റണ്സ് നേടിയ സഞ്ജുവിന്റെ ഇന്നിംഗ്സ് മത്സരത്തിന്റെ മുഖ്യ ആകര്ഷണമായി.
ഈ സെഞ്ചുറിയോടെ മുംബൈയ്ക്കെതിരെ സെഞ്ചുറി നേടുന്ന ആദ്യ സിഎസ്കെ താരമായി സഞ്ജു മാറി. അവസാന ഓവറിലെ അവസാന പന്തിലാണ് താരം ശതകം പൂര്ത്തിയാക്കിയത്. കൂടാതെ, മുംബൈയ്ക്കെതിരെ ഒരു സിഎസ്കെ താരത്തിന്റെ ഉയര്ന്ന വ്യക്തിഗത സ്കോര് എന്ന റെക്കോര്ഡും സഞ്ജു സ്വന്തമാക്കി. മുന്പ് റുതുരാജ് ഗെയ്ക്വാദിന്റെ പേരിലുണ്ടായിരുന്ന 88 റണ്സ് റെക്കോര്ഡാണ് ഇതോടെ മറികടന്നത്.
ഇതോടെ ഈ സീസണില് രണ്ട് സെഞ്ചുറികള് നേടുന്ന ആദ്യ ഇന്ത്യന് സിഎസ്കെ താരമായും സഞ്ജു മാറി. ഡല്ഹിക്കെതിരായ മത്സരത്തിലും താരം ശതകം നേടിയിരുന്നു. ഐപിഎല്ലില് മൊത്തം സെഞ്ചുറികളുടെ എണ്ണത്തില് സഞ്ജു അഞ്ച് ശതകങ്ങളുമായി കെ.എല്. രാഹുലിനൊപ്പമെത്തി.
സിഎസ്കെയ്ക്കായി ഒരു സീസണില് രണ്ട് സെഞ്ചുറികള് നേടുന്ന താരങ്ങളുടെ എലൈറ്റ് പട്ടികയിലും സഞ്ജു ഇടം പിടിച്ചു. വെറും ഏഴ് മത്സരങ്ങളില് നിന്നാണ് ഈ നേട്ടം കൈവരിച്ചതെന്നത് പ്രത്യേകതയാണ്. ടി20 ക്രിക്കറ്റില് വിക്കറ്റ് കീപ്പര് ബാറ്ററായി കൂടുതല് സെഞ്ചുറികള് നേടുന്ന താരങ്ങളില് ഒരാളായും സഞ്ജു ഉയര്ന്നു.
വാംഖഡെയിലെ ഈ തകര്പ്പന് പ്രകടനത്തോടെ ഓറഞ്ച് ക്യാപ് പോരാട്ടത്തിലും സഞ്ജു ശക്തമായ മുന്നേറ്റം നടത്തി. ടീമിനും ആരാധകര്ക്കും ആത്മവിശ്വാസം പകരുന്ന പ്രകടനമായിരുന്നു ഇത്.