സംസ്ഥാനത്ത് ആവർത്തിച്ച് റിപ്പോർട്ട് ചെയ്യുന്ന ശസ്ത്രക്രിയ പിഴവുകളുടെ പശ്ചാത്തലത്തിൽ ആരോഗ്യവകുപ്പ് പുതുക്കിയ മാർഗരേഖ പുറത്തിറക്കി. രോഗികളുടെ സുരക്ഷ ഉറപ്പാക്കുന്നതിനായി നിരവധി കർശന നിർദേശങ്ങളാണ് ഇതിൽ ഉൾപ്പെടുത്തിയിരിക്കുന്നത്.
ശസ്ത്രക്രിയയ്ക്ക് വിധേയരാകുന്ന രോഗികൾക്ക് ആവശ്യമായ വിവരങ്ങൾ അടങ്ങിയ റിസ്റ്റ് ബാൻഡ് ധരിപ്പിക്കുക നിർബന്ധമാക്കിയിട്ടുണ്ട്. ശസ്ത്രക്രിയ നടത്തേണ്ട ശരീരഭാഗം മുൻകൂട്ടി വ്യക്തമായി അടയാളപ്പെടുത്തണമെന്നും നിർദേശം നൽകുന്നു. ഓപ്പറേഷൻ തിയറ്ററിൽ മൊബൈൽ ഫോൺ ഉപയോഗം നിരോധിച്ചിരിക്കുകയാണ്.
ശസ്ത്രക്രിയയ്ക്കിടെ ഉപയോഗിക്കുന്ന ഉപകരണങ്ങളുടെ കൃത്യമായ കണക്കെടുപ്പ് നിർബന്ധമാണ്. ഉപയോഗിച്ചും നശിപ്പിച്ചും തീരുന്ന വസ്തുക്കളുടെ വിവരങ്ങൾ രേഖപ്പെടുത്തി സൂക്ഷിക്കണമെന്നും മാർഗരേഖയിൽ പറയുന്നു. ഈ വിവരങ്ങൾ ഓപ്പറേഷൻ തിയറ്ററിലെ വൈറ്റ് ബോർഡിൽ രേഖപ്പെടുത്തണമെന്നും നിർദേശം ഉണ്ട്.
ഓപ്പറേഷനു മുമ്പ് രോഗിയുടെ കേസ് റെക്കോർഡുകൾ പൂർണ്ണമായി തയ്യാറാക്കിയിരിക്കണം. ശസ്ത്രക്രിയ പട്ടിക വാർഡ് ഡോക്ടറും നഴ്സിംഗ് ഇൻചാർജും പരിശോധിച്ച് ഒപ്പുവെക്കണമെന്നും നിർദേശിച്ചിട്ടുണ്ട്.
നിലവിലുള്ള പ്രോട്ടോകോൾ പുതുക്കിയാണ് പുതിയ മാർഗരേഖ പുറത്തിറക്കിയത്. ശസ്ത്രക്രിയ പിഴവുകൾ ആവർത്തിക്കാതിരിക്കാനും ചികിത്സയുടെ നിലവാരം മെച്ചപ്പെടുത്താനും ഇതിലൂടെ സാധിക്കുമെന്നാണ് ആരോഗ്യവകുപ്പിന്റെ വിലയിരുത്തൽ.